ރަށްރަށުގެ ބޯހިޔާވަހިކަމުގެ މަޝްރޫޢަށް 1.5 ބިލިއަން ރުފިޔާ، ގެހެދުމަށް 7 ލައްކަ ރުފިޔާއާ ހަމައަށް ލޯނު ދޫކުރަނީ

ރަށްރަށަށް ޚާއްސަކޮށް ބޯހިޔާވަހިކަމުގެ މަޝްރޫޢު ކުރިޔަށް ގެންދިޔުމަށް 1.5 ބިލިއަން ރުފިޔާ ބަޖެޓްކޮށްގެން ކުރިޔަށް ގެންދިޔުމަށް ހަމަޖެހިފައިވާކަމަށް ހައުސިންގ މިނިސްޓަރ މުހައްމަދު އަސްލަމް ވިދާޅުވެއްޖެއެވެ.

މިނިސްޓަރ މިހެން ވިދާޅުވީ ބުދަ ދުވަހު ކުރިޔަށްދިޔަ ރައްޔިތުންގެ މަޖިލީހުގެ ޖަލްސާގައި ރަށްރަށުގައި ބޯހިޔާވަހިކަން ކުރިޔަށް ގެންދިޔުމުގެ މަޝްރޫޢު ކުރިޔަށް ގެންދިޔުމަށް ސަރުކާރުން ގެންގުޅޭ ޕްލޭނާއި ނުހެދި ހުރި ގެތައް ހެދުމަށް ސަރުކާރުން އެއްވެސް ޕްރޮގްރާމެއް ކުރިޔަށް ގެންދާނެތޯ މެމްބަރަކު އެއްސެވި ސުވާލަށް ޖަވާބު ދެއްވަމުންނެވެ.

މިނިސްޓަރ ވިދާޅުވީ ކޮންޓްރެކްޓަރުން ގެނެސްގެން ލޯނު ނަގައިގެން ފައިނޭންސް ހޯދައިގެން ރަށްރަށުގައި ގެ އެޅުމުން އެކަންކުރުމަށް ދިޔަ ޚަރަދުގެ ހަމައަގު ލިބެމުންނުދާ ކަމަށެވެ.

މިމަޝްރޫޢުގެ ދަށުން ކުރިޔަށް ގެންދާނީ ރޯހައުސްއާއި ހައުސިންގ ފްލެޓްތައްކަމަށް މިނިސްޓަރ ވަނީ މީގެކުރިން ވިދާޅުވެފައެވެ. އަދި އެމަޝްރޫޢު ކުރިޔަށް ގެންދިޔުމަށް ވާންޖެހޭ ތައްޔާރީތައްވަމުން އަންނަކަމަށްވެސް މިނިސްޓަރ ވަނީ ވިދާޅުވެފައެވެ.

ރަށްރަށުގައި ހަދަން ފަށާފައި ނުހެދި ހުރި ގެތަކާއި ގެ އެޅުމަށް ވަކި ލޯން ސްކީމެއް ކުރިޔަށް ގެންދިޔުމަށް ނިންމަވާފައިވާކަމަށް ޖަލްސާގައި ވާހަކަދައްކަވަމުން މިނިސްޓަރ ވިދާޅުވިއެވެ. އެގޮތުން ހައުސިންގ ޑިވެލޮޕްމަންޓް ފައިނޭންސް ކޯޕަރޭޝަން (އެޗްޑީއެފްސީ)ން 7 ލައްކަ ރުފިޔާއާ ހަމައަށް މިކަމަށް ލޯނު ދޫކުރާނެކަމަށް މިނިސްޓަރ ވިދާޅުވިއެވެ.

ސަރުކާރުން އަންނަނީ މި ދައުރު ނިމެންވާއިރަށް ބޯހިޔާވަހިކަމުގެ މަޝްރޫޢަށް ހައްލެއް ހޯދައިދިނުމަށް އެކި މަޝްރޫޢުތައް ހިންގާނެކަން ހާމަކުރައްވަމުންނެވެ. އެގޮތުން މާލޭގެ ރަށްވެހިންނަށް ބޯހިޔާވަހިކަން ހޯދައިދިނުމަށް ބިމެއް ހިއްކާނެކަމަށް ސަރުކާރުން ވަނީ ހާމަކޮށްފައެވެ.

ބައެއް ހައުސިންގ ޕްރޮޖެކްޓްތައް ކުރިޔަށް ގެންދިޔުމަށް މިހާރު ވަނީ ސޮއިކޮށްފައެވެ.