މިލިޓަރީ ބޭސްއެއް ރާއްޖޭގައި ގާއިމުކުރާން އުޅޭނަމަ މަޖިލީހުގައި އެބަހުސް ހިނގާނެ- ނަޝީދު
16 މާރިޗު 2021 | އަންގާރަ 05:38ފޭކް އެއްބަސްވުންތައް ލީކް ކުރަމުންދާ މީހުންނާމެދު ޤާނޫނީ ފިޔަވަޅުމަށް ގޮވާލައި މަޖިލީހަށް މިއަދު ވަނީ ކުއްލި މައްސަލައެއް ހުށަހަޅާފައި
ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު
މިލިޓަރީ ބޭސްއެއް ރާއްޖޭގައި ގާއިމްކުރާން އުޅޭނަމަ މަޖިލީހުގައި އެ ބަހުސް ހިނގާނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ. ރައީސް ނަޝީދު މިހެން ވިދާޅުވީ މިހާރު ކުރިއަށްދާ ރައްޔިތުންގެ މަޖިލީހުގެ ޖަލްސާއަށް ހުށަހަޅުއްވާފައިވާ ކުއްލި މައްސަލައިގެ ބަހުސްގެ ތެރެއިންނެވެ. ރައީސް ނަޝީދު ވިދާޅުވީ، އުތުރުތިލަފަޅުގައި ގާއިމުކުރަނީ މިލިޓަރީ ބޭހެއް ނޫން ކަން އެމަނިކުފާނު ގަބޫލުކުރައްވާ ކަމަށާއި، އެމަނިކުފާނު މަޖިލީހުގައި ހުރެ ރާއްޖޭގައި މިލިޓަރީ ބޭހެއް ގާއިމުކުރަން އުޅޭނަމަ އެކަމާ މަޖިލީހުގައި ބަހުސް ކުރައްވާނެ ކަމަށެވެ.
އުތުރު ތިލަފަޅާ ގުޅޭގޮތުން ހަގީގަތާ ޚިލާފު ވާހަދައްކާ މީހުންނާއި، އަދި ފޭކް އެއްބަސްވުންތައް ލީކް ކުރަމުންދާ މީހުންނާ މެދު ޤާނޫނީ ފިޔަވަޅުމަށް ގޮވާލައި މަޖިލީހަށް މިއަދު ވަނީ ކުއްލި މައްސަލައެއް ހުށަހަޅާފައެވެ.
މި މައްސަލަ މަޖިލީހަށް ހުށަހެޅުއްވީ ރައްޔިތުންގެ މަޖިލީހުގެ އަލިފުށީ ދާއިރާގެ މެމްބަރު މުހައްމަދު ރަޝީދު ހުސެއިންއެވެ. މި ކުއްލި މައްސަލަ ބަލައިގަތުމަށް ފާސްވީ 38 މެމްބަރުން ވޯޓުންނެވެ.
މުހައްމަދު ރަޝީދު ހުށަހަޅުއްވި މި މައްސަލާގައި ބުނެފައިވަނީ 2013 ވަނަ އަހަރުން ފެށިގެން ނިމިދިޔަ ސަރުކާރުތަކުން މި އެއްބަސްވުން ހެދުމަށް މަސައްކަތްކޮށް 2016 ވަނަ އަހަރު އޭރުގެ ޑިފެންސް މިނިސްޓަރު އިންޑިޔާ ސަރުކާރާއެކު މި އެއްބަސްވުން ހަދާފައިވާކަމަށެވެ. އަދި މިހާރުގެ ސަރުކާރުން އޭރުގެ އެއްބަސް ވުމުގައި ހިމެނޭ ރާއްޖޭގެ މިނިވަންކަމަށް ނުރައްކާވާގޮތަށް ހުށަހެޅި ހުރިހާ މާއްދާތަކެއް އުނިކޮށް، ރާއްޖޭގެ ސިޔާދަތާއި އިސްތިޤުލާލު ދެމެހެއްޓޭގޮތަށް މި އެގްރީމަންޓަށް ބަދަލު ގެނެސް އިސްލާހު ކޮށްފައިވާކަމަށެވެ.
އަދި މިއަދު ފޭކު އެގްރީމަންޓް ހަދައި ސިފައިންގެ އަގުވައްޓާލަން ކުރާ މަސައްކަތަކީ ބަލައި ގަނެވޭނެ ކަމެއްނޫންކަމަށާއި، ރާއްޖެއަކީ ކަނޑުގެ ސަރަހައްދު ބޮޑު ޤައުމަކަށްވުމުން، ރާއްޖޭގެ ކަނޑުގެ ސަރަހައްދު ބެލެހެއްޓުމަށް ދިވެހި ސިފައިން ކުރައްވާ މަސައްކަތާ ދެކޮޅަށް މަސައްކަތް ކުރައްވާ ފަރާތްތަކާމެދު ފިޔަވަޅު އެޅުމަށް ވެސް މި މައްސަލައިގައި ވާހަކަ ދައްކަވާ މެމްބަރުން ދަނީ ގޮވާލަމުންނެވެ.
