އީ ވޯޓިންގ އަކީ މިހާރުގެ ވިސްނުމަށް ބަލާނަމަ ރާއްޖެއަށް ބޭނުން އެއްޗެއް ނޫން: ޝަރީފް
މިހާރުވެސް ރައްޔިތުން އިތުބާރުކުރަނީ ވޯޓު ކަރުދާހަށް ކަމަށް ޝަރީފް ވިދާޅުވި
އީސީގެ ރައީސް މާލިއްޔަތު ކޮމިޓީގައި ވާހަކަދައްކަވަނީ
އީ ވޯޓިންގ އަކީ މިހާރުގެ ވިސްނުމަށް ބަލާނަމަ ރާއްޖެއަށް ބޭނުންވާ ސިސްޓަމެއް ނޫންކަމަށް އިލެކްޝަންސް ކޮމިޝަން (އީސީ)ގެ ރައީސް އަހުމަދު ޝަރީފް ވިދާޅުވެއްޖެއެވެ.
ކުރިޔަށް އޮތް ލޯކަލް ކައުންސިލް އިންތިޚާބަށް ބޭނުންވާ ބަޖެޓާ ގުޅޭގޮތުން މާލިއްޔަތު ކޮމިޓީން ބޭއްވި ބައްދަލުވުމުގައި އީ ވޯޓިންގއަށް ދިޔުމާ ގުޅޭގޮތުން މިހާރު ކަންތައްތައް އޮތް ހިސާބާ ގުޅޭގޮތުން ސުވާލުކުރެއްވުމުން ޝަރީފް ވިދާޅުވީ އޮންލައިން ވޯޓިންގ އަކީ އީ ވޯޓިންކަމަށް ވާނަމަ އީ ވޯޓިން އަކީ މިހާރުގެ ވިސްނުމަށް ބަލާއިރުގައި ރާއްޖެއަށް ބޭނުން އެއްޗެއް ނޫންކަމަށެވެ.
އީ ވަސީލަތްތައް ބޭނުންކޮށްގެން ބައެއް ގައުމުތަކުގައި ވޯޓުލާއިރު އިތުރު ވަސީލަތްތައް ބޭނުންކުރާ ކަމަށް ޝަރީފް ވިދާޅުވިއެވެ. އެފަދަ މެޝިންތަކާއި އެ އެއްޗެހި ބޭނުންކުރަނީ ބޮޑެތި އާބާދީތަކުގައި ކަމަށް ޝަރީފް ވިދާޅުވިއެވެ. އެއީ ވޯޓު ގުނުމުގެ ކަންކަން އަވަސްކޮށް ފަސޭހަކުރުމުގެ ބޭނުމުގައި ކަމަށް ޝަރީފް ވިދާޅުވިއެވެ.
ޝަރީފް ވިދާޅުވީ މިހާރުވެސް ރައްޔިތުން އިތުބާރުކުރަނީ ވޯޓު ކަރުދާހަށްކަމަށެވެ. އެނޫންގޮތަކަށް އިލެކްޝަން ކޮމިޝަނަށް ވެސް އޮފިޝަލުންނަށް ވެސް އިތުބާރު ނުކުރާކަމަށް ޝަރީފް ވިދާޅުވިއެވެ.
އީ ވޯޓިންގ ގެ ނިޒާމު، އެހެން ގޮތަކަށް ބަލާނަމަ އޮންލައިންކޮށް ވޯޓުލުން ފަދަ ބަދަލުތައް ގެނެވިދާނެކަމަށް ޝަރީފް ވިދާޅުވިއެވެ. އެހެންނަމަވެސް އެގޮތަށް ބަދަލު ގެނެވޭނީ ޤާނޫނީ ނިޒާމަށް ބަދަލުގެނެސްގެން އޮނިގަނޑަށް ބަދަލުތަކެއް ގެނެސްގެންކަމަށް ޝަރީފް ވިދާޅުވިއެވެ.
ރާއްޖޭގައި އީ ވޯޓިންގ ސިސްޓަމް ތަޢާރަފްކުރުމުގެ ވާހަކަތަކެއް މީގެކުރިން ވަނީ ދައްކާފައެވެ.
