ބުދަ ދުވަހު، ނޫސްވެރިންނާ ބައްދަލުކުރައްވާނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހް ވިދާޅުވެއްޖެއެވެ.
ރައީސް މިކަން ހާމަކުރައްވާފައިވަނީ އެމްޑީޕީގެ އޮފީހުގައި ބޭއްވި "ރަށްވެހި ފަތިސް" ކެމްޕޭން އިވެންޓްގައި ބައިވެރިވެވަޑައިގަތުމަށްފަހު ނުކުމެވަޑައިގެން ނޫސްވެރިންތަކެއް ކުރި ސުވާލުތަކަށް ޖަވާބުދެއްވަމުންނެވެ. ރައީސް ވަނީ ތައްޔާރުވެވަޑައިގަނެވިއްޖެނަމަ ބައްދަލުކުރައްވާނެ ކަމުގެ ޔަގީންކަން ނޫސްވެރިންނަށް ދެއްވާފައެވެ.
ރައީސް މިހާރު ގެންދަވަނީ ކޮންމެ ރެޔަކު ކަހަލަ ގޮތަކަށް "ރަށްވެހި ފަތިސް" ކެމްޕޭން އިވެންޓްގައި ބައިވެރިވެވަޑައިގެން އެމްޑީޕީގެ ކެންޑިޑޭޓުންނާއި ކެމްޕެއިން ޓީމުތަކުން ކުރައްވާ ސުވާލުތަކަށް ޖަވާބު ދެއްވަމުންނެވެ. އެގޮތުން މިހަރަކާތްތަކުގައި ވާހަކަ ދައްކަވަމުން އެމަނިކުފާނު ވިދާޅުވެފައިވަނީ ލާމަރުކަޒުވުން ނޫން ގޮތެއް ނެތް ކަމަށާއި، އެމްޑީޕީން އެ ބައްޓަމަށް ފެތިނިމިފައިވާ ކަމަށެވެ. ރާއްޖެ އުފެދި އެކުލެވިފައި މިއޮތީ ލާމަރުކަޒީ ސިފަޔަށް ކަމަށާއި، ރާއްޖޭގައި މީހުން ވަޒަންވެރިވެ އާބާދުވެފައިވަނީ ލާމަރުކަޒީ ސިފައަށް ކަމަށް ވެސް ރައީސް ވިދާޅުވިއެވެ. ދިވެހީންގެ ޠަބީއަތާ އެއް ބައްޓަމަށް ދިވެހީންގެ ކަންކަން ލާމަރުކަޒީ ނިޒާމަކުން މެނުވީ ނުހިންގޭނެ ކަމަށް ރައީސް ޞާލިހު ވިދާޅުވިއެވެ.
ރައީސް ގެންދަވަނީ ދޭތެރެ ދޭތެރެއިން ނޫސްވެރިންނާ ބައްދަލު ކުރައްވައި ސަރުކާރުން ކުރަމުންގެންދާ އެކި ކަންކަމުގެ އެންމެ ފަހުގެ މައުލޫމާތު އަބަދު ވެސް ހިއްސާ ކުރައްވަމުންނެވެ. އެހެންނަމަވެސް ކޮވިޑްގެ މި ހާލަތާ ގުޅިގެން، ރައީސް ނޫސްވެރިންނާ ބައްދަލު ނުކުރައްވާތާ މިހާރު ވަނީ ދުވަސްކޮޅެއް ވެފައެވެ.
