ލޮކްޑައުންއަކަށް ދާން ބޭނުންނުވާނަމަ މިހާރު ބޮޑެތި ފިޔަވަޅުތަކެއް އަޅަން ޖެހޭ: ޑރ. ޝަހީދު
26 ފެބުރުއަރީ 2021 | ހުކުރު 08:52ފިޔަވަޅުތަކެއް ނާޅައިފިނަމަ އަދަދުތައް މަތީގައި އަދި ވަރަށް ގިނަ ދުވަހު ހުންނާނެ ކަމަށް ބެލެވޭ
މާލޭގެ ބޮޑުތަކުރުފާނު މަގު، ކޮވިޑް-19ގެ ކޭސްތައް އިތުރުވާން ފެށުމާއި މާލެސިޓީގައި ގުޅިގެން ރޭގަނޑު 11:00ށް ފަތިހު 4:30ށް ދަނީ ކާފިއު ހިންގަމުން
ލޮކްޑައުންއަކަށް ދާން ބޭނުންނުވާނަމަ މިހާރު ބޮޑެތި ފިޔަވަޅުތަކެއް އަޅަން ޖެހޭ ކަމަށް ހެލްތް އިމަރޖެންސީ އޮޕަރޭޝަންސް ސެންޓަރު (އެޗްއީއޯސީ)ން ބުނެފިއެވެ.
ބުރާސްފަތި ދުވަހުގެ ރޭ އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި ޓެކްނިކަލް އެޑްވައިޒަރީ ގްރޫޕް (ޓެގް)ގެ މެމްބަރު ޑރ. އަޙްމަދު ޝަހީދު ވިދާޅުވީ ބަލި ހަލުވި މިނެއްގައި ފެތުރެމުންދާއިރު، މިހާރު އަޅާފައިވާ ފިޔަވަޅުތަކަށް އެދެވޭ ބަދަލެއް އަންނަމުން ނުދާ ކަަމަށެވެ. ޑރ.ޝަހީދު ވިދާޅުވީ މިހާރު އަޅާފައިވާ ފިޔަވަޅުތައް މި މިންގަނޑުގައި ދަމަހައްޓައިފިނަމަ ނުވަތަ އިތުރު ފިޔަވަޅުތަކެއް ނާޅާ މިގޮތަށް ގެންދިއުމުން މި އަދަދުތައް މަތީގައި އަދި ވަރަށް ގިނަ ދުވަހު ހުންނާނެ ކަމަށް ބެލެވޭ ކަމަށެވެ.
ޑރ. ޝަހީދު ވިދާޅުވީ 100ށްވުރެ މަތީގައި ކޭސްތައް އުޅޭއިރު، އިތުރު ފިޔަވަޅުތައް އަޅަންޖެހޭ ކަމަށާއި، މި އަދަދުގައި ހޮސްޕިޓަލްތަކަށް ހިފަހައްޓައެއް ނުލެވޭނެ ކަމަށެވެ. މިހާރު ފައިދާވާނީ ބޮޑެތި ފިޔަވަޅުތަކެއް އަޅައިގެންކަން ފާހަގަކުރައްވައި ޑރ. ޝަހީދު ވިދާޅުވީ އަވަހަށް މިކަމުން އަރައިގަނެވޭނީ އޭރުން ކަމަށާއި، އަދަދުތައް ގިނަވާނަމަ ލޮކްޑައުންއަކަށް ދާން ޖެހިދާނެ ކަމަށެވެ. އަދި ފިޔަވަޅުތައް އެޅުން ލަސްކުރާނަމަ ބޮޑެތި ފިޔަވަޅުތައް ވަރަށް ގިނަ ދުވަސްތަކެއް ވަންދެން ދަމަހައްޓަންޖެހިދާނެ ކަމުގެ އިންޒާރު ވެސް ޑރ.ޝަހީދު ދެއްވިއެވެ.
ޑރ.ޝަހީދު ވިދާޅުވީ ފިޔަވަޅުތައް ހަރުކަށި ކުރަނީ ބަލި ކޮންޓްރޯލް ކުރުމަށް ކަމަށާއި، އެފިޔަވަޅުތަކަށް އާއްމުން ބޯނުލަބާނަމަ އެކަމުގެ ހިތާމައާއި ނުރައްކާ މުޅި ގައުމަށް ކުރިމަތިވާނެ ކަމަށެވެ. އެހެންކަމުން ހުރިހާ ފަރާތްތަކުން ވެސް އެންގުންތަކާ އެއްގޮތަށް އަމަލުކުރުމަށް ޑރ. ޝަހީދު އިލްތިމާސްކުރެއްވިއެވެ.
ޖެނުއަރީ މަހުގެ 10 ވަނަ ދުވަހުން ފެށިގެން ރާއްޖޭގައި ފެންނަ ކޭސްތައް އިތުރުވެ، އެ މަހުގެ 23 ވަނަ ދުވަހުން ފެށިގެން ކޭސްތައް ރިޕޯޓް ކުރެވޭ މިންވަރު ވަނީ 100ން މައްޗަށް އަރާފައެވެ. އަދި ކޭސްތައް އިތުރުވެގެން ގޮސްފައިވާއިރު، ފާއިތުވި 24 ގަޑިއިރު 184 މީހުން ވަނީ ބައްޔަށް ޕޮޒިޓިވްވެފައެވެ.
