ފްލެޓް ލިބޭނެކަމަށް ދޫކުރި ލިޔުމަކީ ޝަރުތު ފުރިހަމަނުވާނަމަ ބާތިލްކުރެވޭނެ ލިޔުމެއް: އޭޖީ
ދައުލަތުގެ ނިޝާން ޖަހާފައި އޮތްނަމަވެސް އެލިޔުމަކީ ޤާނޫނީ ގޮތުން ބަނދެވޭ ބަނދެވުމުގެ ލިޔުމަކަށް ވަނީ އެލިޔުމުގައި ބަޔާންކޮށްފައި އޮންނަ ވާހަކަތަކުން
ހިޔާ ފްލެޓް
ހިޔާ މަޝްރޫއުގައި 7،000 ފްލެޓަށް ހުޅުވާލައި ފްލެޓް ލިބޭނެ ކަމަށް ބުނެ ކުރީގެ ސަރުކާރުގައި ދޫކޮށްފައިވާ 9،500 ލިއުމަކީ ޝަރުތު ފުރިހަމަ ނުވާނަމަ ބާތިލް ކުރެވޭ ގޮތަށް އޮތް ލިއުމެއް ކަމަށް އެޓާނީ ޖެނެރަލް އިބްރާހިމް ރިފްއަތު ވިދާޅުވެއްޖެ އެވެ.
ސަރުކާރުގެ ބޯހިޔާވަހިކަމުގެ ސިޔާސަތާއި ހިޔާ މަޝްރޫޢުގެ ފްލެޓްތައް ދިނުމާ ގުޅޭގޮތުން ކަމާގުޅޭ އިދާރާތައް ރައްޔިތުންގެ މަޖިލީހުގެ ގައުމީ ތަރައްޤީއާއި ތަރިކައިގެ ކޮމިޓީއަށް ހާޒިރުކޮށް ބުރާސްފަތި ދުވަހު ވަނީ އެކަންކަން ހިނގައިދިޔަ ގޮތާއި ގުޅޭގޮތުން މައުލޫމާތު ސާފުކުރުމަށް ބައްދަލުވުމެއް ބާއްވާފައެވެ.
މިބައްދަލުވުމުގައި ހޯރަފުށީ ދާއިރާގެ މެމްބަރ އަހުމަދު ސަލީމް ވަނީ، އޭރުގެ ސަރުކާރުގެ އެޓަރނީ ޖެނެރަލް ކަމުގައި ހުންނެވި މުހައްމަދު އަނިލްގެ ލަފާފުޅާއެކުކަމަށް ވިދާޅުވެ، ފްލެޓްތައް ދިނުމުގެ ކަންކަން ސަރުކާރު ބަދަލުވުމުގެ މަރުހަލާ ހިނގަމުންދަނިކޮށް، އޭރުގެ ހައުސިންގ މިނިސްޓަރ ޑރ މުހައްމަދު މުއިއްޒު ކުރައްވާފައިވާކަމަށް ވިދާޅުވެފައެވެ.
އެގޮތުން ފްލެޓް ލިބުނުކަމުގެ ލިއުން ދޫކުރުން އައު ސަރުކާރުގެ ރައީސް ހުވާކުރެއްވި 2018 ވަނަ އަހަރުގެ ނޮވެމްބަރު، 17 އާ ހަމައަށް ކުރިއަށް ގެންދިޔަ ކަމުގެ ހެއްކެއްގެ ގޮތުން ކުރީގެ ހައުސިން މިނިސްޓަރު ޑރ. މުހައްމަދު މުއިއްޒު ކުރެއްވި ޓުވީޓު، ކޮމިޓީގައި ސަލީމް ވަނީ ވިދާޅުވެފައެވެ. އެ ލިއުން ދޫކުރަނީ އޭރުގެ އެޓާނީ ޖެނެރަލް މުހައްމަދު އަނިލްގެ ލަފާ ލިބިގެން ކަންވެސް މުއިއްޒުގެ ޓުވީޓުގައި އޮތްކަމަށް ސަލީމް ވިދާޅުވިއެވެ.
އެހެންނަމަވެސް އެގޮތަށް ކަންކޮށްފައިވަނީ އިންތިޚާބީ ރައީސްގެ އޮފީހުން އެ ލިއުން ދޫނުކުރަން ހައުސިން މިނިސްޓްރީއަށް އަންގާފައި އޮއްވާ ކަމަށް ސަލީމު ވިދާޅުވިއެވެ. މި ހާލަތުގައި ދޫކުރި އެ ލިއުމަކީ އަދިވެސް ގާނޫނީ ބާރެއް ހިނގާނެ ލިއުމެއްތޯ ނުވަތަ އެ ލިއުމުގެ ސައްހަކަމަކީ ކޮބައިތޯ ސަލީމު ވަނީ މިހާރުގެ އެޓަރނީ ޖެނެރަލް އިބްރާހީމް ރިފްއަތު އަރިހުން އައްސަވާފައެވެ.
