ފެންފުށިން ކޮވިޑް ކޭސްތަކެއް ފެނި ސަމާލުވުމަށް އިލްތިމާސް ކޮށްފި
7 ޖެނުއަރީ 2022 | ހުކުރު 10:25ޕޮޒިޓިވްވެފައިވަނީ 5 ގެސްޓުންނާއި ރަށުގެ 3 މީހުން
އދ.ފެންފުށި
އދ. ފެންފުށިން ކޮވިޑް-19ގެ ކޭސްތަކެއް ފެނި ރައްޔިތުން ރައްކާތެރިވެ ސަމާލުވުމަށް ފެންފުށީ ކައުންސިލާއި ސިއްހީ މަރުކަޒުން އިލްތިމާސް ކޮށްފިއެވެ.
އެރަށު ކައުންސިލުން ބުނީ މިވަގުތު ކޮވިޑަށް ޕޮޒިޓިވްވެފައިވާ 5 ގެސްޓުން އެބަތިބި ކަމަށާއި، އޭގެ އިތުރުން ރޯގާގެ އަލާމާތްތަކެއް ހުރެގެން ސިއްހީ މަރުކަޒަށް ދެއްކި އެރަށުގެ 3 މީހަކު ވެސް ޕޮޒިޓިވްވެފައިވާ ކަމަށެވެ. އެރަށުން ޕޮޒިޓިވްވެފައި ވަނީ 3 ގެއަކުން 3 މީހެއް ކަމަށާއި، އެމީހުންގެ ކޮންޓެކްޓް ޓްރޭސިން ނިންމައި ސާމްޕަލް މިހާރު މާލެ ފޮނުވިފައިވާ ކަމަށް ސިއްހީ މަރުކަޒުން ބުންޏެވެ.
ކޮވިޑް-19 ގެ ޕޮޒިޓިވް ކޭސްތައް ރަށުތެރެއިން ފެނި އިތުރުވަމުން ދާތީ އާއި އަދި އަރިދަފުސް ރޯގާ އާއި ހުން ރަށު ތެރޭގައި ހަލުވިކަމާއިއެކު ފެތުރެމުންދާތީ އެންމެން ވެސް މިކަމަށް ސަމާލުކަން ދިނުމަށާއި ރައްކާތެރިވެ ތިބުމަށް ސިއްހީ މަރުކަޒުން ވަނީ އިލްތިމާސް ކޮށްފައެވެ.
