މެމްބަރު އާޒިމްގެ އާދޭސް- ހުރިހާ ބޭފުޅުންވެސް ވެކްސިން ޖަހާ، އިހަށް ނުވި ރައްކަލެއް ފަހުން ނުވެވޭނެ
އާޒިމް ވިދާޅުވީ މި ބިރުވެރި ރޯގާއިން ރައްޔިތުން ސަލާމަތް ކުރުމަށްޓަކައި މަސައްކަތް ކުރައްވަމުން ގެންދަވާ އެންމެހާ ފަރާތްތަކަށް ޝުކުރުދަންނަވާ ކަމަށް
އެމްޕީ އަލީ އާޒިމް
އާދޭހަކީ ހުރިހާ ރައްޔިތުންވެސް ވެކްސިން ޖެހުމަށް އަވަސްވުން ކަމަށް ވިދާޅުވެ އިހަށް ނުވި ރައްކަލެއް ފަހުން ނުވެވޭނެ ކަމަށް ކޮވިޑް-19 ބަލި ތަހައްމަލު ކުރަމުން ގެންދަވާ ރައްޔިތުންގެ މަޖިލީހުގެ މެޖޯރިޓީ ލީޑަރު އަދި އެމްޑީޕީގެ ޕީޖީ ލީޑަރ މެދު ހެންވޭރު ދާއިރާގެ މެމްބަރު އަލީ އާޒިމް ވިދާޅުވެއްޖެއެވެ.
ހޮނިހިރު ދުވަހު މިހެން ވިދާޅުވެ މެމްބަރު އާޒިމް ވީޑިއޯއެއް ޓްވީޓް ކުރައްވާފައިވާއިރު އާޒިމް ވިދާޅުވީ ކޮވިޑްގެ ގަދަ ހުމާއި އަދި އެހެނިހެން ބިރުވެރި އަލާމާތްތައް ތަހައްމަލު ކުރުމަށްފަހު ހޮނިހިރު ދުވަހަކީ ތަންކޮޅެއް ލުއި ދުވަހެއް ކަމަށާއި މި ބަލި ޖެހުމަށް މެދުވެރިވީ ވެކްސިން ނުޖެހި ލަސްވުމުން ކަމަށެވެ. މިއާއެކު އާޒިމް ވަނީ ހުރިހާ ރައްޔިތުންވެސް ވީހާވެސް އަވަހަކަށް ވެކްސިން ޖެހުމަށް އިލްތިމާސްކުރައްވާފައެވެ.
މީގެ އިތުރުން އާޒިމް ވިދާޅުވީ މި ބިރުވެރި ރޯގާއިން ރައްޔިތުން ސަލާމަތް ކުރުމަށްޓަކައި މަސައްކަތް ކުރައްވަމުން ގެންދަވާ އެންމެހާ ފަރާތްތަކަށް ޝުކުރުދަންނަވާ ކަމަށެވެ. ވަކިން ހާއްސަކޮށް ޑޮކްޓަރުން، ނަރުހުން އަދި ސިއްހީ ދާއިރާގައި މަސައްކަތް ކުރައްވަމުން ގެންދަވާ ހުރިހާ ފަރާތްތަކަށް އާޒިމް ޝުކުރުއަދާ ކުރެއްވިއެވެ.
ރާއްޖޭގައި ކޮވިޑް-19 ހަލުވި ކަމާއިއެކު ފެތުރެމުން އަންނއިރު ހުކުރު ދުވަހު ވެސް ރާއްޖެއިން އިތުރު 114 މީހުން ޕޮޒިޓިވްވެފައިވާއިރު ރާއްޖެއިން މިހާތަނަށް 21،382 މީހުން ވަނީ ކޮވިޑަށް ޕޮޒިޓިވްވެފައެވެ. ރާއްޖެއިން މިބަލީގައި 64 މީހުން ނިޔާވެފައިވާއިރު، 133 މީހަކަށް ހޮސްޕިޓަލުގައި އެޑްމިޓްކޮށްގެން އަންނަނީ ފަރުވާ ދެމުންނެވެ. އަދި ރާއްޖެއިން 18،780 މީހުން ވަނީ ބަލިން ފަސޭހަވެފައެވެ.
ކޮވިޑް-19އާ ގުޅިގެން އިއުލާންކުރި ލޮކްޑައުންއަށް ލުއިތައް ދިނުމާއެކު ކޮވިޑް-19ގެ ދެވަނަ ރާޅެއް ދިވެހިންނާ ކުރިމަތިވުމަށް ފަހު ކޭސްތައް ވަރަށް ބޮޑަށް ދަށްވިތާ މާ ގިނަ ދުވަހެއް ނުވެ އަނެއްކާވެސް ކޮވިޑް-19ގެ ތިންވަނަ ރާޅަކާ ކުރިމަތިލައި ކޭސްތައް އިތުރުވާން ފެށީ މިދިޔަ ޖެނުއަރީގައެވެ. ޖެނުއަރީ 24ން ފެށިގެން ގާތްގަނޑަކަށް ކޮންމެ ދުވަހަކުވެސް ކޭސްތަކުގެ އަދަދު ހުންނަނީ 100ން މަތީގައެވެ. އެއާއެކު އެ ބަލިން ރައްކާތެރިވުމަށް ފިޔަވަޅުތައް ހަރުކަށިކޮށްފައިވާއިރު، ސްކޫލްތަކުގައި އޮންލައިންކޮށް ކިޔަވައިދޭން ނިންމައި، އިރުއޮއްސި ހައެއްގެ ފަހުން އެއްގަމު އުޅަނދުފަހަރު ދުއްވުން މަނާކޮށް ވަނީ އުސޫލު ކަނޑައަޅާފައެވެ.
