އާ ގާނޫނުގެ މަގްސަދަކީ ޓުއާ އޮޕަރޭޓަރުންގެ ވިޔަފާރި ދުނިޔޭގެ ފެންވަރަށް ގެންދިއުން - ރައީސް ނަޝީދު
ޓޫއާ އޮޕަރޭޓަރުންގެ ވިޔަފާރި އަކީ އެންމެ ފައިދާ ބޮޑު އެއް ފިޔަފާރި
ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދު ހުކުރުދުވަހު ބޭއްވި ނޫސްވެރިންގެ ބައްދަލުވުމުގެ ތެރެއިން
އަލަށް އެކުލަވައިލަން މަސައްކަތްކުރާ ޓުއާ އޮޕަރޭޓަރުންނާއި ޓުއާ އެޖެންސީތަކުގެ ޚާއްސަ ގާނޫނުގެ މަޤްސަދަކީ ރާއްޖޭގެ ފަތުރުވެރިކަމުގެ ދާއިރާގައި މަސައްކަތްކުރާ ޓުއާ އޮޕަރޭޓަރުންނާއި، އެޖެންސީތަކުގެ ވިޔަފާރި ދުނިޔޭގެ ފެންވަރަށް ފުޅާކޮށް ކުރިއެރުވުން ކަމަށް ރައްޔިތުންގެ މަޖިލީހުގެ ރައީސް، މުހައްމަދު ނަޝީދު ވިދާޅުވެއްޖެއެވެ.
ޓުއާ އޮޕަރޭޓަރުންނާއި ޓުއާ އެޖެންސީތަކުގެ ޚާއްސަ ގާނޫނު ހެދުމަށް ކަމާބެހޭ ފަރާތްތަކާ އެކު މަސައްކަތު ބައްދަލުވުންތައް ބާއްވާއިރު، އެ ބައްދަލުވުންތައް ފެށުމަށް ބުރާސްފަތި ދުވަހު ބޭއްވި ރަސްމިއްޔާތުގައި ވާހަކަދައްކަވަމުން ރައީސް ނަޝީދު ވިދާޅުވީ ރާއްޖޭގެ ފަތުރުވެރިކަމުގެ ދާއިރާގައި ހިމެނޭ އެންމެ ފައިދާ ބޮޑު އެއް ވިޔަފާރި އަކީ ޓުއާ އޮޕަރޭޓަރުންނާއި އެޖެންސީތަކުގެ ވިޔަފާރި ކަމަށެވެ. އަދި އައު ގާނޫނުގެ މައިގަނޑު މަގްސަދަކީ އެ ވިޔަފާރި އިތުރަށް ފުޅާކޮށް ދުނިޔޭގެ ފެންވަރަށް ގެންދިޔުން ކަމަށް ވެސް ވިދާޅުވިއެވެ.
ރައީސް ނަޝީދު ވިދާޅުވީ ރާއްޖެއަކީ ޓޫރިޒަމް ދާއިރާއަށް ބަލާއިރު އެންމެ އަގުބޮޑު އެއް ޑެސްޓިނޭޝަން ކަމަށެވެ. އެހެންކަމަށް ވާއިރު، ރާއްޖެއަށް ފަތުރުވެރިން ފޮނުވާ އޮޕަރޭޓަރ ނުވަތަ އެޖެންސީއަކީ ދިވެހި އެޖެންސީ އަކަށް ނުވާންވީ އެއްވެސް ސަބަބެއް ނުވިސްނޭ ކަމަށެވެ.
ރައީސް ނަޝީދު ވިދާޅުވީ ފަތުރުވެރިކަމުގެ ދާއިރާތަކުގެ ތެރެއިން ވަކި ބޮޑު ވިޔަފާރިއެއްގެ ގޮތުގައި ދައްކާ ޓުއާ އޮޕަރޭޓަރުންނާއި އެޖެންސީތަކުގެ ވިޔަފާރި ވަކިން ނަގައި ބޮޑުކޮށް ދައްކާއިރު، އެ ވިޔަފާރި ފުޅާކުރުމަކީ އެންމެންގެ ވެސް ޒިންމާއެއް ކަމަށެވެ. އެގޮތުން ބުރާސްފަތި ދުވަހު ފެށި ބައްދަލުވުންތަކުގައި އެޖެންސީތަކަށް ޝަކުވާތަކާއި ކަންބޮޑުވުންތައް ހުށަހެޅުމުގެ ފުރުސަތު ހުޅުވާލާފައިވާއިރު، އެ ޝަކުވާތައް އަހާފައި ނިންމާނުލާނެ ކަމަށާއި، އެ ޝަކުވާތަކަށް ހައްލު ހޯދައިދިނުމަށް ހުރިހާ އިދާރާތަކުން ވެސް މަސައްކަތްކުރާނެ ކަމަށް ވިދާޅުވިއެވެ.
ނަޝީދު ވިދާޅުވީ ރާއްޖޭގައި ފަތުރުވެރިކަމުގެ ސިނާޢަތް ހިންގަނީ ރިސޯޓު ވެރިން ފެށިގެން ގޮސް ދާއިރާގައި މަސައްކަތްކުރާ އެންމެ އާދައިގެ މަސައްކަތު މީހާއާ ހަމައަށް އެންމެން ވެސް ވަރަށް ގުޅިގެން ކަމަށެވެ. އަދި އަލަށް ތައާރަފުކުރާ އެ ގާނޫނުގެ ބޭނުމަކީ ދާއިރާގެ އެންމެނަށް ގުޅިގެން މަސައްކަތް ކުރެވޭނެ ޕްލެޓްފޯމެއް ގާއިމްކުރުން ކަމަށް އެމަނިކުފާނު ވިދާޅުވިއެވެ.
