ރާއްޖޭގައި ޑަޗް ޑޮކްލޭންޑު ކުންފުނިން ހަދާ "މޯލްޑިވްސް ފްލޯޓިން ސިޓީ" އަކީ ދުނިޔޭގައި މިފަދަ ގޮތަކަށް ހަދާ ފުރަތަމަ ސިޓީ ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.

"މޯލްޑިވްސް ފްލޯޓިން ސިޓީ" ގެ ނަމުގައި ކުރިއަށް ގެންދާ މި މަޝްރޫއަކީ ރައީސް މުހައްމަދު ނަޝީދުގެ ވެރިކަމުގައި 2009 ވަނަ އަހަރު ހޮލެންޑުގެ ޑަޗް ޑޮކްލޭންޑް ކުންފުނިން ލޯންޗު ކުރި މަޝްރޫއެކެވެ. ނަމަވެސް އޭގެ ފަހުން މިކަން ހުއްޓިފައި އޮތުމަށް ފަހު އަލުން މި މަޝްރޫގެ މަޝްވަރާތައް ފަށައި ކުރިއަށް ގެންގޮސްފައި ވަނީ 2019 ވަނަ އަހަރުގައެވެ.

މި މަޝްރޫޢުގެ މަސައްކަތްކުރުމަށް ސޮއިކޮށްފައިވާކަމަށް ވިދާޅުވެ ހޯމަ ދުވަހުގެ ރައްޔިތުންގެ މަޖިލީހުގެ ޖަލްސާގައި ރައީސް ނަޝީދު ވިދާޅުވީ މަޖިލީހުގައި އެކަން ފާހަގަކުރައްވާ ސަބަބަކީ މިއީ ދުނިޔޭގައި ގައުމެއްގައި އަލަށް ކުރެވޭ އެބާވަތުގެ މަސައްކަތަށްވާތީ ކަމަށެވެ.

މި މަޝްރޫއާ ގުޅޭގޮތުން "ރާއްޖެ އެމްވީ" އަށް މައުލޫމާތު ހިއްސާކުރައްވަމުން މި ޕްރޮޖެކްޓްގެ ލޯކަލް ކޮންސަލްޓަންޓް އިބްރާހިމް ރިޔާޒް ވިދާޅުވީ މި ސިޓީ އަކީ އަތޮޅުތެރޭގެ ރަށެއް ގޮތަށް އާންމުންނަށް ދިރިއުޅެވޭނެ ހެން ސްކޫލާއި، ހޮސްޕިޓަލް ފަދަ ހުރިހާ މުނިސިޕަލް ޚިދުމަތެއް ވެސް ލިބޭ ގޮތަށް ހަދާ ސިޓީއެއް ކަމަށެވެ. އާރަށް ކައިރީގައި އޮންނަ 200 ހެކްޓަރުގެ ފަޅެއްގައި ހަދާ މި ސިޓީގައި އަޅާ ގެތަކަކީ އާންމުންނަށް ވިއްކާނެ ތަންތަން ކަމަށައި، އެތަނުން ބިންތަކުގައި އަމިއްލައަށް ގެ އެޅުމުގެ ފުރުސަތެއް ނޯންނާނެ ކަމަށެވެ.

އޭނާ ވިދާޅުވީ އެ ސިޓީގައި ދެ ބުރީގެ ފަސްހާސް ގެ އަޅަން ނިންމާފައިވާއިރު، ކޮންމެ ގެއެއްގެ ބޮޑުމިނުގައި 900 އަކަފޫޓާއި 1500 އަކަފޫޓު ހުންނާނެ ކަމަށެވެ. އަދި ކޮންމެ ގެއެއް ވެސް ދެބުރިއަށް ނަގާއިރު މަތީގައި ޓެރަސް ހުންނާނެ ކަމަށާއި، ގެތައް ހުންނާނީ ވޯޓަރ ފްރަންޓަށް ވާގޮތަށް ކަމަށެވެ. ރިޔާޒް ވިދާޅުވީ އެތަނުން ގެތައް ދޫކުރަން ނިންމާފައި ވަނީ ހަމަ އާންމުން މިހާރު ވެސް ގެ ގަންނަ ގޮތަށް ބެންކު މެދުވެރިކޮށް ކަމަށެވެ. އެގޮތުން މޯގޭޖް ކޮށް ލޯނުގެ ޒަރިއްޔާއިން ވެސް ގެ ގަތުމުގެ ފުރުސަތު އޮންނާނެ ކަމަށް ވިދާޅުވިއެވެ.

މި އަހަރުގެ ސެޕްޓެމްބަރު މަހު މި މަޝްރޫގެ އަމަލީ މަސައްކަތް ފަށަން ނިންމާފައިވާއިރު، އޭނާ ވިދާޅުވީ މި މަޝްރޫޢުއަށް ގާތްގަނޑަކަށް އެއް ބިލިއަން ޑޮލަރު ހަރަދުވާނެ ކަމަށް ބެލެވޭ ކަމަށެވެ. 5 އަހަރާއި 8 އަހަރުގެ މުއްދަތެއްގެ ތެރޭގައި މުޅި ތަނުގެ މަސައްކަތް ނިމޭނެ ކަމަށް އަންދާޒާކޮށްފައިވާއިރު ތިން އަހަރު ތެރޭގައި ތަން ބޭނުންކުރެވޭ ވަރު ވާނެ ކަމަށް އޭނާ ވިދާޅުވިއެވެ.

ފްލޯޓިންގ ސިޓީ ހެދުމާ ގުޅޭގޮތުން ޕްލޭނިންގ މިނިސްޓަރ މުހައްމަދު އަސްލަމް ވަނީ މީގެކުރިން ރައްޔިތުންގެ މަޖިލީހުގެ ޖަލްސާގައި ވަރަށް ތަފްސީލުކޮށް ވިދާޅުވެދެއްވާފައެވެ. ރާއްޖެ ފަދަ ޖަޒީރާ ރަށްތަކެއް އެކުލެވޭ ގައުމެއްގައި ބިން ހިއްކައިގެން ބޯހިޔާވަހިކަން ފޯރުކޮށްދިނުމަށްވުރެ އެފަދަ ގޮތަކަށް ބޯހިޔާވަހިކަން ފޯރުކޮށްދިނުން ރަނގަޅުވާނެކަމަށް މިނިސްޓަރ ވަނީ ވިދާޅުވެފައެވެ.