ހިޔާ ފްލެޓުތަކުގެ ކުލިން އެއްލައްކަ މައާފުކޮށްފި
މި ލުޔާއެކު، ކުރިން ޖުމްލަ ކުލި ދައްކަންޖެހޭ މުއްދަތު 27 އަހަރުން 26 އަހަރާއި ތިން މަހަށް ކުރުވާނެ
ހިޔާ ފްލެޓްތައް
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެވަޑައިގެންނެވި ވައުދުފުޅު ފުއްދެވުމަށްޓަކައި، އިތުރު އެއްލައްކަ ރުފިޔާ ހިޔާ ފްލެޓްތަކުގެ ކުލިން މައާފުކޮދެއްވާފައި ވާކަމަށް، އާބަންކޯގެ މެނޭޖިންގ ޑިރެކްޓަރު އިބްރާހީމް ފަޒުލް ރަޝީދު ވިދާޅުވެއްޖެއެވެ.
ބުދަ ދުވަހުގެ ހަވީރު އާބަންކޯގައި ބޭއްވި ނޫސްވެރިންގެ ބައްދަލުވުމުގައި ފަޒުލް ވިދާޅުވީ ރަައީސް ވަޒީރުންގެ މަޖިލީހުގެ ނިންމެވުމާއެކު ގާތްގަނޑަކަށް 200،000 ރުފިޔާގެ ޑިސްކައުންޓެއް ލިބޭނެކަމަށެވެ.
އެއީ މިހާރު ދައްކަމުން އަންނަ 5،300 ރުފިޔާއިން 3،984.21 ރުފިޔާއަށް ކުޑަކުރުމަށާއި، ބާކީ އެއްލައްކަ ރުފިޔާ ޖުމްލަ ކުލިން މައާފުކުރުމަށެވެ. އަދި ވިދާޅުވީ މި ލުޔާއެކު، ކުރިން ޖުމްލަ ކުލި ދައްކަން ޖެހޭ މުއްދަތު 27 އަހަރުން 26 އަހަރާއި ތިން މަހަށް ކުރުވާނެ ކަމަށެވެ.
މީގެ އިތުރުން ފަޒުލް ވިދާޅުވީ، އެއްލައްކަ ރުފިޔާ މައާފުކުރިނަމަވެސް ކުންފުންޏަށް މާލީ ބުރައެެއް ނެތްކަމަށެވެ. އަދި ކުރިއަށް ހުރި ކަންކަން ސަރުކާރާއި ކުންފުނި ގުޅިގެން މަސައްކަތްކޮށް، ހަމަޖައްސާނެ ކަމަށެވެ.
އެއްލައްކަ ރުފިޔާ މައާފުކޮށްފައި މިވަނީ ގިނަ ބައެއްގެ ފާޑުކިޔުން ރައީސް މުއިއްޒަށް އަމާޒުވެފައިވާ ދަނޑިވަޅެއްގައެވެ. އެއީ އަންގާރަ ދުވަހު ދެލައްކަ ރުފިޔާ މައާފުކުރިނަމަވެސް، ދެ ލައްކަ ރުފިޔާއިން 7 އަހަރު ތެރޭގައި އެ ލިބޭ ޑިސްކައުންޓާއެކު 89،473.64 މަދުވުމާ ގުޅިގެންނެވެ.
ހިޔާ ފްލެޓުތަކުން 7 އަހަރު ދުވަހަށް މިހާރު ދައްކަމުން އަންނަ 5،300 ރުފިޔާގެ ރޭޓުން ޖެހެނީ ޖުމްލަ 445،200 ރުފިޔާއެވެ. މިހާރު ކުލި ކުޑަކުރި 3،984.21 ރުފިޔާގެ ރޭޓުން ޖެހެނީ 334،673 ރުފިޔާއެވެ. އެހެންކަމުން ކުރިން 7 އަހަރުން ދައްކަން އޮތް ކުލިން 110،526 ރުފިޔާ މައާފުވީއެވެ. ބުދަ ދުވަހު މައާފުކުރި 100،000 ރުފިޔާއާއެކު، ޖުމްލަ 210،526 ރުފިޔާއަށް ކުޑަވީއެވެ.
