މެޖިސްޓްރޭޓުންނަށް ފޯނު އެލަވަންސްގެ ގޮތުގައި މަހަކު 500 ރުފިޔާ ދިނުމަށް މަޖިލީހުން ފާސް ކޮށްފި
މިކަން ފާސްކޮށްފައިވަނީ ނެގުނު ވޯޓުގައި ބައިވެެރިވި 57 މެންބަރުންގެ އިއްތިފާގުން
ޖުޑީޝަލް ސަރވިސް ކޮމިޝަން
1 އޭޕްރީލުން ފެށިގެން މެޖިސްޓްރޭޓުންނަށް ފޯނު އެލަވަންސްގެ ގޮތުގައި މަހަކު 500 ރުފިޔާ ދިނުމަށް ރައްޔިތުންގެ މަޖިލީހުން ފާސް ކޮށްފިއެވެ.
މިކަން ފާސްކޮށްފައިވަނީ އަންގާރަ ދުވަހުގެ ރައްޔިތުންގެ މަޖިލީހުގެ ޖަލްސާގައި މެޖިސްޓްރޭޓުންނަށް ފޯނު އެލަވަންސްގެ ގޮތުގައި މަހަކު 500 ރުފިޔާ ދިނުމަށް މާލިއްޔަތު ކޮމިޓީން ނިންމުމާ ގުޅިގެން އެކަން ފާސްކުރަން ފެނޭތޯ ނެގުނު ވޯޓުގައި ބައިވެެރިވި 57 މެންބަރުންގެ އިއްތިފާގުންނެވެ.
މެޖިސްޓްރޭޓުންނަށް ފޯނު އެލަވަންސް ހަމަޖައްސަވައިދެއްވުމަށް އެދިވަޑައިގެން ޖުޑީޝަލް ސަރވިސް ކޮމިޝަނުން ހުށަހަޅުއްވާފައިވާ މައްސަލައިގައި މާލިއްޔަތު ކޮމިޓީން ދިރާސާކޮށް ނިންމި ގޮތުގެ ރިޕޯޓު އިއްވަމުން އެ ކޮމިޓީގެ މުޤައްރިރު ކިނބިދޫ ދާއިރާގެ މެމްބަރ މުހައްމަދު ނާޝިޒު ވިދާޅުވީ މި މައްސަލަ ކޮމިޓީން މަޝްވަރާކުރުމަށްފަހު، 24 ފެބުރުވަރީ 2021 ގައި ބޭއްވި ކޮމިޓީގެ މި އަހަރުގެ 07 ވަނަ ބައްދަލުވުމުގައި ކޮމިޓީއަށް އެވަގުތު ހާޒިރުވެ ވޯޓުގައި ބައިވެރިވި މެންބަރުންގެ އަޣްލަބިއްޔަތުން މެޖިސްޓްރޭޓުންނަށް ފޯނު އެލަވަންސްގެ ގޮތުގައި މަހަކު 500 ރުފިޔާ ދިނުމަށް އެ ކޮމިޓީން ނިންމާފައިވާ ކަމަށެވެ.
މި ރިޕޯޓުގައި ބުނީ ކޮމިޓީން މި މައްސަލަ ދިރާސާކުރުމަށް ކުރި މަޝްވަރާގައި ދަށު ކޯޓުތަކުގެ ތެރެއިން މަތީ ގިންތީގެ ކޯޓުތައް ކަމަށްވާ ސުޕީރިއަރ ކޯޓުތަކުގެ ފަނޑިޔާރުންނަށާއި، ހައިކޯޓާއި ސްޕްރީމް ކޯޓުގެ ފަނޑިޔާރުންނަށް ފޯނު އެލަވަންސްގެ ގޮތުގައި މަހަކު އެއްހާސް ރުފިޔާ ދެމުންއަންނައިރު މެޖިސްޓްރޭޓް ކޯޓުތަކުގައި މަސައްކަތްކުރައްވާ މެޖިސްޓްރޭޓުންނަށް ފޯނު އެލަވަންސް ދިނުން މުހިންމުކަން ފާހަގަ ކުރެވިފައިވާ ކަމަށެވެ.
އަދި މެޖިސްޓްރޭޓުންނަކީ އެ މެޖިސްޓްރޭޓަކު ޢައްޔަނުކޮށްފައިވާ ކޯޓުގެ އިތުރުން އެދާއިރާގެ އެހެން ކޯޓުތަކާއި ޙަވާލުވެ ތިބެންޖެހޭ ބައެއްކަމުގައި ވުމުންނާއި އެކޯޓުތަކަށް ހުށަހެޅޭ މައްސަލަތައް ބެއްލެވުމުގެ އިތުރުން އިދާރީ މަސައްކަތްކުރައްވާ ބައެއްކަމާއި މެޖިސްޓްރޭޓުންނަށް ފޯނު އެލަވަންސް ދިނުމަށް ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަންގެ 2021 ވަނަ އަހަރުގެ ބަޖެޓުގައި ހިމެނިފައިވާކަން ފާހަގަ ކުރެވުނު ކަމަށެވެ.
