ފެންފުށިން ކޮވިޑް-19ށް ދެމީހަކު ޕޮޒިޓިވްވެއްޖެ
މިމަހުގެ 12 ވަނަ ދުވަހު ބަލީގެ އަލާމާތްތައް ފެނިގެން ނެގުނު ސާމްޕަލް ޕޮޒިޓިވްވެފައިވޭ
އދ.ފެންފުށި، އެރަށް މިހާރު ވަނީ މޮނިޓަރިއަށްލާފައި
އދ. ފެންފުށިން ކޮވިޑް-19ށް ދެމީހަކު ޕޮޒިޓިވްވެއްޖެއެވެ.
އާދިއްތަ ދުވަހުގެ ރޭ ހެލްތު އެމަޖެންސީ އޮޕަރޭޝަން ސެންޓަރު (އެޗްއީއޯސީ)ން ބޭއްވި ނޫސްވެރިންގެ ބައްދަލުވުމުގައި ހެލްތް ޕްރޮޓެކްޝަން އެޖެންސީ (އެޗްޕީއޭ)ގެ ޑިރެކްޓަރ އަހުމަދު ނާސިރު ވިދާޅުވީ ފެންފުށީން ކޮވިޑްގެ އެއްކްލަސްޓަރ ފެނިފައިވާ ކަމަށެވެ.
އެގޮތުން މި މަހުގެ 12 ވަނަ ދުވަހު ބަލީގެ އަލާމާތްތައް ފެނިގެން ނެގުނު ސާމްޕަލް ޕޮޒިޓިވްވެފައިވާ ކަމަށެވެ. އެ ކޭސްއާ ގުޅިގެން މިހާތަނަށް 105 ސާމްޕަލް ނެގިފައިވާ ކަމަށް އޭނާ ވިދާޅުވިއެވެ. އަދި ވިދާޅުވީ އޭގެ ތެރެއިން މިމަހުގެ 13 ގައި އެކަކު ޕޮޒިޓިވްވެފައިވާ ކަމަށެވެ.
ފެންފުށީ ކައުންސިލްގެ ނައިބު ރައީސް މޫސާ އަލީ ވިދާޅުވީ އެ ރަށުން ފުރަތަމަ ޕޮޒިޓިވްވީ އުމުރުން 37 އަހަރުގެ އަންހެނެއް ކަމަށެވެ. އެމީހާއަކީ އެއްވެސް ޓްރެވަލް ހިސްޓްރީއެއް ވެސް ނެތް އަދި އެފަދަ މީހަކާ ބައްދަލުވެފައި ވެސް ނުވާ އަދި އެއްވެސް ވަޒީފާއެއް އަދާކުރާ މީހެއްނޫން ކަމަށް ވެސް ވިދާޅުވިއެވެ.
ފެންފުށި މޮނިޓަރިންއަށްލުމުގެ އިތުރަށް އާންމުން ނިކުމެ އެއްވެ އުޅުން މަނާކޮށް އެއްވެ އުޅެވޭނެ ފަދަ ތަންތަން ވެސް ވަނީ ބަންދުކޮށްފައެވެ. އަދި ކެފޭ ރެސްޓޯރަންޓުތަކާއި، ޕާކުތަކާއި މައިޒާންތައް ވެސް ވަނީ ބަންދުކޮށްފައެވެ.
