ދިވެހި ނޫސްވެރިން ކުރަމުންދާ މަސައްކަތަކީ ހިތްވަރުގަދަ، ބިރުކުޑަ މަސައްކަތެއް: ރޫސޯ
ރޫސޯ ވަނީ ރާއްޖެޓީވީގެ މަސައްކަތްތައް ބައްލަވާލައްވާ، ޗެނަލް ހިންގުމަށް ކުރިމަތިވެފައިވާ ހުރި ގޮންޖެހުންތަކާއި ބެހޭގޮތުން މައުލޫމާތު ސާފުކުރައްވާފަ
މެރިކާއިން ރާއްޖެ އާއި ސްރީލަންކާއަށް ކަނޑައަޅުއްވާފައި ހުންނަވާ ޕްރެސް، ކަލްޗަރަލް އެންޑް އެޑިއުކޭޝަނަލް އެފެއަރޒްގެ ޑިރެކްޓަރ ޖޭމްސް ރޫސޯ ރާއްޖެޓީވީގެ ބައެއް ސްޓާފުންނާއެކު
މިނިވަން މީޑިޔާގެ ހައްގުގައި ނޫސްވެރިން ކުރަމުންދާ މަސައްކަތަކީ ބިރު ކުޑަ މަސައްކަތެއް ކަމަށް ވިދާޅުވެ، އެމެރިކާއިން ރާއްޖެ އާއި ސްރީލަންކާއަށް ކަނޑައަޅުއްވާފައި ހުންނަވާ ޕްރެސް، ކަލްޗަރަލް އެންޑް އެޑިއުކޭޝަނަލް އެފެއަރޒްގެ ޑިރެކްޓަރ ޖޭމްސް ރޫސޯ ތައުރީފްކުރައްވައިފި އެވެ.
ރޫސޯ މިހެން ވިދާޅުވީ ބައިނައްލަޢުވާމީ ނޫސްވެރިކަމުގެ މިނިވަން ކަމުގެ ދުވަހާ ގުޅިގެން ރާއްޖެޓީވީއަށް ދެއްވި ހާއްސަ އިންޓަވިއުއެއްގަ އެވެ.
ރާއްޖެޓީވީއަށް ކުރެއްވި ޒިޔާރަތުގައި ރޫސޯ ވަނީ ރާއްޖެޓީވީގެ މަސައްކަތްތައް ބައްލަވާލައްވާ، ޗެނަލް ހިންގުމަށް ކުރިމަތިވެފައިވާ ހުރި ގޮންޖެހުންތަކާއި ބެހޭގޮތުން މައުލޫމާތު ސާފުކުރައްވާފަ އެވެ. އަދި، ރާއްޖެޓީވީއިން މިނިވަން މީޑިޔާއެއްގެ ހައްގުގައި ކުރަމުންދާ މަސައްކަތަށް ރޫސޯ ވަނީ ތައުރީފްކުރައްވާފަ އެވެ.
ރޫސޯގެ އިންޓަވިއުގައި ރާއްޖޭގެ ހާލަތާމެދު ވަނީ ކަންބޮޑުވުން ފާޅުކުރައްވާފަ އެވެ. އެގޮތުން އަހްމަދު ރިލްވާން ގެއްލުވާލުމާއި ބްލޮގަރ ޔާމީން ރަޝީދު މަރާލުމާއި، ރާއްޖޭގައި ނޫސްވެރިންނަށާއި މިނިވަން މީޑިޔާއަށް އެކި ފަރާތްތަކުން ކުރިމަތިކުރުވަމުންދާ ފިއްތުންތަކާމެދު ކަންބޮޑުވާކަމަށްވެސް އޭނާ ވިދާޅުވި އެވެ.