އެސުވާލަށް ޖަވާބު ދެއްވަމުން އޭޖީ ވިދާޅުވީ ވެރިކަމުގެ ހުވާ މިހާރުގެ ރައީސް ކުރެއްވި ދުވަހާ ހަމައަށް ލިއުން ދޫކުރަން އޭރު ހައުސިން މިނިސްޓްރީން އިއުލާންކުރުމުން އޭރުގައި އޮތް ޕްރެޒިޑެންޓް އިލެކްޓް އޮފީހުން އެކަން ކުރިޔަށް ގެންދަން ނުފެންނަކަމަށާއި އެކަން ހުއްޓުވުމަށް އަންގަވާފައި އޮތްކަމަށް ހައުސިންގ މިނިސްޓްރީގެ ފަރާތުން މައުލޫމާތު ލިބިވަޑައިގަންނަވާފައިވާކަމަށެވެ.
އަދި ފްލެޓް ލިބުނުކަމުގެ ލިޔުމުގެ ޤާނޫނީ ހައިސިއްޔަތަށް ބަލާއިރު އެއްވެސް ހާލެއްގައި ދައުލަތުން ދޫކުރާ ލިޔުމުގައި ދައުލަތުގެ ނިޝާން ޖަހާފައި އޮތްނަމަވެސް އެލިޔުމަކީ ޤާނޫނީ ގޮތުން ބަނދެވޭ ބަނދެވުމުގެ ލިޔުމަކަށް ވަނީ އެލިޔުމުގައި ބަޔާންކޮށްފައި އޮންނަ ވާހަކަތަކުން ކަމަށް އޭޖީ ވިދާޅުވިއެވެ.
ފްލެޓް ލިބުނުކަމުގެ ލިޔުމަށް ބަލާއިރު އެލިޔުމުގައި ލިސްޓުގައި ހިމެނި ލިޔުން ހަވާލުކުރެވުނަސް ފްލެޓްގެ އެއްބަސްވުމުގައި ސޮއިކުރަންޖެހޭ ކަމަށް އޮންނަކަމަށް އޭޖީ ވިދާޅުވިއެވެ. އަދި އެއްބަސްވުމުގައި ސޮއިކުރުމުގެ ކުރިން އެމީހަކު ދީފައިވާ މައުލޫމާތު ފްލެޓް ލިބުމުގެ ޝަރުތަކާއި ދިމާވޭތޯ އާއި އެމައުލޫމާތުގެ ސައްހަކަން ކަށަވަރުކުރަން އިތުރުކަމެއް ކުރަންޖެހޭކަމަށް ރިފްޢަތު ވިދާޅުވިއެވެ.
އޭޖީ ވިދާޅުވީ ފްލެޓް ލިބުނުކަމުގެ ލިޔުމަކީ މުދަލުގެ މައްޗަށް މީހެއްގެ ޤާނޫނީ ހައްގު އޮތްކަން ދަލާލަތުކޮށްދޭ ލިޔުމެއް ނޫންކަމަށެވެ. އެލިޔުމަކީ ޝަރުތުގެ މައްޗަށް ބިނާވާ ނުވަތަ ކޮންޑިޝަނަލް ލިޔުމެއްކަމަށް ގަބޫލުފުޅު ކުރައްވާކަމަށްވެސް އޭޖީ ވިދާޅުވިއެވެ.
އަދި ލިޔުމަކީ ލިޔުމުގައި ބުނާ ޝަރުތުތައް ބެލުމަށްފަހުގައި އޭގައި ބުނާ ޝަރުތުތައް ހަމަނުވާ ހާލަތުގައި ބާތިލްކުރެވޭނެ އެއްޗެއްކަމަށް އޭޖީ ވިދާޅުވިއެވެ. އެކަމަށް ޤާނޫނީ ހުރަހެއްނެތް ކަމަށް އޭޖީ ވިދާޅުވަނީ ރާއްޖޭގެ އެންމެ މަތީ ކޯޓުން އެގޮތަށް ގަޒިއްޔާތަކުން ނިންމަވާފައިވާތީ ކަމަށް ވިދާޅުވިއެވެ.
