އުތުރު ތިލަފަޅާ ގުޅިގެން ހަގީގަތާ ހިލާފު ވާހަކަ ފަތުރަމުންދާ މީހުންނާ މެދު ފިޔަވަޅު އެޅުމަށް ގޮވާލައި ކުއްލި މައްސަލައެއް ހުށަހަޅައިފި
16 މާރިޗު 2021 | އަންގާރަ 08:05އުތުރު ތިލަފަޅާ ގުޅިގެން ހަގީގަތާ ޚިލާފު ދޮގު ވާހަކަ ފަތުރަމުންދާތީ އެ މައްސަލަ ބަލައި އެކަމުގައި ޝާމިލުވާ ފަރާތްތަކާމެދު ފިޔަވަޅު އެޅުމަށް ސަރުކާރަށް ގޮވާލާފައިވޭ
އަލިފުށި ދާއިރާގެ މެންބަރު މުހައްމަދު ރަޝީދު ހުސައިން
އުތުރުތިލަފަޅު މައްސަލައިގައި ސިޔާސީ ބަޔަކު އަޑީގައި ތިބެގެން ސިޔާސީ މަޤުސަދެއް ހާސިލުކުރުމަށްޓަކައި ދިވެހިރާއްޖެއާއި އިންޑިއާއާ ދެމެދު ސޮއިކޮށްފައިވާ އެއްބަސްވުމުގެ ކޮޕީއެއް ކަމަށް ބުނެ އެއްވެސް ޒިންމާދާރު ކަމެއް ނެތް ގޮތަށް ހަގީގަތާ ޚިލާފު ދޮގު ވާހަކަ ފަތުރަމުންދާތީ އެ މައްސަލަ ބަލައި އެކަމުގައި ޝާމިލުވާ ފަރާތްތަކާމެދު ފިޔަވަޅު އެޅުމަށް ސަރުކާރަށް ގޮވާލައި ރައްޔިތުންގެ މަޖިލީހަށް ކުއްލި މައްސަލައެއް ހުށަހަޅައިފިއެވެ.
އަންގާރަ ދުވަހުގެ ރައްޔިތުންގެ މަޖިލީހުގެ ޖަލްސާގައި މި މައްސަލަ ހުށަހަޅުއްވަމުން އަލިފުށި ދާއިރާގެ މެންބަރު މުހައްމަދު ރަޝީދު ހުސައިން ވިދާޅުވީ ދިވެހިރާއްޖޭގެ ސަރަހައްދުގެ 97 އިންސައްތައަށް ވުރެ ބޮޑު ސަރަހައްދަކީ ކަނޑު ކަމަށްވެފައި ދިވެހި ކަނޑުގެ ސަރަހައްދު ބެލެހެއްޓުމަށާއި ދިވެހި ގައުމާއި ރައްޔިތުންގެ ސަލާމަތާއި ރައްކާތެރިކަން ކަށަވަރުކޮށް ދިވެހި ރާއްޖޭގެ ކަނޑުގެ ސަރަހައްދުގައި ހިންގާ މަސްތުވާތަކެތީގެ ވިޔަފާރިއާއި ޓެރަރިޒަމްއާއި އިންސާނީ ވަގުފާރި ފަދަ ކަންކަން ހުއްޓުވުމަށް އެކަށީގެންވާ ވަސީލަތް މިއަދާ ހަމައަށް ވެސް ދިވެހި ސިފައިންގެ ކޯސްޓްގާޑުގައި ގާއިމްކޮށްދީފައި ނުވާ ކަމަށެވެ.
އަދި ވިދާޅުވީ ދިވެހި އަސްކަރިއްޔާ ތަރައްގީކޮށް ދިވެހި ސިފައިންގެ ގާބިލްކަން އިތުރުކުރުމަށްޓަކައި ސަރުކާރުކާރުން ކުރާ މަސައްކަތް ހުއްޓުވައި، އިންޑިއާ ކަނޑުގެ ހަމަޖެހުން ނަގާލައި، ދިވެހިރާއްޖޭގެ އެކުވެރި އަދި އަވަށްޓެރި ގައުމުތަކާއެކު އުފެދިފައިވާ ގުޅުންތަކަށް ބުރޫއަރުވައި، ދިވެހި ސިފައިންނަށް ރައްޔިތުންކުރާ އިހުތިރާމް ގެއްލުވާލައި، ސަލާމަތީ ޚިދުމަތްތަކުގެ މެދުގައި ފިތުނަފަސާދަ އުފެއްދުމަށްޓަކައި ސިޔާސީ ބަޔަކު މަސައްކަތް ކުރަމުން ދާ ކަމަށެވެ.
