މިނިސްޓަރ މަލީހު އިދިކޮޅާ ގުޅިގެން ސިޔާސީ ހަރަކާތް ހިންގަވާކަމުގެ ތުހުމަތުތަކެއް

މިނިސްޓަރ އޮފް ކޮމިޔުނިކޭޝަންސް, ސައިންސް އެންޑް ޓެކްނޮލޮޖީ މިނިސްޓަރ މުހައްމަދު މަލީހުގެ ޖަމާލު އިދިކޮޅާ ގުޅިގެން ސިޔާސީ ހަރަކާތް ހިންގަވާކަމުގެ ތުހުމަތު އެމްޑީޕީ މެމްބަރުން ކުރައްވައިފިއެވެ.

ހޯމަ ދުވަހުގެ ޖަލްސާގައި ވަނީ މިނިސްޓަރުގެ އިތުބާރުނެތްކަމުގެ މައްސަލަ ހުށަހަޅާ އެމައްސަލައަށް ބަހުސްކުރައްވާފައެވެ. އެމައްސަލައަށް ޖަވާބުދާރީވުމަށް މިނިސްޓަރަށް 30 މިނެޓްގެ ފުރުސަތު ލިބިވަޑައިގެންނެވިއިރު ޖުމްލަ ދެ ގަޑިއިރު ވަނީ ބަހުސްކުރިޔަށް ގެންދަވާފައެވެ.

Advertisement

މިބަހުސްގައި ވާހަކަދައްކަވަމުން ހެންވޭރު ދެކުނު ދާއިރާގެ އެމްޑީޕީ މެމްބަރ ހުސައިން ޝަމީމު ވިދާޅުވީ ދައުލަތުން ފޯރުކޮށްދީފައިވާ ކާރުގައި މަލީހު ސަރުކާރާ އިދިކޮޅު ހަރަކާތްތައް ހިންގާ ހަރަކާތްތައް ރޭވުމުގައި އުޅުއްވާކަމަށެވެ.

މީގެއިތުރުން ގަމު ދާއިރާގެ އެމްޑީޕީ މެމްބަރ މުހައްމަދު ވިސާމްވެސް ވިދާޅުވީ މިއުޅެނީ މިނިސްޓަރ މަލީހު ޓީވީ ޕްރޮގްރާމެއްގައި ވާހަކަދައްކައިގެން އެކަން ހަޖަމު ނުވެގެން ނޫންކަމަށެވެ. އަދި މަލީހު އާއި ޒާތީވެގެން ނޫންކަމަށްވެސް ވިސާމް ވިދާޅުވިއެވެ. އެހެންނަމަވެސް މިނިސްޓަރ މަލީހު ސަރުކާރުގައި ހުންނަވައިގެން ރައީސް ޔާމީންގެ ޤާނޫނީ ވަކީލުންގެ ޓީމުގައި ހިމެނިވަޑައިގަންނަވާ ޑރ މުހައްމަދު ޖަމީލާއެކު ސިޔާސީ ހަރަކާތްތައް ހިންގުމުގެ ފުރުސަތު ނުދެއްވާނެކަމަށް ވިސާމް ވިދާޅުވިއެވެ.

މީގެއިތުރުންވެސް އެމްޑީޕީ މެމްބަރުން ވަނީ މިނިސްޓަރ މަލީހު ޑރ ޖަމީލާއެކު އުޅުއްވާކަމަށް ވިދާޅުވެ ވާހަކަދައްކަވާފައެވެ.

ޖުމްހޫރީ ޕާޓީގެ ސްލޮޓެއްގައި މަލީހު ވަޒީރުކަމަށް ވަޑައިގެންނެވިއިރު މަލީހު އާއި އެމްޑީޕީގެ ޕާލަމަންޓްރީ ގްރޫޕްގެ މެމްބަރުންނާ ދެމެދު ބަހުގެ ހަމަލާތަކެއް ވަނީ ސޯޝަލް މީޑިޔާގައި ބަދަލުކުރެވިފައެވެ. ބަހުސް މަރުހަލާގައި އެމްޑީޕީގެ މެމްބަރުން ވިދާޅުވަމުން ގެންދެވީ އިތުބާރުނެތްކަމުގެ މައްސަލައިގެ ވޯޓު ނަގަނީ މަލީހު އާއި ޒާތީ މައްސަލައެއް އޮތުމުން ނޫންކަމަށެވެ. އެހެންނަމަވެސް މެމްބަރުންގެ އިތުބާރު މަލީހު އަށް ނެތުމުންކަމަށެވެ.

މިނިސްޓަރ މަލީހުގެ ސިޔާސީ ހަޔާތަށް ބަލާއިރު މީގެކުރިންވެސް ޑރ ޖަމީލު އާއެކު ވަނީ މަސައްކަތްކުރައްވާފައެވެ.