ފެންފުށިން ގެއްލުނު ޒުވާނާއާ ގުޅޭ ތަފާތު ވާހަކަތަކެއް: ގެއްލުނު ރޭ ވެސް ޑީންގީ އެއް ވަގަށް ނެގި!
އެ މީހާ ގެއްލުނު ރޭ އެރަށުން ޑިންގީއެއް ވެސް ވަނީ ގެއްލިފައި
ފެންފުށިން ގެއްލުނު މީހާ ހޯދުމުގެ މަސައްކަތް ކުރަނީ
އދ. ފެންފުށިން 29 އަހަރުގެ ޒުވާނަކު ގެއްލިގެން ރަށުގެ ރައްޔިތުންނާއި ފުލުހުން އަދި ސިފައިން ދަނީ އޭނާ ހޯދުމުގެ މަސައްކަތް ކުރަމުންނެވެ. ހޯދަމުން ދަނީ އދ. ފެންފުށީ ޕޭންޒީގޭ، އުމުރުން 29 އަހަރުގެ އަދުނާން އަޙްމަދު ނަމަކަށް ކިޔާ މީހެކެވެ.
ފެންފުށިން ވާހަކަ ދެއްކި މީހަކު ރާއްޖެ އެމްވީއަށް ބުނީ އޭނާ ގެއްލިފައިވާއިރު ބެލެވެނީ އެރަށު ޑިންގީއެއްގައި ފުރައިގެން ދިޔައީ ކަމަށެވެ.
"މިރަށު ޑިންގީއެއް އެރޭ ގެއްލުނީ. އެޑިންގީގެ ވެރިމީހާ އެއަށް ޕެޓްރޯލް އަޅަނިކޮށް ބުނިކަމަށް ވަނީ ދުއްވާލަން ދޭށޭ. އެރޭ 1 ޖަހާކަށްހާއިރު އަދުނާނު ގެއްލުނީ. އޭގެ ފަހުން އެ ޑިންގީއެއް ވެސް ނެތް. އެވެސް ގެއްލުނީ،" ފެންފުށިން ވާހަކަ ދެއްކި މީހާ ބުންޏެވެ.
އޭނާ ގެއްލުމުގެ އެއް ދުވަސް ކުރިން ރަށު ފަޅު މަތީގައި ޑިންގީއެއްގައި އުޅެނިކޮށް ވެސް ބަޔަކު ގެނެސްފައިވާ ކަމަށާއި އޭނާއަކީ އޭނާގެ ޢަމަލްތައް ހުންނަ ގޮތުން ކަންބޮޑުވުން ހުރި މީހެއް ކަމަށް ވެސް އެރަށުން ވާހަކަ ދެއްކި މީހާ ބުންޏެވެ.
"ވަޅި އެއްޗެހި ހިފައިގެން ވެސް އުޅެފާނެ. އެކަނި ހުންނަ އަންހެން ކުދިންގެ ގަޔަށް އަތްލައި ވެސް ހަދާފާނެ. ފަޅުރަށްރަށަށް އެކަނި ގޮސް ވެސް އޮވެދާނެ،" އޭނާ ބުންޏެވެ.
އޭނާ ބުނީ ގެއްލުނު މީހާއާ މެދު ތަފާތު ގޮތްގޮތަށް ބެލެވޭ ކަމަށާއި އޭނާ ގެއްލިފައި ވަނީ ބަލަހައްޓަން ޖެހޭ ހިސާބަށް ގޮސްފައިވާ ހާލަތުގައި ހުއްޓައި ކަމަށެވެ. އަދި އޭނާގެ މައްސަލަތައް ފުލުހުންނަށް ވެސް ހުށަހަޅާފައިވާ ކަމަށް އެ ރަށު ރައްޔިތަކު ބުނެފިއެވެ.
"ޝައްކު ކުރެވޭ މަސްތުވާތަކެތި ބޭނުންކުރާ މީހެއް ކަމަށް ވެސް. ބެލެވޭ ޖިންނި ކަންތައް ފަދަ ކަމެއް އުޅޭ މީހެއް ކަމަށް ވެސް އަދި ހަމަ ބެލެވޭ މާބޮޑަށް ކަމަކާ ވިސްނާ، ހިތާމައެއް ކުރާ ކަމަށް ވެސް،" އޭނާ ބުންޏެވެ.
