ކ.ގިރިފުށީގައި މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް)ގެ ނައިޓް ފަޔަރިން ތަމްރީނުތަކެއް ކުރިއަށްދާތީ ކަނޑުދަތުރުކުރާ ފަރާތްތަކުން ސަމާލުވުމަށް އިލްތިމާސްކޮށްފިއެވެ.

މޯލްޑިވްސް ޓްރާންސްޕޯޓް އޮތޯރިޓީން ބުނީ އެމްއެންޑީއެފް އިން ކުރިއަށް ގެންދާ ނައިޓް ފަޔަރިން ތަމްރީނު ކުރިއަށްދާނީ މިމަހުގެ 14, 15 އަދި 16 ގައި ކުރިއަށްދާނެ ކަމަށެވެ. އަދި ނައިޓް ފަޔަރިން ތަމްރީނުތައް ކުރިއަށްދާނީ ހަވީރު 5:30ން ރޭގަނޑު 7:30ށް ކަމަށް އެމްއެންޑީއެފުން އަންގާފައިވާ ކަމަށެވެ.

ތަމްރީނުގައި ވައިގެ ސަރަހައްދު ބޭނުންކުރާ ގޮތާ ބެހޭ ގޮތުން އެމްއެންޑީއެފުން ބުނީ ހަތިޔާރުގެ ގޮތުގައި ބޭނުންކުރާނީ އޭކޭ ސީރީޒް ރައިފަލް ކަމަށެވެ. އަދި ވައިގެ ސަރަހައްދު ބޭނުންކުރޭނެ އެންމެ ދުރުމިނަކީ 3000 މީޓަރ ކަމަށާއި، ވައިގެ ސަރަހައްދު ބޭނުންކުރާނެ އެންމެ އުސްމިނަކީ 300 މީޓަރ ކަމަށެވެ.

އޭގެ އިތުރުން، ވައިގެ ސަރަޙައްދު ބޭނުން ކުރާނެ އެންމެ ތިރިމިނަކީ ސީ ލެވެލް ކަމަށާއި، ވައިގެ ސަރަހައްދު ބޭނުން ކުރާނެ މިސްރާބަކީ ގިރިފުށީގެ ރޭންޖް އިން ހުޅަނގު ދެކުނު ކަމަށް އެމްއެންޑީއެފުން ބުނެއެވެ.

އެހެންކަމުން އެސަރަހައްދުން ކަނޑުދަތުރުފަތުރުކުރާ ފަރާތްތަކުން މިކަމަށް ސަމާލުކަންދީގެން ދަތުރުފަތުރު ކުރުމަށް ޓްރާސްޓްޕޯޓް އޮތޯރިޓީން ވަނީ އިލްތިމާސްކޮށްފައެވެ.

އެމްއެންޑީއެފުން ސިލްސިލާކޮށް އެކި ބާވަތުގެ އަސްކަރީ ތަމްރީނުތައް ހިންގަމުން ދާއިރު ރާއްޖޭގެ އެކި ސަރަޙައްދުތަކުގައި ބޭރުގެ ގައުމުތަކާ ގުޅިގެން ވެސް ޚާއްސަ ތަމްރީންތައް ބާއްވަމުންދެއެވެ.