އަންނަ ހަފްތާގައި ރައީސް ގަތަރު އަދި ބަންގްލަދޭޝަށް ވަޑައިގަންނަވަނީ
10 މާރިޗު 2021 | ބުދަ 16:32ރައީސް ގަތަރަށް ވަޑައިގަންނަވަނީ މި މަހު 14ގައި
ރައީސުލްޖުމްހޫރިއްޔާ ރަސްމީ ދަތުރުފުޅެއްގައި ޔޫ.އޭ.އީއަށް ފުރާވަޑައިގަތުން
އަންނަ ހަފްތާ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ރަސްމީ ދަތުރުފުޅެއްގައި ގަތަރާއި ބަންގްލަދޭޝަށް ވަޑައިގަންނަވާނެކަމަށް ރައީސް އޮފީހުން ބުނެފިއެވެ.
ރައީސް އޮފީހުގެ ތަރުޖަމާން މަބްރޫކް އަޒީޒް ކުރެއްވި ޓުވީޓެއްގައި ވިދާޅުވީ އަންނަ އާދިއްތަ ދުވަހު ރައީސް ގަތަރަށް ފުރާވަޑައިގަންނަވާނެ ކަމަށެވެ. ރައީސްގެ އެ ދަތުރުފުޅަކީ ދެ ގައުމުގެ ހާރިޖީގުޅުން އަލުން އިޔާދަކުރެއްވުމާ ގުޅޭ މަޝްވަރާތައް ކުރެއްވުމަށް ކުރައްވާ ދަތުރުފުޅެއްކަމަށް ބުނެފައިވެއެވެ.
މީގެ އިތުރަށް އަންނަ ބުދަ ދުވަހު ރައީސް ބަންގްލަދޭޝަށް ފުރާވަޑައިގަންނަވާނެކަމަށާއި އެ ދަތުރުފުޅަކީ އެ ގައުމުގެ ފުރަތަމަ ރައީސް ޝައިހު މުޖީބުއްރަހްމާނަށް 100 އަހަރު ފުރުން ފާހަގަކުރުމަށް ބާއްވާ ރަސްމިޔާތުގައި ބައިވެރިވެވަޑައިގަންނަވަން ކުރައްވާ ދަތުރުފުޅެއްކަމަށްވެސް ބުނެފައިވެއެވެ.
ރައީސް ސޯލިހު މި އަންނަ ހަފްތާގައި ދެ ގައުމަކަށް ދަތުރުކުރައްވަން ނިންމާފައިވާއިރު މިއީ ކޮވިޑް-19އާ ގުޅިގެން ރާއްޖޭގެ ބޯޑަރު ބަންދުކުރުމަށް ފަހު އަލުން ހުޅުވާލި ފަހުން އެމަނިކުފާނު ކުރައްވާ ދެވަނަ ދަތުރުފުޅެވެ. ބޯޑަރު ހުޅުވިފަހުން އެމަނިކުފާނު ވަނީ ނުރަސްމީ ދަތުރުފުޅެއްގައި ދެ ދުވަހަށް ދުބާއީއަށް ވަޑައިގެންފައެވެ.
ރައީސް ސޯލިހު އަންނަ ބުދަ ދުވަހު ބަންގްލަދޭޝަށް ވަޑައިގަންނަވާއިރު މިދިޔަ ހޯމަ ދުވަހު ފޮރިން މިނިސްޓަރ އަބްދުﷲ ޝާހިދުވެސް ވަނީ އެގައުމަށް ފުރާވަޑައިގެންފައެވެ. ދެ ދުވަހުގެ އެ ދަތުރުފުޅަކީ ބަންގްލަދޭޝްގެ މިނިސްޓަރ އޮފް ފޮރިން އެފެއަރޒް ޑރ. އޭ. ކޭ. އަބްދުލް މޮމެންގެ ދަޢުވަތަކަށް ކުރައްވާ ރަސްމީ ދަތުރުފުޅެކެވެ.
