އެސްޓީއޯ ހަވަރު ވުމެންސް ހޭންޑްބޯޅަ މުބާރާތުގެ ޗެމްޕިއަންކަން ހޭޔަންބޯއަށް

ރާއްޖޭގައި ބޭއްވުނު އެންމެ އަގުބޮޑު އަންހެނުންގެ ހޭންޑްބޯޅަ މުބާރާތް ކަމަށްވާ "އެސްޓީއޯ ހަވަރު ވުމެންސް ހޭންޑްބޯޅަ މުބާރާތް 2021" ގެ ޗެމްޕިއަންކަން ހޭޔަންބޯއިން ހޯދައިފިއެވެ.

ތިނަދޫ އާރު އަވަށު ދަނޑުގައި ކުރިއަށްދިޔަ މި މުބާރާތަކީ ހަވަރު ސްޕޯޓްސްއިން އިންތިޒާމުކޮށްގެން ކުރިއަށްގެންދިޔަ މުބާރާތެކެވެ. 10 ޓީމު ވާދަކުރި މި މުބާރާތުގެ ޗެމްޕިއަންކަން ހޭޔަންބޯއިން ހޯދީ ހޯމަ ދުވަހުގެރޭ ކުޅުނު ފައިނަލް މެޗުގައި 15-9 ގެ ނަތީޖާއަކުން ހޯބަހަކުން ބަލިކޮށްގެންނެވެ.

މި މެޗުގައި ހޭޔަންބޯގެ ލަނޑުތައް ކާމިޔާބުކޮށްދިނީ ޝަހުނާ މުޙައްމަދު، ޖައިސްވަލް ސްވަރިނިމާ، ކުމާރީ އާރްތީ، އާމިނަތް ޒައިނާ، މާޒިނާ އަޙްމަދު އަދި ޚަދީޖާ ރިހުމާއެވެ. އަދި މެޗުގައި ހޯބަހަކުންގެ ލަނޑުތައް ކާމިޔާބުކޮށްދިނީ ފާތިމަތު ފައިރޫޒާ އާދަމް، ލައުހާ ހުސައިން، ފާތިމަތު އަރުޝާ، ޒުލައިހާ އިބްރާހީމް އަދި ޝިބާހަތު ހަނީފެވެ.

މި މުބާރާތުގެ ޗެމްޕިއަންކަން ހޭޔަންބޯއިން ހޯދިއިރު، މުބާރާތުގައި ކުޅުނު އެއްވެސް މެޗަކުން އެ ޓީމު ބަލިވެފައެއް ނުވެއެވެ. މުބާރާތުގެ ޗެމްޕިއަން ޓީމު ކަމަށްވާ ހޭޔަންބޯއަށް 20،000 ރުފިޔާގެ ފައިސާގެ އިނާމެއް ދީފައިވާއިރު، ރަނަރަޕް ޓީމު ކަމަށްވާ ހޯބަހަކުންނަށް 10،000 ރުފިޔާގެ ފައިސާގެ އިނާމެއް ވަނީ ދީފައެވެ.