ކުރިއަށް އޮތް ތަނުގައި ކޮންމެ ކުއްޖަކަށްވެސް އެކަށައެޅޭނީ ވަކި ޓްރީޓްމަންޓް ޕްލޭނެއް- އެންޑީއޭ
މައިގަނޑު 7 ކަމެއް މިހާރުން މިހާރަށް ބަދަލުވާން ޖެހޭނެކަމަށް ބެލުމަށްފަހު ކަމާގުޅުން ހުރި މަސައްކަތްތަކެއް ފަށާފައިވޭ
އެންޑީއޭ ހިއުމަން ރައިޓްސް އެންޑް ޖެންޑަރ ކޮމިޓީއަށް
ކުރިއަށް އޮތް ތަނުގައި މަސްތުވާތަކެތީގެ ވަބާއިން ކުދިން ސަލާމަތް ކުރުމަށް ފަރުވާ ދިނުމުގައި ކޮންމެ ކުއްޖަކަށްވެސް އެކަށައެޅޭނީ ވަކި ޓްރީޓްމަންޓް ޕްލޭނެއްކަމަށް ނޭޝަނަލް ޑްރަގް އޭޖެންސީ (އެންޑީއޭ)ން ބުނެފިއެވެ.
އެންޑީއޭއާއި ގުޅޭގޮތުން ހުށަހަޅާފައިވާ މައްސަލަތަކާ ގުޅޭގޮތުން، ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީން އެ އޭޖެންސީގެ ބޯޑުގެ މެންބަރުންނާ ބައްދަލުކުރުމަށް ބޭއްވި ކޮމިޓީ ބައްދަލުމުގައި އެ ބޯޑުގެ މެންބަރުން ވިދާޅުވީ އެންޑީއޭގެ ބޯޑުގައި ހުރި މަސައްކަތްތަކަށް ހުރި ގޮންޖެހުންތަކާއި، އަދި ހާއްސަކޮށް މަސްތުވާތަކެތި ބޭނުންކުރާ ފަރާތްތަކާއި އެ ފަރާތްތަކުގެ އާއިލާއިން މިހާރު ކުރެވެމުންދާ މަސައްކަތްތަކާ މެދު ދެކެނީ ކިހިނެއްތޯ ބެލުމުގެ މަސައްކަތް ކުރެވެމުން ދާކަމަށެވެ.
މައިގަނޑު 7 ކަމެއް މިހާރުން މިހާރަށް ބަދަލުވާން ޖެހޭނެކަމަށް ބެލުމަށްފަހު ކަމާއި ގުޅުން ހުރި މަސައްކަތްތަކެއް ފަށާފައިވާކަމަށް އެންޑީއޭގެ ބޯޑުގެ މެންބަރުން ވިދާޅުވިއެވެ. އެގޮތުން މިވީހާތަނަށް ހުރިހާ ކުދިންނަށްވެސް ދެމުން އަންނަނީ އެއް ކަހަލަ ފަރުވާތަކެއް ކަމަށާއި އެކަން އެގޮތަށް ކުރުމުން ހުރިހާ ކުދިންނަށް އެ ފަރުވާގެ ބޭނުން އެންމެ އެދެވޭ ގޮތުގައި ނުކުރެވޭކަމަށް ވިދާޅުވިއެވެ. ކޮންމެ ކުއްޖަކަށް ވަކި ޓްރީޓްމަންޓް ޕްލޭންއެއް ހެދިގެން ދިއުމަކީ މުހިއްމުކަމެއްކަމުން ކުރިއަށް އޮތް ތަނުގައި ކޮންމެ ކުއްޖަކަށްވެސް އެފަދަ ޓްރީޓްމަންޓް ޕްލޭންއެއް އެކަށައެޅިގެން ދާނެކަމަށްވެސް ވިދާޅުވިއެވެ.
މީގެ އިތުރުން އެންމެ މުހިއްމު އެއްކަމަކީ އެ ކުއްޖަކު ހުންނަ ތަނަކުން ފަރުވާ ލިބޭނެ އިންތިޒާމް ގާއިމްވެގެން ދިއުން ކަމަށް ވިދާޅުވިއެވެ. އަދި ވިދާޅުވީ ކޮމިއުނިޓީގައި ހުރެގެން ފަރުވާ ލިބުން ވަރަށް ހަނިކަމަށާއި އެކަން ޕައިލެޓް ކުރުމުގެ ގޮތުން ގއ. ވިލިނގިލީގައި އެ މުޖްތަމައުގައި ހުރެގެން ފަރުވާ ލިބޭނެ ކަންކަން މިހާރު ފަށައިގެން ކުރިއަށް ދާ ކަމަށެވެ. އެއީ އަދި ފުޅާ ކުރާނެ ކަމެއް ކަމަށްވެސް އެންޑީއޭއިން ބުނެއެވެ.
