ޗެމްޕިއަންސް ލީގަށް ކޮލިފައިނުވި ނަމަވެސް، ކުޅުންތެރިން ކުލަބު ދޫކޮށްނުދާނެ: ކްލޮޕް

އަންނަ ސީޒަނުގެ ޔުއެފާ ޗެމްޕިއަންސް ލީގަށް ލިވަޕޫލް ކޮލިފައިނުވި ނަމަވެސް، މުހިންމު ކުޅުންތެރިން ކުލަބު ދޫކޮށްނުދާނެ ކަމަށް ލިވަޕޫލުގެ ކޯޗު ޔާގެން ކްލޮޕް ބުނެފިއެވެ.

އިނގިރޭސި ޕްރިމިއާ ލީގުގައި އެންމެ ފަހުން ކުޅުނު މެޗުން ޗެލްސީ އަތުން ބަލިވުމުން ލިވަޕޫލް ވަނީ ތާވަލުގެ ހަތްވަނައަށް ވެއްޓިފައެވެ. އެގޮތުން އެންމެ ފަހުގެ ޗެމްޕިއަން ލިވަޕޫލަށް ކުޅުނު 27 މެޗުން 43 ޕޮއިންޓް ލިބިފައިވާއިރު، ހަތަރުވަނައިގައި އޮތް ޗެލްސީއަށް ވަނީ 27 މެޗުން 47 ޕޮއިންޓް ލިބިފައެވެ.

މިކަމާ ގުޅިގެން ކްލޮޕް ބުނީ މިހާރު ހާލަތު އޮތްގޮތުން މި ފަހަރު ޕްރިމިއާ ލީގުގެ ގަދަ ހަތަރެއްގެ ޖާގަ ހޯދުމަކީ ލިވަޕޫލަށް އުނދަގޫ ޗެލެންޖަކަށްވާނެ ކަމަށާއި، މި ވަގުތު ތާވަލަށް ބަލާލިޔަސް ގަދަ ހަތަރެއްގެ ރޭސް ލިވަޕޫލަށް ވަރަށް ބޮޑަށް އުނދަގޫވާނެ ކަމަށެވެ. އެކަމަކު އެންމެ ފަހު މެޗާ ޖެހެންދެން މަސައްކަތްކުރުމަށް ލިވަޕޫލް އޮތީ ފުރިހަމައަށް ތައްޔާރަށް ކަމަށްވެސް ކްލޮޕް ވަނީ ބުނެފައެވެ.

އެކަމަކު އަންނަ ސީޒަނުގެ ޗެމްޕިއަންސް ލީގަށް ލިވަޕޫލް ކޮލިފައިނުވި ނަމަވެސް، ލިވަޕޫލުގެ މުހިންމު ކުޅުންތެރިން ކުލަބު ދޫކޮށްނުދާނެ ކަމުގެ ފުރިހަމަ ޔަގީންކަން އެބައޮތް ކަމަށްވެސް ކްލޮޕް ވަނީ ބުނެފައެވެ. ކްލޮޕް މިހެން ބުނި ނަމަވެސް، އެންމެ ފަހުން ޗެލްސީއާ ދެކޮޅަށް ކުޅުނު މެޗުގައި އެ ޓީމުގެ މިސްރުގެ ފޯވާޑް މުޙައްމަދު ސަލާހު ބަދަލުކުރުމުން އޭނާ ހިތްހަމަނުޖެހިފައިވާ ކަމަށް ރިޕޯޓުތައް ބުނެއެވެ. އަދި ސަލާހު ބަދަލުކުރި ވަގުތު އޭނާގެ އޭޖެންޓުވެސް ވަނީ އެފަދަ މާނައެއް ދޭހަވާ ޓްވީޓެއް ކޮށްފައެވެ. ނަމަވެސް ކްލޮޕް ބުނީ ޓީމު ބަލިވެފައި އޮންނަ ދަނޑިވަޅެއްގައި ކޮންމެ ކުޅުންތެރިއަކު ބަދަލުކުރި ނަމަވެސް، އެ ކުޅުންތެރިއަކު އެކަމާ އުފަލުން ނުހުންނާނެ ކަމަށާއި، ސަލާހު އެގޮތަށް ދުށް ނަމަވެސް، އެއީ މައްސަލައެއް ކަމަށް ނުދެކޭ ކަމަށެވެ.

މި ސީޒަނުގައި ލިވަޕޫލަށް ބޮޑެތި މައްސަލަތަކެއް ކުރިމަތިވެފައިވާއިރު، މި ފަހަރުގެ ގަދަ ހަތަރެއް ޖާގައެއް ލިވަޕޫލަށް ނުލިބިއްޖެނަމަ، ލިވަޕޫލުން ޓްރާންސްފާ ބާޒާރުގައި ގެންނަން ބޭނުންވާ ކުޅުންތެރިން ހޯދުމުގައި ދަތިތަކެއް ދިމާވާނެ ކަމަށް ރިޕޯޓުތައް ބުނެއެވެ. އެ ވާހަކަތަކާ ގުޅުވައިގެން ކްލޮޕް ބުނީ ޓްރާންސްފާ ބާޒާރުގައި ލިވަޕޫލުން ހޯދަން ބޭނުންވާ ކުޅުންތެރިން އަންނަނީ ހަމައެކަނި ޗެމްޕިއަންސް ލީގަށް ބަލައިގެން ކަމަށްވާނަމަ، އެ ކުޅުންތެރިއަކު ބޭނުން ނުވާ ކަމަށެވެ.

މި ސީޒަނުގެ ޗެމްޕިއަންސް ލީގުގެ ގަދަ 16 ގައި ލިވަޕޫލް އޮތް ނަމަވެސް، ޕްރިމިއާ ލީގުގައި އެ ޓީމުގެ ކުޅުން ވަނީ ވަރަށް ބޮޑަށް ދަށްވެފައެވެ. އެގޮތުން އަމިއްލަ ދަނޑުގައި ލިވަޕޫލް ޖެހިޖެހިގެން ފަސް މެޗުން ބަލިވެފައިވާއިރު، މިއީ ލިވަޕޫލުގެ ތާރީޚުގައި ލީގުގައި އަމިއްލަ ދަނޑުގައި ޖެހިޖެހިގެން ފަސް މެޗުން ބަލިވި ފުރަތަމަ ފަހަރެވެ.