ކޮމިޓީގެ ބައްދަލުވުމުގައި އޭޖީ ވަނީ ފްލެޓް ކޮމިޓީގެ ގާނޫނީ ހައިސިއްޔަތާ މެދު އުފައްދާ ސުވާލަށް ވެސް ޖަވާބު ދެއްވާފައެވެ.
އެންމެންގެ ހައްގުތަކާއި މިނިވަންކަން ރައްކާތެރިކުރުމާއި ދައުލަތުގެ މައިގަނޑު ސިޔާސަތުތައް ކަނޑައަޅައި މުއައްސަސާތަކަށް އެންގެވުމާއި އިރުޝާދު ދެއްވުމަކީ ގާނޫނުއަސާސީން ރައީސަށް މަތިކޮށްފައި އޮތް ޒިންމާއެއްކަން ފާހަގަކުރައްވައި އޭޖީ ވިދާޅުވީ ހިޔާ ފްލެޓްތަކުގެ މައްސަލަ ސަރުކާރުގެ ބޯހިޔާވަހިކަމުގެ ސިޔާސަތާ ގުޅުން ހުރި ކަމަށެވެ. ކުރީގެ ސަރުކާރުގައި ފްލެޓްތައް ދޫކުރި ގޮތުން ގިނަ ޝަކުވާތައް ހުށަހަޅާފައިވާ ކަމަށް ވިދާޅުވި އެވެ.
އޭޖީ ވިދާޅުވީ އެ ޝަކުވާތައް ހުށަަހަޅާފައި ވަނީ ހަމަހަމަކަން ނެތުމާއި ހާމަކަން ނެތުމުގެ މައްޗަށްކަމަށެވެ. އެހެންކަމުން ވަޒީރުންގެ މަޖިލީހުގެ ލަފައާއި މަޝްވަރާއާއެކު ކޮމިޓީއެއް އެކުލަވާލާ ފްލެޓް ދީފައި ވަނީ ހައްގުވެރިންނަށްތޯ ބަލައި އިތުރަށް އަޅަން ޖެހޭ ފިޔަވަޅުތައް އެޅުމަށްކަމަށް އޭޖީ ވިދާޅުވިއެވެ.
މި ކޮމިޓީއަށް ގާނޫނީ ހައިސިއްޔަތާއި ގުޅޭގޮތުން އޭޖީ ވިދާޅުވީ ރައީސުލްޖުމްހޫރިއްޔާ އެ ކޮމިޓީ އުފައްދަވާފައި ވަނީ ގާނޫނުއަސާސީގައި ބަޔާންކޮށްފައިވާ ގޮތުގެ މަތިން ދުސްތޫރީ ހަމަތަކާ އެއްގޮތަށް ރައީސަށް ލިބިދޭ ފުރިހަމަ ބާރާއި އިޚްތިޔާރުގެ ތެރެއިން ކަމަށެވެ.
މީގެއިތުރުން ފްލެޓް ދިނުމުގައި އޮޅުވާލުމާއި މަކަރުހެދުންތަކެއްގެ ތެރެއިން ކުރީ ސަރުކާރުން ކަންކަން ކޮށްފައިވާތީ އެކަމާގުޅޭގޮތުން ދައުވާ އުފުލި ޝަރީޢަތެއް ކުރިޔަށް ގެންދެވިދާނެތޯ ހޯރަފުށީ ދާއިރާގެ މެމްބަރ ކުރެއްވި ސުވާލަށް ޖަވާބު ދެއްވަމުން އޭޖީ ވިދާޅުވީ ޖިނާޢީ ދައުވާކުރެވޭނެ ކަންތައްތަކެއް ހިނގާފައިވާކަމަށް ފެންނަނަމަ ކަމާގުޅޭ އިދާރާތަކަށް އެފަދަ ތަހުގީގުތަކެއް ކުރިޔަށް ގެންދެވޭނެކަމަށެވެ.
ކުރީގެ ސަރުކާރުން ފްލެޓް ހައްގުވާކަމަށް ހާމަކުރި ލިސްޓުގައި ތިބި އެންމެންގެ ފޯމުތައް އަލުން ބެލުމަށްފަހު މިސަރުކާރުން ވަނީ އަލުން ފްލެޓް ލިބޭ މީހުންގެ ލިސްޓެއް ހާމަކޮށްފައެވެ. މިސަރުކާރުން އެކަން ކުރުމަށް އުފެއްދި ފްލެޓް ކޮމިޓީން ބުނަނީ އެކަން ކޮށްފައިވާނީ ބަލަންޖެހޭވަރަށް ކަންކަމަށް ބެލުމަށްފަހު ކަމަށެވެ.
