އަމާޒަށްވުރެ. ވެސް އަވަހަށް 37 ދުވަހުގެ ތެރޭގައި ލ. ގަން-މުކުރިމަގުގެ ބަނދަރުގެ މަސައްކަތް ނިންމާލައިފި

މަސައްކަތް ނިންމަން އަމާޒު ހިފި ދުވަހަށްވުރެ އަވަހަށް ލ. ގަން-މުކުރިމަގުގެ ބަނދަރުގެ މަސައްކަތް ނިންމާލައިފިއެވެ.

ލ. ގަން-މުކުރިމަގު ބަނދަރު އަލުން ފުންކުރުމުގެ މަޝްރޫޢުގެ މަސައްކަތް ހަވާލުކުރި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ކުރި ޓުވީޓެއްގައިވަނީ، 8 މާރޗް 2021 ވަނަ ދުވަހު ނިންމާލާފައިވާކަން ހާމަކޮށްފައެވެ. އެމްޓީސީސީއިން ލ. ގަން-މުކުރިމަގުގެ ބަނދަރު އަލުން ފުންކުރުމުގެ މަޝްރޫއުގެ އަމަލީ މަސައްކަތް ފެށީ މިއަހަރުގެ ޖަނަވަރީމަހުގެ 30 ވަނަ ދުވަހުއެވެ. އެހެންކަމުން އެމްޓީސީސީއިން މި މަސައްކަތް ނިންމާލާފައިމިވަނީ މަސައްކަތް ފެށިތާ 37 ދުވަސްގެ ތެރޭގައެވެ.

އެމްޓީސީސީއިން ވަނީ ލ. ގަމު މުކުރިމަގު އަވަށުގެ ބަނދަރު ފުންކުރުމުގެ މަޝްރޫޢުގެ ދަށުން ނެރުގެ 5454 ކިއުބިކް މީޓަރުގެ ސަރަޙައްދެއް ފުންކޮށްފައެވެ. އަދި ފަޅުން 1938 ކިއުބިކް މީޓަރުގެ ސަރަޙައްދެއް ފުންކުރުމުގެ މަސައްކަތް ވެސް ވަނީކޮށްފައެވެ.

މުކުރިމަގު ބަނދަރު ފުންކުރުމުގެ މަޝްރޫޢު ފެށުމުގެ ކުރިން އެމްޓީސީސީން ވަނީ އެކަމަށް ބޭނުންވާ ސަރވޭގެ މަސައްކަތް 2019 ވަނަ އަހަރުގެ ފަހުކޮޅު ކުރިޔަށް ގެންގޮސްފައެވެ. މުކުރިމަގު އަވަށުގެ ބަނދަރު ފުންކުރުމުގެ މަސައްކަތް ފަށަފައިވަނީ، ބަނދަރު ތިލަވުމުގެ ސަބަބުން ވަރަށް ބޮޑެތި ދަތިތަކާއި ކުރިމަތިވެފައިވާ ދަނޑިވަޅެއްގައެވެ. އެގޮތުން ނެރު ބޭނުންކުރުމުގައި ދަތިތައް ކުރިމަތިވިއިރު، މުދާ ހިފައިގެންދާ ބޯޓުތަކާއި ބޮޑެތި ބޯޓުތައް ނެރަށް ވަނުމަށް ދަތިތަކާއި ކުރިމަތިވިއެވެ. އަދި ވިއްސާރަވެ މޫސުން ގޯސްވާ ދުވަސްތަކުގައި ބޯޓުތައް އަރިއަޅާލުމުގެ ހާދިސާތައްވެސް ވަނީ ހިނގާފައެވެ.

މުކުރިމަގު ބަނދަރު ފުންކުރުމުގެ މަޝްރޫޢަކީ ދައުލަތުގެ ބަޖެޓުން 89.8 މިލއަން ރުފިޔާ ޚަރަދުކޮށްގެން ހިންގާ މަޝްރޫޢެކެވެ. އަދި މި މަސައްކަތް އެމްޓީސީސީއާ ހަވާލުކޮށްފައިވަނީ 45 ދުވަހުގެ ތެރޭގައި ނިންމުމަށެވެ. އާބާދީގައި 4 ހާހަށްވުރެ ގިނަ ރައްޔިތުން ދިރިއުޅެމުންދާ ލ. އަތޮޅު ގަމަކީ ރާއްޖޭގެ އެންމެ ބޮޑު ރަށެވެ.