ކުޅުދުއްފުށި ރީޖަނަލް ހޮސްޕިޓަލްގެ ލެބޯރެޓަރީ އިމާރާތުގެ ރެނޮވޭޝަން މަސައްކަތް ނިންމާލައިފި
1 މާރިޗު 2021 | ހޯމަ 05:20މަޝްރޫޢުގެ މަސައްކަތުގެ 50 އިންސައްތަ މިހާރު ވަނީ ނިމިފައި
ކުޅުދުއްފުށި ރީޖަނަލް ހޮސްޕިޓަލް
ހދ. ކުޅުދުއްފުށި ރީޖަނަލް ހޮސްޕިޓަލް ބޮޑުކޮށް މަރާމާތު ކުރުމުގެ މަޝްރޫޢުގެ ދަށުން ލެބޯރެޓަރީ އިމާރާތުގެ ރެނޮވޭޝަން މަސައްކަތްތަކާއި ވާރޑް އިމާރާތުގެ ކޮންކްރީޓް މަސައްކަތްތައް ނިމިފައިވާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ން ބުނެފިއެވެ.
އެމްޓީސީސީން ބުނީ ކުޅުދުއްފުށި ރީޖަނަލް ހޮސްޕިޓަލް ބޮޑުކޮށް މަރާމާތުކުރުމުގެ މަޝްރޫޢުގެ މަސައްކަތުގެ 50 އިންސައްތަ މިހާރު ނިމިފައިވާ ކަމަށެވެ.
މި މަޝްރޫޢުގެ ދަށުން ލެބޯރެޓަރީ އަކާއި ވާރޑް އިމާތާތެއް އެޅުމުގެ އިތުރުން އޯ.ޕީ.ޑީ ސަރަޙައްދު މަރާމާތު ކުރުމުގެ މަސައްކަތް ވެސް ހިމެނެއެވެ. މިނިސްޓްރީ އޮފް ހެލްތުގެ ފަރާތުން އެމްޓީސީސީއާ ހަވާލުކޮށްގެން ކުރިއަށްގެންދާ މި މަޝްރޫޢަކީ 30.3 މިލިއަން ރުފިޔާގެ މަޝްރޫޢުއެކެވެ.
އެމްޓީސީސީއިން ރާއްޖޭގައި ތަރައްޤީގެ ބޮޑެތި މަޝްރޫޢުތަކެއް ހިންގަމުން އަންނައިރު އެމްޓީސީސީގެ ސީއީއޯ އާދަމް އާޒިމް ވިދާޅުވީ ސަރުކާރުން ތަރައްގީގެ މިފަދަ ބޮޑެތި މަޝްރޫއުތައް ހަވާލު ކުރައްވައި އެ ކުންފުންޏަށް އިތުބާރު ކުރައްވާފައިވާތީ ސަރުކާރަށް އަދި ރައީސުލްޖުމްހޫރިއްޔާއަށް ޝުކުރުދަންނަވާ ކަމަށެވެ. އާޒިމް ވިދާޅުވީ ކުންފުނީގެ ފަރާތުން ސޮއި ކުރާ ކޮންމެ ޕްރޮޖެކްޓެއް ވެސް ހަލުވި މިނެއްގައި ކުރިއަށްދާނެކަމުގެ ޔަގީންކަން ހުރިހާ ރައްޔިތުންނަށް ވެސް އަރުވާ ކަމަށެވެ.