އެ އޭޖެންސީން ބުނީ ދެވަނަ ކަމަކީ މެޑިކަލީ އެސިސްޓެޑް ޓްރީޓްމަންޓް ދިނުން ކަމަށެވެ. އެއީ ހުކުމެއް ނެތަސް އެ މީހަކަށް މަސްތުވާތަކެތި ބޭނުން ކުރުމަކީ މައްސަލައަކަށް ވާ ހިސާބުން އެކިއެކި ބަލިބައްޔަށް ބޭސް ކުރަން ދާހެން ޑޮކްޓަރު ކައިރިޔަށް ގޮސް އެ މީހަކަށް ބޭސް ކުރެވޭނެ ނިޒާމެއް ގާއިމް ކުރުން ކަމަށެވެ. މީގެ އިތުރުން ޑިޓޮކްސް ސަރވިސަސްގެ މުހިއްމު ކަމަށް އަލިއަޅުވާލަމުން އެންޑީއޭއިން ބުނީ ވަރަށް ގިނަ ކުދިން ހުއްޓާލަން ބޭނުންވި ނަމަވެސް ސިސްޓަމްގެ ތެރެއަށް ވަންނަން އުނދަގޫ ކަމުން ބައެއްފަހަރު ބައެއް ކުދިންނަށް ސަލާން ޖަހައިގެން ނަމަވެސް މަސްތުވާތަކެތި ބޭނުން ކުރަމުން ގެންދިއުމަށް ފަސޭހަ ވެގެން ދާކަމަށެވެ. އަދި މިއީ ކުއްޖާއަށާއި އާއިލާއަށްވެސް ލިބޭ ބޮޑު ގެއްލުމެއް ކަމަށާއި، ވުމާއިއެކު ކުދިންނަށް ފަސޭހައިން ޑިޓޮކްސް ވެވޭނެ ނިޒާމެއް ގާއިމް ކޮށްދީ އެކަން ހުޅުވާލެވިފައި އޮންނަން ޖެހޭކަމަށް އެންޑީއޭއިން ބުނެއެވެ.
އެންޑީއޭއިން އިތުރަށް ބުނީ މިހާރު ހޯމް ބޭސްޑްކޮށް މިކަން ކުރަން ފަށައިގެން ކުރިއަށް ދާކަމަށާއި މިހާތަނަށް ގާތްގަނޑަކަށް 500އެއްހާ ކުދިން ހޯމް ބޭސްޑްކޮށް ޑިޓޮކްސްގެ ހިދުމަތް ހޯދާފައިވާ ކަމަށެވެ. މީގެ އިތުރުން މަސްތުވާތަކެއްޗާ ބެހޭ ގާނޫނުގައި ކަނޑައަޅާފައިވާ ފެސިލިޓީތައް އަދި ފުރިހަމަ ނުވާ ކަމަށް ބުނެ އެ އޭޖެންސީން ބުނީ ހާއްސަކޮށް ޑްރަގް ރިމާންޑް ސެންޓަރާއި އަދިވެސް އިތުރު މުހިއްމު ފެސިލިޓީތަކެއް ފުރިހަމަ ނުވާ ކަމަށެވެ. މި މަސައްކަތުގެ ދަށުން އަންހެނުންނަށް ހާއްސަކޮށް ތަނެއް ހެދުމަށް ހުޅުމާލެއިން ބިމެއް ލިބި އެތަން ހެދުމުގެ މަސައްކަތް މިހާރު ކުރިއަށް ދާކަމަށް އެންޑީއޭއިން ބުނެއެވެ.
މި ކޮމިޓީގައި ބޯޑުގެ މެންބަރުން ވިދާޅުވީ މަސްތުވާތަކެތި ބޭނުން ކުރާ ކުއްޖަކު ޑިޓޮކްސް ކުރެވި އަދި ރިހެބިލިޓޭޝަނަށް ގޮސް ރަނގަޅުވިޔަސް އަލުން އަންނަ މާހައުލު ރަނގަޅު ނޫންނަަމަ އަލުން މަސްތުވާތަކެތި ބޭނުން ކުރުމާއި އެ މަގަށް އަނބުރާ ދިއުމަށް މަގުފަހިވާ ކަމަށެވެ. ވުމާއިއެކު އެ ކުދިންނަށް ރަނގަޅު ސަޕޯޓިވް މާހައުލެއް ގާއިމްކުރެވެން ޖެހޭ ކަމަށެވެ. އަދި ވިދާޅުވީ މިފަދަ ސެންޓަރެއް ގާއިމް ކުރުމުގެ މަސައްކަތް މިހާރު ދަނީ ކުރަމުން ކަމަށާއި އެގޮތުން އައްޑޫ އަދި ފުވައްމުލަކުގައި މިކަމަށް ޝައުގުވެރިވާ ފަރާތްތަކުން ހޯދުމަށް ވާނީ އިއުލާނު ކޮށްފައި ކަމަށެވެ. އަދި މާލޭގައި ވެސް މިފަދަ ސަޕޯޓިވް އެންވައިރަމެންޓެއް ހެދުމަށް ކުރިއަށް އޮތް ދެދުވަހެއްގެ ތެރޭގައި އިއުލާނު ކުރެވޭނެ ކަމަށެވެ.
އެންޑީއޭއިން ބުނީ ނަފްސާނީ ބަލިތަކާއި ގުޅިގެން ބައެއް ކުދިން މަސްތުވާތަކެތި ބޭނުން ކުރާއިރު އަނެއްބައި ކުދިން މަސްތުވާތަކެތި ބޭނުން ކުރުމުގެ ސަބަބުން ނަފްސާނީ ބަލިތަކަށް ހުށަހެޅިގެންދާ ކަމަށެވެ. އަދި އެ ކުދިންނަށް ނަފްސާނީ ގޮތުން ދިމާވާ ކަންކަން ހައްލު ކުރުމަށް ސައިކޮތެރެޕީއާއި މި ނޫނަސް މިފަދަ ފަރުވާތައް ދިނުމަށް އެންޑީއޭގައި ދެ ބެޑުގެ ފެސިލިޓީއެއް ހުރުމާއިއެކު އެންޑީއޭގެ ކްލިނިކްގެ ތެރެއިން ނަފްސާނީ ބަލިތަކަށް ފަރުވާ ކުރެވެން ޖެހޭ ކަމަށެވެ. އެގޮތުން މިހާރު މި މަސައްކަތްވެސް ކުރެވެމުން ދާކަމަށާއި ތިން ތަނެއްގައި މި ކަން ކުރެވޭނެ ނިޒާމު ހަމަޖެހިފައިވާ ކަމަށެވެ.
