އެލްޖީއޭއިން ތިން މަޝްރޫއުއެއްގެ މަސައްކަތްކުރުމަށް ހަވާލުކޮށްފި
4 މާރިޗު 2021 | ބުރާސްފަތި 02:03މިއެއްބަސްވުންތަކުގައި ސޮއިކުރުމުގެ ކަންކަން ކުރިޔަށް ގެންދެވިފައިވަނީ ޒޫމް މެދުވެރިކޮށް
އެއްބަސްވުންތަކުގައި ސޮއިކުރި ރަސްމިއްޔާތުގެ ތެރެއިން
ލޯކަލް ގަވަރމެންޓް އޮތޯރިޓީ (އެލްޖީއޭ)ގެ ބަޖެޓްގައި ހިމެނިގެން ކުރިޔަށް ގެންދިޔުމަށް ހަމަޖެހިފައިވާ ޕީ.އެސް.އައި.ޕީ މަޝްރޫއުތަކުގެ ތެރެއިން 3 މަޝްރޫއުއެއްގެ މަސައްކަތް ކުރުމަށް ހަވާލުކޮށްފިއެވެ.
ކޮވިޑް-19އާ ގުޅިގެން މިއެއްބަސްވުންތަކުގައި ސޮއިކުރުމުގެ ކަންކަން ކުރިޔަށް ގެންދެވިފައިވަނީ ޒޫމް މެދުވެރިކޮށެވެ. އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ގާނޫނުގެ 69 ވަނަ މާއްދާގައިވާ ގޮތުން ގައުމީ އިދާރާތަކުން ރަށެއްގައި ނުވަތަ އަތޮޅެއްގައި ހިންގުމަށް ކަނޑައަޅާ ޕީ.އެސް.އައި.ޕީ މަޝްރޫއުގެ ތެރެއިން، އެ މަޝްރޫއުއެއްގެ އަގު 5 މިލިއަން ރުފިޔާއަށްވުރެ ދަށުގެ މަޝްރޫއުތައް ހިންގަންވާނީ، އެ ރަށެއްގެ ނުވަތަ އެ އަތޮޅެއްގެ ކައުންސިލް މެދުވެރިކޮށެވެ.
ބުދަ ދުވަހު ހަވާލުކުރެވުނު ޕްރޮޖެކްޓްތަކަކީ 2،815،320.04 (ދެމިލިއަން އަށްލައްކަ ސާދަހާސް ތިން ސަތޭކަ ވިހި) ރުފިޔާއަށް ހއ. ކެލާ މަސްމާރުކޭޓް، 2،500،000.00 (ދެމިލިއަން ފަސްލައްކަ) ރުފިޔާއަށް ހދ. ވައިކަރަދޫ މަސްމާރުކޭޓް އަދި 3،500،000.00 (ތިން މިލިއަން ފަސްލައްކަ) ރުފިޔާއަށް ބ. ފުޅަދޫ ކައުންސިލް އިދާރާގެ މަސައްކަތެވެ. ކެލާ މަސްމާރުކޭޓްގެ އެއްބަސްވުމުގައި ސޮއިކުރެއްވީ އެރަށު ކައުންސިލްގެ ރައީސް އާދަމް ޣުފްރާން، ވައިކަރަދޫ މަސްމާރުކޭޓްގެ އެއްބަސްވުމުގައި ސޮއިކުރެއްވީ އެރަށު ކައުންސިލްގެ ރައީސް އަޙްމަދު ނަސީމް އަދި ފުޅަދޫ ކައުންސިލް އިދާރާގެ އެއްބަސްވުމުގައި ސޮއިކުރެއްވީ އަހްމަދު އާސިފްއެވެ.
މި އެއްބަސްވުންތަކުގައި އެލްޖީއޭގެ ފަރާތުން ސޮއިކުރެއްވީ ޗީފް އެގްޒެކެޓިވް އޮފިސަރ ފާތިމަތު އަފްޝަން ލަތީފް އެވެ. އަދި ކައުންސިލްތަކުގެ ފަރާތުން ސޮއިކުރެއްވީ ކައުންސިލްތަކުގެ ރައީސުންނެވެ. މިބައްދަލުވުމުގައި ކެލާ އަދި ވައިކަރަދޫ ދާއިރާގެ މަޖުލިސް މެމްބަރުން ބައިވެރިވެވަޑައިގަތެވެ.
މީގެ އިތުރުން އެލްޖީއޭއިން ބުނީ ވައިކަރަދޫ މަސްމާރުކޭޓް 04 ޑިސެމްބަރ 2019 ވަނަ ދުވަހު ބަޔަކާ ހަވާލުކުރެވުނު ކަމަށެވެ. ނަމަވެސް ކޮންޓްރެކްޓަރު ކައުންސިލަށް، އެންގުމަކާއި ނުލައި، އެއްވެސް މަގުބޫލު އުޒުރެއްނެތި ސައިޓުގައި މަސައްކަތް ނުކުރާތާ 28 ދުވަސްވުމާއި، އަދި މުއްދަތަށް މަސައްކަތް ނިންމާފައި ނުވާތީ ޖޫރިމަނާގެ ގޮތުގައި 15 އިންސައްތައަށް ވުރެ އިތުރުވެފައިވާތީ، އެގްރިމެންޓު މާލިއްޔަތު ގަވައިދުގައިވާގޮތުގެ މަތީން ބާތިލްކުރެވިފައިވާކަމަށެވެ. އަދި 24 އިންސައްތަ މަސައްކަތް ނިމިފައިވާ ކަމަށް އެލްޖީއޭއިން ބުނެއެވެ.
އެލްޖީއޭއިން ބުނީ ބުދަ ދުވަހު ވެވުނު އެއްބަސްވުމުގެ ދަށުން ކައުންސިލުން އެހެން ފަރާތަކާ އެ މަސައްކަތް ހަވާލުކޮށްގެން ނުނިމިހުރި މަސައްކަތް ނިންމާލެވޭނެ ކަމަށެވެ. 2021 ވަނަ އަހަރު އަލަށް ފެށުމަށް 24 ޕްރޮޖެކްޓް އެލްޖީއޭއަށް ލިބިފައިވެއެވެ. 2019 ވަނަ އަހަރު ފަށައި މިއަދާ ހަމައަށް ނުނިމި ކުރިޔަށްދާ ޕްރޮޖެކްޓްތަކުގެ އަދަދަކީ 4 އެކެވެ. އެއީ ޅ. ނައިފަރު ކައުންސިލް އިދާރާ، ކ. ހުރާ ކައުންސިލް އިދާރާ، ގއ. ކޮނޑޭ ކައުންސިލް އިދާރާ އަދި ލ. އިސްދޫ އުންސިލް އިދާރާ އެވެ. އަދި 2020 ފަށައި މިއަދާ ހަމައަށް ނުނިމި ކުރިޔަށްދާ ޕްރޮޖެކްޓަކީ ދ. ކުޑަހުވަދޫ ކައުންސިލް އިދާރާގެ މަސައްކަތެވެ.