"ބައިނަލްއަގްވާމީ ޖަމާއަތްތަކުން ރާއްޖޭގެ ހާލަތާއި މެދު ކަންބޮޑުވޭ، ހާއްސަކޮށް މިނިވަން މީޑިޔާގެ ހާލަތާއި މެދު. އަޅުގަނޑުމެންނަށް ފެނިގެންދިޔައީ ވަރަށް އަނިޔާވެރިގޮތަކަށް ޔާމީން ރަޝީދު މަރާލި ތަން. އޭނާ އަކީ ޒުވާން ސޯޝަލް މީޑިއާ އެކްޓިވިސްޓެއް. އޭނަ އާއި ދިމާވުމުގެ ފުރުސަތު އަޅުގަނޑަށް ލިބިގެންދިޔަ މިދިޔަ އަހަރުގެ ތެރޭގައި. ހަމަ އެންމެ 29 އަހަރު އޭނާ އަށް، ހައިރާންކުރުވަނިވި ޒުވާނެއް. ގައުމާއި މެދު ވަރަށް ބޮޑަށް ވިސްނި. ރާއްޖޭގެ ހާލަތު ރަނގަޅުކުރުމަށް ވަރަށް ގިނަ ކަންތައްތަކެއް ކުރަން ބޭނުންވި ޒުވާނެއް. އެފަދަ ކަމެއްވުން އެއީ ވަރަށް ހިތާމަވެރިކަމެއް،" ރޫސޯ ވިދާޅުވި އެވެ.
ނޫސްވެރިޔާ އަހްމަދު ރިލްވާން ގެއްލިފައިވާތާ ގާތްގަނޑަކަށް 1000 ދުވަސްވެފައިވާ ކަމަށް ފާހަގަކުރައްވަމުން ރޫސޯ ވިދާޅުވީ މިފަދަ ކަންކަން ބަލާ، އެކަންކަން ކުރާ މީހުން އިންސާފުގެ ކުރިމައްޗަށް ގެނައުމަށް ސަރުކާރުން ނުކުޅެދިފައިވާކަން ފެންނަ ކަމަށެވެ.
"ރާއްޖޭަގައި ވަނީ އަބުރު ރައްކާތެރިކުރުމުގެ ގޮތުން ގާނޫނެއް ތައާރަފްކޮށްފަ. މީގެ ސަބަބުން ރާއްޖޭގައި މިނިވަން މީޑިޔާއަށް ބިރުވެރިކަމެއް ވަނީ އައިސްފަ. މިގާނޫނާއި މީޑިޔާތަކާއި އަމިއްލަ ފަރާތްތަކަށް ދެމުންދާ ހަމަލާތަކުގެ ސަބަބުން، މިނިވަން ހިޔާލު ވަނީ ކަސްތޮޅު އެޅުވިފައި،" ރޫސޯ ފާހަގަކުރެއްވި އެވެ.
ރާއްޖެޓީވީ އަކީ ގައުމުގައި ހުރި އެންމެ މަގުބޫލު ސްޓޭޝަންކަމަށް ފާހަގަކުރައްވާ ރޫސޯ ވަނީ ރާއްޖެޓީވީއަށް ކުރިމަތިކުރުވަމުންދާ ފިއްތުންތަކަށް ބައްލަވާލައްވާފަ އެވެ. އެގޮތުން ރާއްޖެޓީވީއާ ދެކޮޅަށް އަޅަމުންގެންދާ ފިޔަވަޅުތަކަކީ ހަރުކަށި ފިޔަވަޅުތަކެއް ކަމަށާއި އެއީ ތަރައްގީވެފައިވާ މުޖުތަމައުއެއްގައި ފެނިގެންދާނޭ މަންޒަރެއް ނޫންކަމަށްވެސް ރޫސޯ ވިދާޅުވި އެވެ. އަދި، ރާއްޖެޓީވީ އާއި ރާއްޖޭގައި މީޑިޔާގެ ހާލަތަށް ވަރަށް ގާތުން ބަލަމުންގެންދާ ކަމަށްވެސް އޭނާ ފާހަގަކުރެއްވި އެވެ.
އެމެރިކާގައި ނޫސްވެރިކަމުގެ މިނިވަންކަން ފުރިހަމައަށް ދީފައި ވަނީ އޭގައި ރައްޔިތުންނަށް ގިނަ ފައިދާތަކެއް އޮތް ކަމަށް ދެކެވަޑައިގަންނަވާތީ ކަމަށްވެސް ރޫސޯ ވިދާޅުވި އެވެ.
