އެމް.އެން.ޑީ.އެފް.އިން ކުރިއަށް ގެންދިޔަ ހައިޑްރޯގްރެފިކް ސަރވޭ ނިންމާލައިފި
ސަރވޭއާ ގުޅިގެން ނެގުނު ޗާޓްތައް ނިކުންނާނީ މިއަހަރުގެ ފަހުކޮޅުގައި
އެމް.އެން.ޑީ.އެފް.ގެ ކޯސްޓްގާޑުގެ ކޮމާންޑަރ ކާނަލް މުހައްމަދު ސަލީމް ނޫސްވެރިންގެ ބައްދަލުވުމުގައި ވާހަކަ ދައްކަވަނީ
އެމް.އެން.ޑީ.އެފް. އާއި އިންޑިއާގެ ނޭޝަނަލް ހައިޑްރޯގްރެފިކް އޮފީހާ ގުޅިގެން ފެށި ރާއްޖޭގެ ނެވިގޭޝަން ޗާޓު އަޕްގްރޭޑް ކުރުމުގެ މަސައްކަތް ނިންމާލައިފިއެވެ.
މި ސަރވޭ ނިންމާލުމާ ގުޅިގެން އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެމް.އެން.ޑީ.އެފް.ގެ ކޯސްޓްގާޑުގެ ކޮމާންޑަރ ކާނަލް މުހައްމަދު ސަލީމް ވިދާޅުވީ މި ސަރވޭއާ ގުޅިގެން ނެގުނު ޗާޓްތައް ނިކުންނާނީ މިއަހަރުގެ ފަހުކޮޅުގައި ކަމަށެވެ. އަދި ސްމޯލް ސްކޭލް ޗާޓަަށް ބޭނުންވާ ބައެއް މައުލޫމާތުތައް މިފަހަރު ނުނިންމުނު ކަމަށާއި އެހެންނަމަވެސް ކުރިއަށް ހުރި ސަރވޭތަކުގައި މި މަސައްކަތް ނިންމާލެވޭނެ ކަމަށް އޭނާ ވިދާޅުވިއެވެ.
މި ނޫސްވެރިންގެ ބައްދަލުވުމުގައި ވާހަކަދައްކަވަމުން އެމްއެންޑީއެފް ކޯސްޓްގާޑް ޑިރެކްޓަރ ލެފްޓިނެންޓް ކާނަލް އަހްމަދު ފާތިހް ވިދާޅުވީ މި ސަރވޭ ކުރިއަށް ގެންގޮސްފައިވަނީ ވަރަށް ފުރިހަމަކޮށް ކަމަށެވެ.
ސަރވޭގައި މިލިޓަރީ އެހެން އޮޕަރޭޝަންތަކަށް ބޭނުންވާ މަޢުލޫމާތު ހިމަނާފައިނުވާއިރު މި ސަރވޭ ކުރިއަށް ގެންގޮސްފައިވަނީ ރާއްޖޭގެ ސަލާމަތާއި ރައްކާތެރިކަމުގެ އެއްވެސް މަޢުލޫމާތެއް ލިބޭ ގޮތަކަށް ނޫނެވެ.
2007 ވަނަ އަހަރުން ފެށިގެން އިންޑިއާގެ ނޭޝަނަލް ހައިޑްރޯގްރެފިކް އޮފީހާ ގުޅިގެން ރާއްޖޭގައި ކުރަމުންދާ ހައިޑްރޮގްރެފިކް ސަރވޭއަކީ ދިވެހިރާއްޖޭގައި ނިޔަމިކަމަށް ބޭނުން ކުރަމުން އަންނަ ކަރުދާސް ޗާޓާއި، ޖީޕީއެސް އަދި އެކްޑިސްގައި ބޭނުންކުރެވޭ އިލެކްޓްރޯނިކް ޗާޓުތައް އަޕްޑޭޓްކުރުމާއި، އެންކަރޭޖް އަދި އެޕްރޯޗް ޗާޓު ހެދުމަށްޓަކައި ކުރެވޭ ސަރވޭއެކެވެ. މިފަދަ ސަރވޭއެއްގެ އަލީގައި، ރާއްޖޭގައި އެންމެ ގިނައިން ހިނގާ ކަނޑުމަތީގެ ހާދިސާކަމުގައިވާ ފަރަށް އެރުންފަދަ ހާދިސާތައް މަދުކުރެވި، ދަތުރުވެރިންގެ ސަލާމަތާއި ރައްކާތެރިކަން އިތުރަށް ކަށަވަރުކުރެވި އޮޑިވެރިންނަށް ލިބޭ ގެއްލުން ކުޑަކުރެވޭނެއެވެ.
އަދި މި މަސައްކަތުގެ ސަބަބުން އިންޝުއަރެންސް ކްލެއިމްތައް ލީގަލައިޒްކުރެވުމާއި، އިޤްތިޞާދު ފުޅާކުރުމަށް ބޭނުންވާ މަޢުލޫމާތު ލިބިގެންދާނެއެވެ. މީގެ އިތުރުން، ދިވެހިރާއްޖޭގެ ތިމާވެއްޓަށް ލިބޭ ގެއްލުންތައް ދިރާސާކުރުމަށް ބޭނުންވާނެ މަޢުލޫމާތާއި ކޯސްޓަލް ޒޯން މެނޭޖްމަންޓް ފަދަ މުހިންމު މަސައްކަތްތަކަށް ބޭނުންވާނެ މަޢުލޫމާތު ވެސް ލިބިގެންދާނެއެވެ.
މި ސަރވޭ ކުރިއަށް ގެންގޮސްފައިވަނީ ފޭސްތަކަކަށް ބަހާލައިގެންނެވެ. މިގޮތުން، މި މުއްދަތުގެ ތެރޭގައި އެންމެ ފުރަތަމަ ކުރިއަށް ގެންދިޔުމަށް ހަމަޖެހިފައިވަނީ ހދ. އަތޮޅުން ފެށިގެން ށ. އަތޮޅާ ހަމައަށެވެ. މި ސަރވޭގައި ހދ. ކުޅުދުއްފުށި އިންޓަރނޭޝަނަލް ސީޕޯޓްގެ ލާޖް ސްކޭލް އެޕްރޯލް ޗާޓު ވެސް ހިމެނިގެންދާނެއެވެ. ރާއްޖޭގެ އިންޓަރނޭޝަނަލް ޕޯޓްތައް ހުރި ސަރަޙައްދުތަކުގެ ތެރޭގައި ލާޖް ސްކޭލް ޗާޓް ޕަބްލިޝްކުރެވިފައިވަނީ މާލޭގެ ސަރަޙައްދުގެ އިތުރުން އައްޑޫ އަތޮޅާއި އިހަވަންދިއްޕޮޅުގައެވެ.
