ބޯހިޔާވަހިކަމުގެ ވާހަކަ ހުއްޓާނުލާ ދައްކާނަން، އެމްޑީޕީގެ ސިޔާސީ ހަޔާތް ބިނާވެފައިވަނީ އެކަން ހަގީގަތަކަށް ހެދުމަށް: ރައީސް ނަޝީދު
25 ފެބުރުއަރީ 2021 | ބުރާސްފަތި 19:53ރައީސް ނަޝީދު ވިދާޅުވީ ރާއްޖޭގެ ރައްޔިތުންނަށް ބޯހިޔާވަހިކަން ކަށަވަރުވާން ޖެހޭކަމަށް
އެމްޑީޕީ ރަށްވެހި ފަތިސް ކެމްޕެއިން ތެރެއިން ރައީސް ނަޝީދު ވާހަކަފުޅުދައްކަވަނީ
ރާއްޖޭގެ ހުރިހާ ރައްޔިތުންނަށް ބޯހިޔާވަހިކަން ހޯދައިދޭންޖެހޭ ވާހަކައަކީ އެމަނިކުފާނުގެ މުޅި ސިޔާސީ ހަޔާތުގައިވެސް ދައްކަވަމުން ގެންދަވާ ވާހަކައެއް ކަމަށާއި އަދިވެސް ހުއްޓާނުލާ އެވާހަކަ ދައްކަވާނެކަމަށް އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ކުރިޔަށް އޮތް ކައުންސިލް އިންތިޚާބުގެ ކެމްޕެއިން ރަސްމީކޮށް ފެށުމަށް ބޭއްވި ރަސްމިއްޔާތުގައި ވާހަކަދައްކަވަމުން ރައީސް ނަޝީދު ވިދާޅުވީ ރާއްޖޭގެ ރައްޔިތުންނަށް ބޯހިޔާވަހިކަން ކަށަވަރުވާން ޖެހޭކަމަށެވެ. އަދި އެމްޑީޕީން ސަރުކާރުގައި ދެމި ތިބޭނަމަ އަދި ސިޔާސީ މަސައްކަތުގައި ދެމިތިބޭނަމަ އެއީ ރާއްޖޭގެ ރައްޔިތުންނަށް ދަރާފައިވާ ބޮޑު ދަރަންޏެއް ކަމަށް ނަޝީދު ވިދާޅުވިއެވެ.
އެންމެ ފަހުން ބޭއްވި އިންތިޚާބުގެ ކެމްޕެއިންގައިވެސް މާލޭގެ ރައްޔިތުން ކައިރީ އެމްޑީޕީން ގޯތި ކަނޑާފައި ދޭނެ ވާހަކަ ބުނެފައިވާނެ ކަމަށް ނަޝީދު ވިދާޅުވިއެވެ.
ބޯހިޔާވަހިކަމުގެ ވާހަކަ ދައްކަވަމުން ރައީސް ނަޝީދު އިތުރަށް ވިދާޅުވީ ތަކުރާރުކޮށްވެސް ވިދާޅުވާން އޮތް ވާހަކައަކީ މިހާތަނަށްވެސް ރައްޔިތުންނަށް ބޯހިޔާވަހިކަން ލިބިފައިވަނީ އެމްޑީޕީގެ ނިޒާމުގެ ތެރެއިން ކޮންޓްރެކްޓް ކުރެވިގެން އަޅާފައިވާ ފްލެޓްތަކުން ކަމުގައެވެ. ރައީސް ޔާމީންގެ ސަރުކާރުގެ 5 އަހަރު ހޭދަކުރެއްވީ ފްލެޓް އެޅުމުގައި ނޫންކަމަށް ވިދާޅުވެ ނަޝީދު ވިދާޅުވީ ޔާމީން ސަރުކާރުގައި މީހުން ވައްދާފައިވާ ފްލެޓްތަކަކީ އެމްޑީޕީން އުފެއްދި ކޮންޓްރެކްޓްތަކެއްގައި އަޅާފައިވާ ފްލެޓްތަކެއް ކަމަށެވެ.
ނަޝީދު ވިދާޅުވީ މިހާރު ކައުންސިލްތަކުގެ ޤާނޫނަށް ގެނެސްފައިވާ ބަދަލުތަކާއެކު ކައުންސިލްތަކަށް ފްލެޓް އެޅުމުގެ ޖާގަ ލިބިދޭ ކަމަށެވެ. ބިން މިލްކުކުރުމާއި ބިމުން ވިޔަފާރި ކުރުމުގެ ބާރު ކައުންސިލްތަކަށް މިހާރު ޤާނޫނުން ލިބިދޭކަމަށް ނަޝީދު ވިދާޅުވިއެވެ. ކައުންސިލްތަކަށް ޤާނޫނީ ގޮތުން ނުދޭ އެއްވެސް ބާރެއް ނެތްކަމަށާއި އެހެންކަމުން މިހާރު ދެއްކޭނެ އެއްވެސް ހުއްޖަތެއް ނޯންނާނެކަމަށް ނަޝީދު ވިދާޅުވިއެވެ.
ކުރިޔަށް އޮތް އިންތިޚާބުގައި އެމްޑީޕީގެ ފަރާތުން ކައުންސިލްތަކުގެ މޭޔަރުންނަށް ކުރިމަތިލައްވާފައިވާ ފަރާތްތަކުގައި ފްލެޓް އެޅުމުގެ ވިސްނުން ހުންނާނެކަމަށް ނަޝީދު ވިދާޅުވިއެވެ. އަދި މާލޭގެ ރައްޔިތުންނަށް ބޯހިޔާވަހިކަން އެމްޑީޕީން ހޯދައިދޭނެކަމަށް ވިދާޅުވެ ނަޝީދު ވިދާޅުވީ މާލޭގެ ރައްޔިތުން އެއުންމީދު ގެއްލުވާލައިގެން ނުވާނެކަމަށެވެ.
