ޞައްޙަ ލިޔެކިޔުން ނެތި ރާއްޖޭގައި އުޅޭ ބިދޭސީންނަށް ވެކްސިން ދިނުމުގެ ޕްރޮގްރާމް ބުދަ ދުވަހު ފަށައިފިއެވެ.

އެޗްޕީއޭއިން ބުނީ ބުދަ ޞައްޙަ ލިޔެކިޔުން ނެތި ނުގަވާއިދުން ރާއްޖޭގައި އުޅޭ ބިދޭސީންނަށް ވެކްސިން ދިނުމުގެ މަސައްކަތް ބުދަ ދުވަހު ފަށާފައިވާ ކަމަށެވެ. އަދި އެކަން ކުރިއަށް ގެންދަނީ އިސްލާމީ މަރުކަޒުގައި ކަމަށް ވެސް އެޗްޕީއޭއިން ބުނެފައިވެއެވެ.

ރާއްޖޭގައި މި މަހުގެ އެއް ވަނަ ދުވަހު ވެކްސިން ޖަހަން ފަށާފައިވާއިރު މިހާރު ވަނީ އުމުރުން 25 އަހަރުން މަތީގެ އެންމެނަށް ވެސް ވެކްސިން ޖެހުމަށް ހުޅުވާލާފައެވެ. ވެކްސިން ޖެހުމުގެ ތައްޔާރީތައް ރާއްޖެއިން ވާން ފެށި އިރު ވެސް ރައީސް އިބްރާހިމް މުހައްމަދު ޞާލިޙް ވަނީ އެއްވެސް ތަފާތުކުރުމެއް ނެތި ރާއްޖޭގައި ދިރިއުޅޭ ދިވެހިންނާއި ބިދޭސީންނަށް ވެސް ވެކްސިން ލިބޭނެ އިންތިޒާމު ފަހިކޮށްދެއްވާނެ ކަމުގެ ވައުދުވެވަޑައިގެންފައެވެ.

ރާއްޖޭގައި ވެކްސިން ޖެހުމަށް ބޭނުންވާ މީހުންނަށް ވަކި ޕޯޓަލެއް މެދުވެރިކޮށް ރަޖިސްޓްރީވުމަށް ހުޅުވާލާފައިވާއިރު، ޞައްޙަ ލިޔެކިޔުން ނެތް ބިދޭސީން ވެކްސިން ޖަހަން ރަޖިސްޓްރީ ކުރަން ހަމަޖައްސާފައި ވަނީ އިނގިލީގެ ނިޝާން ބޭނުންކޮށްގެންނެވެ. އަދި ލިޔެކިޔުން އޮތް ބިދޭސީން ރަޖިސްޓްރީވުމަށް ހުޅުވާފައިވަނީ  ޕާސްޕޯޓު ނުވަތަ ވޯކް ވިސާ ބޭނުންކޮށްގެންނެވެ.

ރާއްޖެއިން މިހާތަނަށް ޖުމްލަ 85،110 މީހުން ވެކްސިން ޖަހާފައިވާއިރު، އޭގެ ތެރެއިން 61،777 މީހުން ވެކްސިން ޖެހީ މާލެ ސަރަހައްދުންނެވެ. އުމުރުން 18 އަހަރާއި 25 އަހަރާ ދެމެދުގެ އުމުރުފުރައިގެ މީހުންގެ ތެރެއިން ދިގު މުއްދަތަކަށް ބޭސް ބޭނުންކުރާ މީހުންނަށާއި، 25 އަހަރުން މަތީގެ އެންމެނަށް ވެކްސިން ދިނުމަށް އެޗްޕީއޭއިން ވަނީ ނިންމާފައެވެ.

މީގެ އިތުރުން އުމުރުން ދުވަސްވީ މީހުންނާއި، ބައްޔެއްގެ ސަބަބުން ނުވަތަ ނުކުޅެދުންތެރިކަމެއްގެ ސަބަބުން އެނދުމަތިވެފައިވާ މީހުންގެ ރައްކަލަކަށް އެފަދަ މީހުންގެ އެހީތެރިން ވެކްސިން ޖެހުން މުހިންމު ކަމަށް އެޗްޕީއޭއިން ވަނީ ބުނެފައެވެ.

ކުންފުނިތަކާއި ކުޅިވަރު ކުލަބު ޖަމިއްޔާތަކާއި ފަތުރުވެރިކަމުގެ ޚިދުމަތް ދޭ ތަންތަނާއި މަސްވެރިކަމާއި ދަނޑުވެރިކަމުގެ ދާއިރާއާ ގުޅުންހުރި މުވައްޒަފުން ގުރޫޕު ވެކްސިނޭޝަނަށް ރަޖިސްޓްރީވުމުގެ ފުރުސަތު  ވެސް ވަނީ ހުޅުވާލާފައެވެ. މި ފުރުސަތު ހުޅުވާލާފައިވަނީ ހަތަރު ބަޔަކަށް ބަހާލައިގެންނެވެ. އެގޮތުން ކޮންމެ ގްރޫޕެއްގައި ވެސް ހިމެނޭ މީހުން އެޕޮއިންޓްމަންޓް ހެއްދުމަށް ގުޅާނެ ވަކި އިދާރާއެއް ވަނީ ކަނޑައަޅާފައެވެ.

މި މަހުގެ 1 ވަނަ ދުވަހުން ފެށިގެން ރައްޖޭގައި ވެކްސިން ޖެހުމުގެ ގައުމީ ކެމްޕެއިން ފަށާފައިވާ އިރު، ކޮންމެ ހަފުތާއެއްގެ ވެސް ހުކުރު ފިޔަވައި މާލެ އަދި ހުޅުމާލޭގައި ހެނދުނު 9:00ން ހަވީރު 4:30ށް ވެކްސިން ދިނުމުގެ ކަންކަން ކުރިއަށް ދާނެއެވެ. އަދި ވިލިމާލޭގައި ހެނދުނު 9:00ން މެންދުރުފަހު 1:00ށް ވެކްސިން ޖެހުމުގެ ކަންކަން ކުރިއަށްދާނެ ކަމަށް އެޗްޕީއޭއިން ބުނެއެވެ. އަދި ރާއްޖޭގެ ހުރިހާ އަތޮޅަކަށް ވެކްސިން ފޮނުވާފައިވާ ކަމަށް ވެސް އެޗްޕީއޭއިން ވަނީ ބުނެފައެވެ.