އިދިކޮޅު މުޒާހަރާއިން ހައްޔަރުކުރި މީހުން ޖޫރިމަނާކުރުމަށްފަހު ދޫކޮށްލައިފި
13 މާރިޗު 2021 | ހޮނިހިރު 15:15އެ މީހުން ޖޫރިމަނާކޮށްފައިވަނީ އެޗްޕީއޭގެ ގައިޑްލައިނާ ޚިލާފުވެގެން
އިދިކޮޅު ކޯލިޝަނުން ހުކުރު ދުވަހު ކުރިޔަށް ގެންދިޔަ މުޒާހަރާގެ ތެރެއިން ބަޔަކު ހައްޔަރުކޮށްގެން ގެންދަނީ
ހުކުރު ދުވަހު އިދިކޮޅު ޕީޕީއެމް/ޕީއެންސީން ބޭއްވި މުޒާހަރާގައި ފުލުހުންގެ ބެލުމުގެ ދަށަށް ގެންދިޔަ މީހުން ޖޫރިމަނާކުރުމަށްފަހު ދޫކޮށްލައިފިއެވެ.
އިދިކޮޅު ޕީއެންސީގެ ރައީސް އަބްދުއްރަހީމް އަބްދުﷲ ހިމެނިވަޑައިގަންނަވާ ގޮތަށް 25 މީހަކު މުޒާހަރާގެ ތެރެއިން ހައްޔަރުކޮށްފައިވެއެވެ. ފުލުހުން ބުނީ ހުކުރު ދުވަހު މުޒާހަރާގެ ތެރެއިން ހައްޔަރުކުރި 25 މީހުންވެސް ދޫކޮށްލާފައިވާ ކަމަށެވެ. އަދި މި އެންމެންވެސް ދޫކޮށްލާފައިވަނީ ހެލްތު ޕްރޮޓެކްޝަން އެޖެންސީ (އެޗްޕީއޭ) ގެ ގައިޑްލައިނާ ޚިލާފުވެފައިވާތީ ޖޫރިމަނާ ކުރުމަށްފަހުގައި ކަމަށެވެ.
އިދިކޮޅު ޕީޕީއެމް/ޕީއެންސީން އަންނަނީ ސިލްސިލާކޮށް މާލެ ސިޓީގެ އިތުރުން އަތޮޅު ތެރޭގެ ބައެއް ރަށްތަކުގައިވެސް މުޒާހަރާ ކުރަމުންނެވެ. ނިމިގެންދިޔަ ހުކުރު ދުވަހު ކުރިޔަށްގެންދިޔަ މުޒާހަރާގެ ތެރެއިން 39 މީހަކު ހައްޔަރުކުރިއެވެ. އަދި މިދިޔަ ހަފުތާގައި ހައްޔަރުކުރި މީހުން ކޮވިޑަށް ޓެސްޓުކުރުމަށް އެދުމުން އެކަމަށް އިންކާރުކޮށްފައިވާ ކަމަށް ފުލުހުން ވަނީ ބުނެފައެވެ. އަދި ޓެސްޓުކުރުމަށް އިންކާރުކުރުމުން އެމީހުންގެ ސާމްޕަލް ނަގާފައިނުވާ ކަމަށް ފުލުހުން ވަނީ ބުނެފައެވެ.
މުޒާހަރާތަކުން ހައްޔަރުކުރާ މީހުން ފުލުހުން އަންނަނީ އެޗްޕީއޭގެ ގައިޑްލައިނާ ޚިލާފުވުމުން 1،000 ރުފިޔާއިން ޖޫރިމަނާ ކުރުމަށްފަހު ދޫކޮށްލަމުންނެވެ.
އިދިކޮޅުގެ މުޒާހަރާތަކާއި ގުޅިގެން ފުލުހުން ބުނަމުން އަންނަނީ އެޗްޕީއޭގެ އެންގުންތަކާ ޚިލާފުވެ، އާންމު ރައްޔިތުންގެ ސިއްހަތު ނުރައްކަލުގެ ތެރެއަށް ހުށަހެޅޭގޮތަށް އަމަލުތައް ބަހައްޓާ ފަރާތްތަކާމެދު ޤާނޫނީ ފިޔަވަޅު އަޅާނެކަމަށެވެ. މީގެ އިތުރުން އިދިކޮޅުން ކުރިއަށްގެންދާ މުޒާހަރާތަކަކީ އެޗްޕީއޭގެ ގައިޑްލައިނާ އަދި ސުލްހަވެރިކަމާއެކު އެއްވެ އުޅުމުގެ ޤާނޫނާވެސް ޚިލާފަށް ބާއްވަމުން އަންނަ އެއްވުންތަކެއް ކަމަށް ފުލުހުން ބުނެއެވެ.
މާލެ ސިޓީގައި ކޮވިޑުގެ ހާލަތު ގޯސްވެފައިވާ މި ދަނޑިވަޅުގައި އެޗްޕީއޭއިން ވަނީ މާލެ ސަރަހައްދުގައި އަޅާފައިވާ ފިޔަވަޅުތައްވެސް ވަރުގަދަކޮށްފައެވެ. އެގޮތުން އެއްފަހަރާ 5 މީހުންނަށްވުރެ ގިނަ މީހުން އެއްނުވުމާއި، ކޮވިޑުން ރައްކާތެރިވުމަށް ހާއްސަ ފިޔަވަޅުތަކެއްވެސް ވަނީ އަޅާފައެވެ.
