ލިވަޕޫލާއި ލައިޕްޒީގުގެ ދެވަނަ ލެގުވެސް ހަންގޭރީގައި

ޔުއެފާ ޗެމްޕިއަންސް ލީގުގެ ދެވަނަ ބުރުގެ ދެވަނަ ލެގުގައި ލިވަޕޫލާއި އާރްބީ ލައިޕްޒީގް ބައްދަލުކުރަން އޮތް މެޗުވެސް ހަންގޭރީގެ ބުޑަޕެސްޓުގައި ކުޅެން ނިންމައިފިއެވެ.

ލިވަޕޫލުގެ ދަނޑުގައި ކުޅެން އޮތް ދެވަނަ ލެގުގެ މެޗު ހަންގޭރީގެ ބުޑަޕެސްޓުގައި ހުންނަ ޕުސްކަސް އެރީނާއަށް ބަދަލުކުރިއިރު، މިދިޔަ ފެބްރުއަރީ މަހުގެ 17 ވަނަ ދުވަހު ޖަރުމަނުގައި ކުޅެން އޮތް ފުރަތަމަ ލެގުގެ މެޗުވެސް ކުޅެފައިވަނީ އެ ދަނޑުގައެވެ. އެ ފަހަރު ހަންގޭރީއަށް މެޗު ބަދަލުކުރީ ކޮވިޑް-19 ގެ އައު ވޭރިއަންޓުގެ ނުރައްކާ ބޮޑުވުމާ ގުޅިގެން، ޖަރުމަނުގެ ސަރުކާރުން އެންމެ ފަހުން އެޅި ފިޔަވަޅުތަކުގެ ތެރޭގައި އިންގްލެންޑް ހިމެނޭ ގޮތަށް އެކި ގައުމުތަކުން އަންނަ މީހުންނަށް ޖަރުމަނަށް އެތެރެނުވެވޭ ގޮތަށް ކަނޑައެޅުމުންނެވެ.

އަދި މި މަހުގެ 11 ވަނަ ދުވަހު އިންގްލެންޑުގައި ކުޅެން އޮތް ދެވަނަ ލެގުގެ މެޗު ހަންގޭރީއަށް ބަދަލުކުރަން ޔުއެފާއިން ނިންމީ، ލައިޕްޒީގުގެ ޓީމު އިންގްލެންޑަށް ދަތުރުކޮށްފިނަމަ، އަނބުރާ ޖަރުމަނަށް އައުމުން އެ ޓީމުގެ ކުޅުންތެރިންނާއި އޮފިޝަލުން ކަރަންޓީނުވާން ޖެހޭނެ ކަމަށް ޖަރުމަނުގެ ސަރުކާރުން އެންގުމާއެކު، އެ މެޗު އެހެން ދަނޑަކަށް ބަދަލުކޮށްދިނުމަށް ލައިޕްޒީގުން އެދުމުންނެވެ.

ޗެމްޕިއަންސް ލީގުގެ ދެވަނަ ބުރުގައި ލިވަޕޫލާއި ލައިޕްޒީގް ބައްދަލުކުރާ ދެ ލެގުވެސް އެއް ދަނޑެއްގައި ކުޅެން ނިންމި ނަމަވެސް، މި މެޗުތައް ކުރިއަށްދާނީ ޔުއެފާގެ އަވޭ ލަނޑުގެ އުސޫލާ އެއްގޮތަށް ކަމަށް އެ އިދާރާއިން ވަނީ ނިންމާފައެވެ. އެހެންކަމުން ފުރަތަމަ ލެގުގައި ރަށުން ބޭރުގައި 2-0 ގެ ނަތީޖާއަކުން ލިވަޕޫލް މޮޅުވެފައިވާއިރު، ކުއާޓާ ފައިނަލުގެ ޖާގައެއް ހޯދުމުގެ ފުރުސަތު ބޮޑީ ލިވަޕޫލަށެވެ.

ލިވަޕޫލާއި ލައިޕްޒީގުގެ ދެ ލެގުވެސް ހަންގޭރީގައި ކުޅޭއިރު، ޗެމްޕިއަންސް ލީގުގެ ދެވަނަ ބުރުގެ ފުރަތަމަ ލެގުގައި ބޮރޫޝިއާ މޮންޗެންގްލަޑްބަކާއި މެންޗެސްޓާ ސިޓީ ބައްދަލުކުރި މެޗުވެސް ވަނީ ހަންގޭރީގައި ކުޅެފައެވެ.