ފެންފުށީ ކައުންސިލްގެ ރައީސް ޝާހިދު ޢަބްދުއްރަހީމް ރާއްޖެ އެމްވީއަށް ވިދާޅުވީ އޭނާގެ ޝަކުވާތައް ރަށު ކައުންސިލަށް ވެސް ވަރަށް ގިނަ އިން ލިބޭ ކަމަށާއި އެކަން ފުލުހުންނަށް ވެސް އަންގާފައިވާނޭ ކަމަށެވެ. އަދި އޭނާ ގެއްލިފައި ވަނީ ވައްކަމުގެ މައްސަލައެއްގައި ހައްޔަރު ކުރިތާ 4 ވަރަކަށް ދުވަސް ފަހުން ކަމަށް ވެސް ޝާހިދު ވިދާޅުވިއެވެ.
"ވަރަށް ފަހުން ވެސް ރަށުގެ 3 ފިހާރައަކުން ވައްކަން ކުރި މައްސަލައެއްގައި ފުލުހުންނާ ހަވާލު ކުރެވުނު. ދުވާލު އެބަހުރޭ ކެމެރާތައް ވެސް ހުންނަ ފިހާރަތަކުން ވައްކަން ކޮށްފައި. އަނެއްކާ ނަގާފައި ހުންނަނީ ވެސް ގިނައިން ޗިޕްސް ދަޅެއް ނޫނީ ވަތްގަނޑުގައި ހުންނަ ކުޑަ ފައިސާ ކޮޅެއް ކަހަލަ އެއްޗެހި،" ޝާހިދު ވިދާޅުވިއެވެ.
ކައުންސިލްގެ ރައީސް ޝާހިދު ވެސް ވިދާޅުވީ އޭނާ ގެއްލުނު ރޭ ޑިންގީއެއް ވެސް ގެއްލިފައިވާ ކަމަށާއި ރަށުގެ ރައްޔިތުންނާއި ފުލުހުންނާއި ސިފައިން ގުޅިގެން އޭނާ ހޯދުމުގެ މަސައްކަތް ވަރަށް ބޮޑަށް ކުރަމުންދާ ކަމަށާއި މުޅި ރަށުތެރެ ވެސް މިހާރު ބެލިފައިވާ ކަމަށެވެ.
އެމްއެންޑީއެފްގެ އިންފޮމޭޝަން އޮފިސަރ ކެޕްޓަން އިބްރާހީމް އާޒިމް ވިދާޅުވީ ގެއްލުނު އަދުނާނު ހޯދުމުގެ މަސައްކަތް ފުލުހުންނާއި ސިފައިން ގުޅިގެން ކުރަމުންދާ ކަމަށާއި ރަށުތެރެއާއި ފަޅުތެރެ އަދި އުރަފަށް ބަލާފައިވާ ކަމަށެވެ. އަދި އެކަމުގައި ޑައިވަރުން ވެސް ހަރަކާތްތެރިވާކަމަށް އާޒިމް ވިދާޅުވިއެވެ.
މިހާދިސާގެ މަޢުލޫމާތު އެމްއެންޑީއެފް ކޯސްޓްގާޑް މެރިޓައިމް ރެސްކިއު ކޯޑިނޭޝަން ސެންޓަރަށް ލިބިފައިވަނީ އާދީއްތަ ދުވަހު ހަވީރު 17:15 ހާއިރުއެވެ.
އާޒިމް ވިދާޅުވީ އެމީހާގެ ޚަބަރެއް އެންމެ ފަހުން ވެފައި ވަނީ ޖޫން 30 ވަނަ ދުވަހުގެ ރޭ 23:30 ހާއިރުކަމަށް އެމްއެންޑީއެފް ކޯސްޓްގާޑަށް ވަނީ މަޢުލޫމާތު ލިބިފައި ކަމަށެވެ. އަދި އޭރު އޭނާ ލައިގެންހުރީ މަޑު ނޫކުލައިގެ އަތްދިގު ގަމީހަކާއި ޖިންސެއް ކަމަށް ވެސް ވަނީ މަޢުލޫމާތު ލިބިފައި ކަމަށެވެ.
އެމްއެންޑީއެފުން ބުނީ އޭނާއާ ބެހޭ އެއްވެސް މަޢުލޫމާތެއް ލިބިއްޖެ ނަމަ އެމްއެންޑީއެފް ކޯސްޓްގާޑްގެ ހިލޭ ގުޅޭނަމްބަރު 191 އަށް ގުޅުއްވައި ދެއްވުން އެދޭ ކަމަށެވެ.
