ތިން ރަށެއްގެ ފެނާއި ނަރުދަމާ ގާއިމް ކުރުމުގެ މަޝްރޫއުގައި މިނިސްޓްރީ އޮފް ނެޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ އިން ފުލެކްސިންކް ޕްރައިވެޓް ލިމިޓެޑާއެކު ސޮއިކޮށްފިއެވެ.

ޑިޒައިން އެންޑް ބިލްޑް އުސޫލުން 3 ރަށެއްގެ ފެނާއި ނަރުދަމާ ނިޒާމް ޤާއިމްކުރުމުގެ މަޝްރޫޢުތަކުގައި ސޮއި ކޮށްފައިވަނީ އާދިއްތަ ދުވަހު ބޭއްވުނު ރަސްމިއްޔާތެއްގެ ތެރެއިންނެވެ. އެގޮތުން މި އެއްބަސްވުމުގެ ދަށުން ހއ. މޮޅަދޫ، ލ. މުންޑޫ އަދި މ. ވޭވަށުގައި ފެނާއި ނަރުދަމާ ނިޒާމު ގާއިމް ކުރެވިގެން ދާނެއެވެ.

މި ރަސްމިއްޔާތުގައި ވާހަކަ ދައްކަވަމުން މި ދާއިރާތަކުގެ ރައްޔިތުންގެ މަޖިލީހުގެ މެންބަރުން ވިދާޅުވެފައިވަނީ މި މަޝްރޫއުއަކީ ރައްޔިތުން ނުހަނު އުއްމީދު ކުރަމުން އައި މަޝްރޫއުއެއް ކަމަށާއި ރައްޔިތުން ތިބީ މި މަޝްރޫއުތަކުގެ ސަބަބުން ނުހަނު އުފަލުން ކަމަށެވެ.

780 ދުވަހުން ނިންމުމަށް ހަމަޖެހިފައިވާ މި ތިން މަޝްރޫއުގެ ޖުމްލަ އަގަކީ 104,088,337.93 (ސަތޭކަ ހަތަރު މިލިއަން އަށްޑިހަ އަށްހާސް ތިންސަތޭކަ ތިރީސް ހަތެއް) ރުފިޔާއެވެ. އެގޮތުން މި މަޝްރޫއުގެ ދަށުން އީ.އައި.އޭ މަސައްކަތް ކުރެވި، ފެނާއި ނަރުދަމާ ނިޒާމް ފަރުމާ ކުރެވިގެން ދާނެއެވެ. އަދި ފެނާއި ނަރުދަމާ ނިޒާމުގެ ވިޔުގަ އެޅުމާއި، އާރް.އޯ ޕްލާންޓާއި ސްޓޯރޭޖް ޓޭންކް ބެހެއްޓުމާއި، ނަރުދަމާގެ ޕަމްޕް ސްޓޭޝަން ޤާއިމްކުރެވިގެން ދާނެއެވެ. މީގެ އިތުރުން ސީ އައުޓް ފޯލް އެޅުމާއި، އިދާރީ އޮފީސް ޤާއިމްކުރުުގެ އިތުރަށް ގޭގެއަށް ފެނާއި ނަރުދަމާގެ ކަނެކްޝަން ގުޅައިދިނުމުގެ މަސައްކަތް ކުރިއަށް ދާނެއެވެ.

މި އެއްބަސްވުމުގައި މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން ސޮއިކުރެއްވީ ޑިރެކްޓަރ ޖެނެރަލް ފާތިމަތު ޝާނާ ފާރޫގެވެ. އަދި ފުލެކްސިންކް ޕްރައިވެޓް ލިމިޓެޑްގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ ނަޖާހް ޝަރީފެވެ.