މުޒާހަރާ ތެރެއިން ހައްޔަރުކުރި މީހުން ކޮވިޑަށް ޓެސްޓު ކުރުމަށް އެދުމުން އެކަމަށް އިންކާރުކުރި- ފުލުހުން
އެޗްޕީއޭ ގެ ގައިޑްލައިނާ ޚިލާފަށް ބޭއްވި އެއްވުމެއްގައި ބައިވެރިވުމުގެ އިތުރުން ގިނަ އަދަދެއްގެ ފުލުހުންނާއި އެމީހުން ކޮންޓެކްޓްވެފައިވޭ
އިދިކޮޅުން ސިލްސިލާކޮށް ކުރިއަށް ގެންދާ މުޒާހަރާތަކުގެ ތެރެއިން
އިދިކޮޅު ޕީޕީއެމް/ޕީއެންސީން މާލެ ސަރަހައްދުގައި ސިލްސިލާކޮށް ކުރިޔަށް ގެންދާ މުޒާހަރާގެ ތެރެއިން ހުކުރު ދުވަހު ކުރިޔަށް ގެންދިޔަ މުޒާހަރާގައި ހައްޔަރުކުރި މީހުން ކޮވިޑަށް ޓެސްޓްކުރުމަށް އެދުމުން އެކަމަށް އިންކާރުކޮށްފައިވާ ކަމަށް މޯލްޑިވްސް ޕޮލިސް ސަރވިސް އިން ބުނެފިއެވެ.
ފުލުހުން ބުނީ މުޒާހަރާގެ ތެރެއިން ފުލުހުންގެ ބެލުމުގެ ދަށަށް ގެންދިޔަ މީހުން ކޮވިޑަށް ޓެސްޓްކުރުމަށް އެދުމުން އެކަމަށް އިންކާރުކުރުމުން ސާމްޕަލް ނަގާފައިނުވާ ކަމަށެވެ. މީގެއިތުރުން ފުލުހުން ބުނީ ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ގައިޑްލައިނާ ޚިލާފަށް ބޭއްވި އެއްވުމެއްގައި ބައިވެރިވުމުގެ އިތުރުން ގިނަ އަދަދެއްގެ ފުލުހުންނާއި އެމީހުން ކޮންޓެކްޓްވެފައިވާ ކަމަށެވެ. އަދި ކަސްޓޯޑިއަލް އަކީވެސް ގިނަ އަދަދެއްގެ ބަޔަކު ބަލަހައްޓަމުން އަންނަ ތަނަކަށްވުމާއެކު އެންމެންގެ ރައްކާތެރިކަމަށްޓަކައި ކޮވިޑަށް ޓެސްޓްކުރުމަށް ސާމްޕަލް ދިނުމަށް އެދުނު ކަމަށެވެ. ނަމަވެސް އެކަމަށް މުޒާހަރާގެ ތެރެއިން ފުލުހުންގެ ބެލުމުގެ ދަށަށް ގެނައި އެންމެންވެސް އިންކާރުކޮށްފައިވާކަމަށް ފުލުހުން ބުނެއެވެ.
މުޒާހަރާގެ ތެރެއިން 38 މީހަކު ހައްޔަރުކޮށްފައިވާކަމަށް މައުލޫމާތު ލިބެއެވެ.
އިދިކޮޅު ޕީޕީއެމް/ޕީއެންސީން އެކި ނަންނަމުގައި މާލޭގައި އަންނަނީ ސިލްސިލާކޮށް މުޒާހަރާކުރަމުންނެވެ. އެގޮތުން ކޮންމެ ހުކުރު ދުވަހަކު މަގުތަކަށް ނިކުމެ އަންނަނީ މުޒާހަރާކުރަމުންނެވެ. މިމުޒާހަރާތަކާއި ގުޅިގެން ފުލުހުން ބުނަމުން އަންނަނީ ހެލްތް ޕްރޮޓެކްޝަން އެޖެންސީ (އެޗްޕީއޭ)ގެ އެންގުންތަކާ ޚިލާފުވެ، އާންމު ރައްޔިތުންގެ ސިއްހަތު ނުރައްކަލުގެ ތެރެއަށް ހުށަހެޅޭގޮތަށް އަމަލުތައް ބަހައްޓާ ފަރާތްތަކާމެދު ގާނޫނީ ފިޔަވަޅު އަޅާނެކަމަށެވެ. މީގެއިތުރުން އިދިކޮޅުން ކުރިޔަށް ގެންދާ މުޒާހަރާތަކަކީ އެޗްޕީއޭގެ ގައިޑްލައިނާ އަދި ސުލްހަވެރިކަމާއެކު އެއްވެ އުޅުމުގެ ޤާނޫނާވެސް ހިލާފަށް ބާއްވަމުން އަންނަ އެއްވުންތަކެއް ކަމަށް ފުލުހުން ބުނެއެވެ.
ރާއްޖޭގައި ކޮވިޑް-19ގެ ހާލަތު މިއިން ދުވަހަކު ގޯސް ނުވާ މިންވަރަށް ވަނީ ގޯސްވެފައެވެ. އެގޮތުން ޖެނުއަރީ މަހުގެ 24 ވަނަ ދުވަހުން ފެށިގެން ދުވާލެއްގެ މައްޗަށް ކޮވިޑް ޖެހޭ މީހުންގެ އަދަދު 100ން ދަށް ނުވާއިރު ފާއިތުވި ހަފްތާއަކީ މުޅި ޕެންޑަމިކް ތެރޭގައި ރާއްޖޭގައި އެންމެ ގިނަ އަދަދެއްގެ ބަޔަކު ޕޮޒިޓިވްވި ހަފްތާކަމަށް ހެލްތު އެމަރޖެންސީ އޮޕަރޭޝަން ސެންޓަރ(އެޗްއީއޯސީ)ން ވަނީ ބުނެފައެވެ.
ކޮވިޑްގެ ހާލަތު ރަނގަޅުވަމުން ނުދާތީ އެޗްޕީއޭއިން ވަނީ މާރޗް 4ން ފެށިގެން ފިޔަވަޅުތައް އިތުރަށް ވަރުގަދަކޮށްފައެވެ. އެގޮތުން މާލެ ސަރަހައްދުގައި އެއްފަހަރާ ފަސް މީހުންނަށްވުރެ ގިނައިން އެއްވެތިބުން ވަނީ މަނާކޮށްފައެވެ. އަދި ރަށްރަށަށްދާއިރު 72 ގަޑިއިރުވެފައިވާ ޕީސީއާރު ނެގެޓިވް ޓެސްޓެއް ބޭނުންވާނެކަމަށް އެޗްޕީއޭއިން ވަނީ ބުނެފައެވެ. އަދި ޕާކުތަކާއި މައިޒާންތައްވެސް ވަނީ ބަންދުކޮށްފައެވެ.
