ރައްޔިތުންގެ މަޖިލީހުގެ ރައީސް، މުހައްމަދު ނަޝީދު، ޖަލުތަކުގެ ގައިދީންނަށް އަދަބު ލުއި ކޮށްދިނުމާއި މާފުކޮށްދިނުމާ ގުޅޭ މައްސަލަ ދިރާސާކުރުމަށް ޖުޑީޝަރީ ކޮމިޓީއަށް ފޮނުވައިފިއެވެ.
ރައީސް ނަޝީދު މި މައްސަލަ ކޮމިޓީއަށް ފޮނުވީ ރިޔާސަތުން އަންގާ އެންގުންތައް އިއްވަމުންނެވެ. އެގޮތުން މަޖިލީހަށް އެންމެ ގިނައިން ސިޓީ ފޮނުވާ އެއް ބަޔަކީ ޖަލުތަކުގައި ތިބޭ ގައިދީން ކަމަށް ވިދާޅުވިއެވެ. ރައީސް ނަޝީދު ވިދާޅުވީ 9 ނޮވެމްބަރު 2020ގައި ޖުޑީޝަރީ ކޮމިޓީން މާފު ދިނުމާއި އަދަބު ލުއި ކޮށްދިނުމަށް އެދި އިލްތިމާސް ހުށަހަޅާ ފޯމު ހުށަހެޅުމަށްފަހު ޖަވާބެއް ނުލިބި ލަސްވަމުން ދާކަން ފާހަގަކޮށް ކޮމިޓީއަށް ފޮނުވާފައިވާ ސިޓީތައް ކޮމިޓީގެ އަމިއްލަ އިސްނެގުމުގެ މަތިން ދިރާސާކޮށް ނިންމި ރިޕޯޓެއް މަޖިލީހުގެ ތަޅުމަށް ފޮނުވި ކަމަށެވެ.
އަދި މަޖިލީހުގެ ތަޅުމުން އެ ރިޕޯޓު ފާސްކޮށްފައިވާ ކަމަށާއި ރިޕޯޓުގައި ކޮމިޓީން ފާހަގަކޮށްފައިވާ ކަންކަމާއި ހުށަހަޅާފައިވާ ކަންކަން ސިޓީއަކުން ކަމާގުޅޭ އިދާރާތަކުގައި އަދި ރައީސުލްޖުމްހޫރިއްޔާގެ އޮފީހުގައި ދެންނެވިފައި ވީނަމަވެސް މި ކަންކަމަށް އަމަލީ ސިފައެއް އަންނަމުން ނުދާކަމަށް މަޖިލީހުގެ ރައީސް ވިދާޅުވިއެވެ. މީގެ އިތުރުން މިކަމާ ގުޅިގެން އެތައް ބައެއް ކަންބޮޑުވުން ފާޅުކުރަމުން ދާ ކަމަށް ރައީސް ނަޝީދު ވިދާޅުވިއެވެ.
