މޯލްޑިވް ގޭސް ވަގުތީގޮތުން ހިންގުމާ ހަވާލުވެހުންނެވި އެކުންފުނީގެ ޑެޕިއުޓީ މެނޭޖިން ޑިރެކްޓަރ އިކްރާމް ޢަލީ މަޤާމުން އިސްތިއުފާ ދެއްވައިފިއެވެ.

މޯލްޑިވްސް ގޭހަކީ އެސްޓީއޯގެ ސަބްސިޑަރީ ކުންފުންޏަކަށްވާއިރު އެސްޓީއޯ އިން ބުނީ އިކްރާމް އިސްތިއުފާ ދެއްވާފައިވަނީ އަމިއްލަ ސަބަބުތަކާ ގުޅިގެން ކަމަށެވެ.

އިކްރާމް އިސްތިއުފާ ދެއްވާފައި މިވަނީ އޭނާގެ މައްޗަށް އެތަނުގެ މުވައްޒަފަކަށް ޖިންސީ ގޯނާ ކުރުމާއި، އަދި ކޮރަޕްޝަންގެ ތުހުމަތުތަކެއް ކުރެވިފައި ވަނިކޮށެވެ. އިކްރާމްގެ މައްޗަށް ކުރާ ކޮރަޕްޝަންގެ ތުހުމަތަކީ ކޯވިޑާ ގުޅިގެން ރާއްޖެއަށް އޮކްސިޖަން ސިލިންޑަރު ގެނައުމަށް މޯލްޑިވް ގޭހުން ހިންގިކަމަށް ތުހުމަތުކުރާ ކޮރަޕްޝަންގެ މައްސަލައެވެ. ކޮވިޑާ ގުޅިގެން 4،128 އޮކްސިޖަން ސިލިންޑަރު ގެނައުމަށް ހިންގި ޚިޔާނާތް 16 މިލިއަން ރުފިޔާއަށް އަރައެވެ.

އިކްރާމް މިއަދު އިސްތިއުފާ ދެއްވިއިރު، މޯލްޑިވް ގޭސްގެ މެނޭޖިން ޑިރެކްޓަރ ޝަޒައިލް ޝިޔާމް ވެސް ހުންނެނީ ކޮރަޕްޝަންގެ ތުހަމަތުގައި ސަސްޕެންޑް ކޮށްފައެވެ. ޝަޒައިލްގެ މައްޗަށް ތުހުމަތު ކުރެވޭ ރިޝްވަތުގެ މައްސަލަ ނިންމުމަށްފަހު، ރިޕޯޓް ރައީސުލްޖުމްހޫރިއްޔާގެ އޮފީހަށާއި ރައްޔިތުންގެ މަޖިލީހަށް ވަނީ ފޮނުވާފައެވެ.

ކުރީގެ ރައީސް މައުމޫން އަބްދުލް ގައްޔޫމްގެ މޯލްޑިވްސް ރިފޯރމް މޫވްމަންޓް (އެމްއާރްއެމް) ގެ ސްލޮޓެއްގައި މޯލްޑިވް ގޭހުގެ އެމްޑީގެ މަގާމަށް ވަޑައިގެންނެވި ޝަޒައިލް ވަނީ، ކުރީގެ ރައީސް އަބްދުﷲ ޔާމިންގެ ސަރުކާރުގެ ފިޝަރީޒް މިނިސްޓްރީއާއި ޓޫރިޒަމް މިނިސްޓްރީގެ ޑެޕިއުޓީ މިނިސްޓަރގެ މަގާމު ފުރުއްވާފައެވެ.

މިދިޔަ ސަރުކާރުގައި ވެސް މޯލްޑިވް ގޭސް ކުންފުނިން ހިންގި ކޮރަޕްޝަންގެ ބޮޑެތި މައްސަލަތަކެއް ވަނީ ފެންމަތިވެފައެވެ.