ލަންދޫ ބަނދަރުގެ އެއްގަމުތޮށިލުމުގެ މަސައްކަތް އަންނަ ހަފުތާގެތެރޭގައި ފެށޭނެ: އެމްޓީސީސީ
12 މާރިޗު 2021 | ހުކުރު 07:33ލަންދޫ ބަނދަރު ތަރައްގީކުރުމުގެ މަޝްރޫއުގެ މަސައްކަތްތައް ބާރު ސްޕީޑްގައި ކުރިއަށްދޭ
ލަންދޫ ބަނދަރުގެ އެއްގަމު ތޮއްޓަށް ބޭނުންވާ ކޮންކުރީޓް ބުލޮކްތައް،
ނ. ލަންދޫ ބަނދަރުގެ އެއްގަމުތޮށިލުމުގެ މަސައްކަތް އަންނަ ހަފުތާގެ ތެރޭގައި ފެށޭނެ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ން ބުނެފިއެވެ.
އެމްޓީސީސީން ބުނީ ލަންދޫ ބަނދަރު ތަރައްގީކުރުމުގެ މަޝްރޫއުގެ މަސައްކަތްތައް ބާރު ސްޕީޑްގައި ކުރިއަށްދާ ކަމަށެވެ. އެގޮތުން އެއްގަމުތޮށިލުމުގެ މަސައްކަތް މިއަންނަ ހަފުތާގެ ތެރޭގައި ފެށޭނެ ކަމަށާއި، އެއްގަމުތޮށިލުމަށް ބޭނުންވާ ކޮންކްރީޓް ބްލޮކްތަކާއެކު ބަރޖް އެރަށަށް ފުރާފައިވާ ކަމަށް އެމްޓީސީސީން ބުނެއެވެ.
ޑިޒައިން އެންޑް ބިލްޑް އުސޫލުން ކުރިއަށް ގެންދިއުމަށް ހަމަޖެހިފައިވާ މި މަޝްރޫޢުގެ ދަށުން ބޮޑު ހިލަ ބޭނުންކޮށްގެން 401 މީޓަރ ބޭރު ތޮށި ހެދުމާއި، 256 މީޓަރ އެއްގަމު ތޮށި ހެދުމާއި، 13 މޫރިން ބުލޮކް ލުމާއި، 13 ބަނދަރު ބައްތި ހަރުކުރުމާއި، 2 ނެރުބައްތި ހަރުކުރުމާއި، 1280 ސްކެއަރ މީޓަރ ޕޭވްމަންޓެއް ހެދުމާއި، 23000 ކިއުބިކް މީޓަރ ބަނދަރު ފުންކުރުމާއި، 2000 ކިއުބިކް މީޓަރ ނެރުފުން ކުރުމާއި، 60 މީޓަރުގެ ރިވެޓްމަންޓް ޖެހުމާއި އަދި 65 މީޓަރުގެ ގުރޯއިން ޖެހުން ވެސް ހިމެނެއެވެ.
ލަންދޫ ބަނދަރު ތަރައްގީކުރުމުގެ މަޝްރޫއު އެމްޓީސީސީއާ ހަވާލުކުރީ 32.4 މިލިއަން ރުފިޔާއަށެވެ. އަދި މި މަޝްރޫއުގެ މަސައްކަތް 420 ދުވަހުގެ ތެރޭގައި ނިންމަން ޖެހެއެވެ.
