ދެން އަޅާ ފްލެޓްތައް ހުންނާނީ އެއް ތައްގަނޑަކަށް، އެއް އަގެއްގައި، އެއް ސައިޒަކަށް ނޫން- މިނިސްޓަރ
މިނިސްޓަރ އަސްލަމް ވިދާޅުވީ ގޯތި ގެދޮރުގައި މީހުން އުޅޭ ޖާގައިގެ ތަނަވަސްކަން ބިނާ ވެގެން ވަނީ އެބަޔަކަށް ލިބޭ އާމްދަނީގެ މައްޗަށް ކަމަށް
މިނިސްޓަރ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ މުހައްމަދު އަސްލަމް
ދެން އަޅާ ފްލެޓްތައް ހުންނާނީ އެއް ތަށްގަނޑަކަށް، އެއް އަގެއްގައި، އެއް ސައިޒަކަށް ނޫން ކަމަށް މިނިސްޓަރ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ މުހައްމަދު އަސްލަމް ވިދާޅުވެއްޖެއެވެ.
ބުދަ ދުވަހުގެ ރައްޔިތުންގެ މަޖިލީހުގެ ޖަލްސާގައި ވާހަކަ ދައްކަވަމުން މިނިސްޓަރ އަސްލަމް ވިދާޅުވީ ގޯތި ގެދޮރުގައި މީހުން އުޅޭ ޖާގައިގެ ތަނަވަސްކަން ބިނާ ވެގެން ވަނީ އެބަޔަކަށް ލިބޭ އާމްދަނީގެ މައްޗަށް ކަމަށެވެ. އެގޮތުން މާލޭގެ އާބާދީވެސް ހިމަނައިގެން ހަތަރު ކެޓަގަރީ އަކަށް ގިންތި ކޮށްލެވޭ ކަމަށް ވިދާޅުވެ މިނިސްޓަރ ވިދާޅުވީ ފުރަތަމަ ކެޓަގަރީއަކި ފަގީރުންގެ ގޮތުގައި ބަލާ މީހުން ކަމަށެވެ.
އެ އާއިލާތަކަށް ބޯހިޔާވަހިކަން ފޯރުކޮށްދޭން ޖެހޭނީ ދައުލަތުން ފޯރުކޮށްދޭ ހައުސިންގގެ ގޮތުގައި ކަމަށް ވިދާޅުވެ މިނިސްޓަރ ވިދާޅުވީ އެކަމަށް މި ސަރުކާރުގެ ސިޔާސަތުގައި އޮތީ ކައުންސިލް ޕްރޮޕަޓީތަކުގައި ހުންނަ ކައުންސިލް ހައުސިންގތައް ދިނުން ކަމަށެވެ. އެގޮތުން މާލޭގައި ހައުސިންގއަށް ބޭނުންވާ މީހުންގެ ތެރެއިން 3000 މީހުންނަކީ އާމްދަނީއަށް ބަލާއިރު ކައުންސިލް ހައުސިންގއަށް ފެތޭ މީހުން ކަމަށް މިނިސްޓަރ ހާމަ ކުރެއްވިއެވެ.
މިނިސްޓަރ ވިދާޅުވީ ދެވަނަ ކެޓަގަރީގެ މީހުންނަކީ 17،000އާއި 32،000 ދެމެދުގެ އާމްދަނީ ލިބޭ ފަރާތްތައް ކަމަށެވެ. އަދި އެއީ އެ އާމްދަނީ އަކީ މަހުން މަހަށް ހައުސިންގއަށް އެ ބޭނުންވާ ހަމަ އަގު ދެއްކޭނެ އެހެން ނަމަވެސް ބޭންކުގެ ލޯން ފެސިލީޓީ ކްރައިޓީރިއާއިން ލޯނު ނުލިބޭ ފަރާތްތައް ކަމަށް މިނިސްޓަރ ވިދާޅުވިއެވެ. އިތުރަށް ވާހަކަ ދައްކަވަމުން މިނިސްޓަރ ވިދާޅުވީ އެ ފަރާތްތަކަށް މަހުން މަހަށް ދައްކާ ގޮތަށް ދިގު މުއްދަތުން ހަލާސްކުރާ ގޮތަށް ފްލެޓް ދިނުމަށް ނިންމާފައިވާ ކަމަށެވެ. މި ކެޓަގަރީއަށް ފެތޭ 5،700 އާއިލާއެއް އެބަތިބި ކަމަށް ސަރުކާރުން ކުރި ސަރވޭއަކުން ދައްކާފައިވާ ކަމަށް މިނިސްޓަރ ވިދާޅުވިއެވެ.
ތިން ވަނަ ކެޓަގަރީގެ އާއިލާތަކަކީ 32،000އާއި 61،000 ދެމެދުގެ ޖުމްލަ އާމްދަނީ ލިބޭ އާއިލާތައް ކަމަށެވެ. މި ކެޓަގަރީގައި 5،500 އާއިލާއެއް ހިމެނޭ ކަމަށް ވިދާޅުވެ މިނިސްޓަރ ވިދާޅުވީ ބާކީ ތިބި ތިންހާސް އެއްސަތޭކަ މީހުންނަކީ ހައި އިންކަމް ކެޓަގަރީގެ މީހުން ކަމަށެވެ. މިނިސްޓަރ ވިދާޅުވީ ޑްއިރެކްޓް އިންޓަރވެންޝަނެއް އެ ކެޓަގަރީގައި ހެދުމުގެ ސިޔާސަތެއް ނެތް ކަމަށެވެ. އަދި އެއީ މާކެޓް ޑިމާންޑްގައި ހިނގާނެ ކަމެއް ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މިހުރިހާ ކަމަކަށް ބަލައި ކައުންސިލް ކެޓަގަރީގައި 3000، އެފޯޑަބަލް ކެޓަގަރީގައި 5،700 އަދި މިޑްލް އިންކަމްގައި 5،500 ހައުސިންގ ޔުނިޓް އެޅުމަށް އަމާޒު ހިފާފައިވާ ކަމަށެވެ. އަދި މިހާރު ހިނގަމުންދާ 11 ޕްރޮޖެކްޓްގައި މި ތިން ކެޓަގަރީއަށް ބަހާލައިގެން ފްލެޓްތައް އެޅުމުގެ މަސައްކަތް ކުރިއަށް ދާކަން މިނިސްޓަރ ފާހަގަ ކުރެއްވިއެވެ. ވުމާއެކު ދެން އެޅިގެންދާނީ އެއް ތައްގަނޑަކަށް، އެއް އަގެއްގައި، އެއް ސައިޒަކަށް ހުންނަ ހައުސިންގ ޔުނިޓްތަކެއް ނޫން ކަމަށް މިނިސްޓަރ ވިދާޅުވިއެވެ.
