އެލިސަން ބެކާގެ ބައްޕަ ގެނބިގެން މަރުވެއްޖެ

ލިވަޕޫލަށް ކުޅެމުން އަންނަ ބްރެޒިލުގެ ގޯލްކީޕަރު އެލިސަން ބެކާގެ ބައްޕަ ޖޯސޭ ބެކާ ގެނބިގެން މަރުވެއްޖެއެވެ.

ރިޕޯޓުތައް ބުނާ ގޮތުން އުމުރުން 57 އަހަރުގެ ޖޯސޭ މަރުވީ އޭނާ ޗުއްޓީ ހޭދަކުރަންދާ ގޭގެ ކައިރީގައި އޮން ފެންގަޑެއްގައި ފަތަން އުޅުމުގެ ތެރޭގައެވެ. އެގޮތުން ބުދަ ދުވަހުގެ ހަވީރު ބްރެޒިލުގެ ގަޑިން 17:00 ގައި ޖޯސޭ ގެއްލުނު ކަމަށް ރިޕޯޓުކުރުމާއެކު، ޖޯސޭ ހޯދުމުގައި ފަޔާ ޑިޕާޓްމަންޓުން ވަނީ ހަރަކާތްތެރިވާން ފަށާފައެވެ. އަދި އޭނާ ފެނިފައިވަނީ ބުދަ ދުވަހުގެރޭ 23:59 ގައި ކަމަށާއި، ފެނުނުއިރު ޖޯސޭ ގެނބިގެން މަރުވެފައިވާ ކަމަށް އެ ގައުމުގެ ފުލުހުން ވަނީ ހާމަކޮށްފައެވެ.

މިކަމާ ގުޅިގެން އެލިސަން އާއި އޭނާގެ ކޮއްކޮ މިއުރިއެލް ބެކާ މީގެ ކުރިން އެކުގައި ކުޅުނު ބްރެޒިލުގެ ކުލަބެއް ކަމަށްވާ އިންޓަނޭސިއޮނަލުން ނެރުނު ބަޔާނުގައި ބުނެފައިވަނީ އެ ދެ ކުޅުންތެރިންގެ ބައްޕަ މަރުވި ޚަބަރު ލިބުމުން، އެ ކުލަބުގެ ހުރިހާ ކުޅުންތެރިންނާއި އޮފިޝަލުން އެކަމާ ހިތާމަކުރާ ކަމަށެވެ. އަދި މިއުރިއެލް މިހާރު ކުޅެމުން އަންނަ ކުލަބު ކަމަށްވާ ފްލުމިނެންސޭއިންވެސް ވަނީ އެލިސަން އާއި މިއުރިއެލްގެ އާއިލާއަށް ތަޢުޒިޔާކިޔާފައެވެ.

ކުއްލި ގޮތަކަށް ގެނބިގެން ޖޯސޭ މަރުވުމަކީ ލިވަޕޫލުގެ އެއް ނަންބަރު ގޯލްކީޕަރު އެލިސަންއަށް ލިބޭނެ އިތުރު ނުތަނަވަސްކަމެކެވެ. އެގޮތުން މި ފަހަކަށް އައިސް އެލިސަންގެ ފަރާތުން ގިނަ ގޯސްތަކެއް ފެނިގެންގޮސްފައިވާއިރު، މި ހާދިސާއާ ގުޅިގެން އެކަމުގެ އަސަރުތައްވެސް އޭނާއަށް ކުރާނެ ކަމަށް ބެލެވެއެވެ.