ރ. ދުވާފަރު ބިންހިއްކުމުގެ މަސައްކަތް ފެށުމަށްޓަކައި މަހާ ޖައްރާފު އެ ރަށުގައި ބަނދަރުކޮށްފިއެވެ.

ދުވާފަރު ބިންހިއްކުމުގެ މަސައްކަތް ހަވާލުކޮށްފައިވާ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގް ކޮމްޕެނީ (އެމްޓީސީސީ) އިން ވަނީ ދުވާފަރު ބިން ހިއްކުމުގެ ޢަމަލީ މަސައްކަތް ވަރަށް އަވަހަށް ފެށާނެކަމަށް ބުނެފައެވެ. ބިންހިއްކުމުގެ މަސައްކަތް ކުރިއަށް ގެންދިއުމަށް ބޭނުންވާ ސާރވޭ އާއި، ޑިޒައިން ކުރުމުގެ މަސައްކަތުގެ އިތުރުން އެންވަޔަރްމަންޓަލް އިމްޕެކްޓް އެސެސްމަންޓް (އީއައިއޭ) ރިޕޯޓް މިހާރު ވަނީ ހަދާފައެވެ.

ރައީސް އިބްރާހިމް މުހައްމަދު ޞާލިޙްގެ ރިޔާސީ ވައުދުތަކުގެ ތެރޭގައި ރަށްރަށަށް ދިމާވެފައިވާ ބިމުގެ ދަތިކަން ހައްލުކޮށްދެއްވުން ހިމެނެއެވެ. އަދި އެމަނިކުފާނު ވަނީ ބިން ނެތް ރަށްރަށުގެ ބިން ހިއްކައި، ރައްޔިތުންނަށް ބޭނުންވާ ބޯހިޔާވެހިކަމާއި އަސާސީ ޚިދުމަތްތައް ފޯރުކޮށްދެއްވާނެކަމަށް ވައުދުވެވަޑައިގެންފައެވެ. ރ. ދުވާފަރަކީ 2004 ވަނަ އަހަރު އެރި ސުނާމީ ކާރިސާގައި ކަނދޮޅުދޫ މީހުން އާބާދުވުމަށް އަލުން ތަރައްޤީކުރި ރަށެވެ. ރ.ކނދޮޅުދޫ މީހުންނަށް ދުވާފަރުގައި ދާއިމީ ބޯހިޔާވަހިކަމެއް ޤާއިމުކޮށް، އެރަށަށް މީހުން ބަދަލުކޮށްފައިވަނީ 2008ވަނަ އަހަރުގެ ޑިސެމްބަރުމަހުއެވެ. މީހުން އާބާދުކުރިތާ މިއަހަރަށް 13 އަހަރު ފުރޭއިރު ރ. ދުވާފަރުގެ މިހާރުގެ އާބާދީ 3000އަށް އަރައެވެ. އާބާދީ ބޮޑުވެ ދުވާފަރަށް މިހާރު ކުރިމަތިވެފައިވާ އެންމެބޮޑު ދަތިކަމަކީ ރަށުގެ ބިމުގެ ޖާގައިގެ ދަތިކަން ކަމުގައިވާއިރު، ބިން ފުރިފައިވުމުގެ ސަބަބުން ރަށުން އިތުރަށް ބޯހިޔާވަހިކަން ފޯރުކޮށްދިނުމަށްވަނީ ހުރަސްއެޅިފައެވެ. މީގެ އިތުރުން ރަށުގައި އާ ވިޔަފާރިތައް ފެށުމާއި، ތަރައްޤީގެ މަޝްރޫޢުތައް ކުރިއަށް ގެންދިއުމަށް ވަނީ ހުރަސް އެޅިފައެވެ.

މި މައްސަލަތައް ހައްލުކުރުކަމުގެ ގޮތުން ދުވާފަރުގައި ކުރިއަށް ގެންދިއުމަށް މިއަހަރުގެ ބަޖެޓުގައި 6 މަޝްރޫޢުއެއް ހިމަނާފައިވާއިރު، މިގެތެރެއިން ރަށުގެ ރައްޔިތުންގެ އުއްމީދާ އެންމެ ބޮޑަށް ގުޅިފައިވާ މަޝްރޫޢުއަކީ ރަށުގެ ބިން ހިއްކުމުގެ މަޝްރޫޢުގެ މަސައްކަތެވެ. މި މަސައްކަތަކީ މީގެކުރިން އެތައް ފަހަރެއްގެ މަތިން ބަޖެޓުކުރިނަމަވެސް، ޢަމަލީ މަސައްކަތް ނުފެށި އޮތް މަސައްކަތެކެވެ. އެހެންނަމަވެސް، މި ސަރުކާރުގެ ވަޢުދުތައް ފުއްދުމުގެ ސިޔާސަތުގެ ދަށުން ރައްޔިތުންގެ ކުންފުނި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގް ކޮމްޕެނީ (އެމްޓީސީސީ) އިން ވަނީ ދުވާފަރު ބިން ހިއްކުމުގެ ޢަމަލީ މަސައްކަތް ފެށުމަށް ބިންހިއްކުމަށް ގެންގުޅޭ ޑްރެޖަރ މަހާޖައްރާފު އެ ރަށުގައި ބަނދަރުކޮށްފައެވެ. މިއާއެކު އެ ރަށުގެ ރައްޔިތުންނަށް ފޮނި އުންމީދުތަކެއް އައު ވިއިރު މަހާ ޖައްރާފު ބަނަދަރުކުރުމަށް އައުމުން އެމްޓީސީސީގެ ޓީމުގެ މެމްބަރުންނަށް އެ ރަށު ރައްޔިތުން ވަނީ ހޫނު މަރުޙަބާއެއް ކިޔާފައެވެ.

އެމްޓީސީސީއިން މަޢުލޫމާތުދޭގޮތުގައި، ދުވާފަރު ފަޅުން 22.2 ހެކްޓަރުގެ ސަރަހައްދެއް ހިއްކުމަށްވަނީ ހަމަޖެހިފައެވެ. ދުވާފަރުގެ މިހާރުގެ ބިމުގެ ބޮޑުމިނަކީ 49.5 ހެކްޓަރެވެ. ބިން ހިއްކުމުގެ ޢަމަލީ މަސައްކަތް ފަށާފައިވާއިރު މި މަޝްރޫޢުގެ ތެރެއިން 423 މީޓަރުގެ ސަރަހައްދެއްގައި ބޮޑު ހިލައިގެ ރިވެޓްމެންޓް ޖެހުމުގެ މަސައްކަތް ކުރިއަށްދާނެއެވެ. އަދި 70 މީޓަރުގެ ސަރަޙައްދެއްގައި ބޭރު ތޮށި ލުމުގެ މަސައްކަތް ވެސް ކުރާނެއެވެ. ޖުމުލަ 54 މިލިއަންގެ މި މަޝްރޫޢު ހިންގުމަށް ދައުލަތުން މިއަހަރުގެ ބަޖެޓުގައި 32 މިލިއަން ރުފިޔާވަނީ ކަނޑައަޅާފައެވެ.