25 އަހަރުން މަތީގެ މީހުންނަށް ވެކްސިން ދެނީ
އުމުރުން 18 އަހަރުން މަތީގެ ދާއިމީ ބޭސް ބޭނުންކުރާ ފަރާތްތަކަށް ވެސް ވެކްސިން ދޭން ވަނީ ފަށާފައި
އައްޑޫގައި ވެކްސިން ދިނުމުގެ ޕްރޮގްރާމުގެ ތެރެއިން
25 އަހަރުން މަތީގެ އެންމެނަށް ވެކްސިން ދޭން ނިންމާފައިވާކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)ން ހާމަކޮށްފިއެވެ.
މި މަހުގެ 1 ވަނަ ދުވަހުން ފެށިގެން ރާއްޖޭގައި ވެކްސިން ދިނުމުގެ ޕްރޮގްރާމް ފަށާފައިވާ އިރު، އެކި އުމުރު ފުރާތަކަށް ވެކްސިން ދިނުމުގެ ކަންކަން ވަނީ ފަށާފައެވެ. އެގޮތުން ބުދަ ދުވަހުން ފެށިގެން އުމުރުން 25 އަހަރުން މަތީގެ ހުރިހާ ފަރާތްތަކަށް ވެކްސިން ދިނުމަށް ނިންމާފައިވާ އިރު، އުމުރުން 18 އަހަރުން މަތީގެ ދާއިމީ ބޭސް ބޭނުންކުރާ ފަރާތްތަކަށް ވެސް ވެކްސިން ދޭން ވަނީ ނިންމާފައެވެ.
މީގެ އިތުރުން އެނދުމަތިވެފައިވާ ބަލި މީހުން ބެލެހެއްޓުމު އުޅޭ ފަރާތްތަކަށް ވެސް ވެކްސިން ދޭން ނިންމާފައި ވާކަމަށް އެޗްޕީއޭއިން ބުނެއެވެ. އެޗްޕީއޭއިން ބުނީ ވެކްސިން ޖެހުން ސޯޝަލް ސެންޓަރާއި އިސްލާމީ މަރުކަޒު އަދި ހުޅުމާލެ ވެކްސިނޭޝަން ސެންޓަރުގެ އިތުރުން އަދި ވިލިމާލެ ޒުވާނުން މަރުކަޒުގައި ކުރިއަށް ދާނީ ހެނދުނު 09:00ން ހަވީރު 04:30ށް ކަމަށެވެ. އަދި ރައްޔިތުންގެ މަޖިލީހާއި ޓްރީޓޮޕް ހޮސްޕިޓަލުގައި ވެކްސިން ޖަހާނީ ހެނދުނު 09:00ން މެންދުރު 12:00ށް ކަމަށެވެ. އޭޑީކޭ ހޮސްޕިޓަލާއި ރައްޔިތުންގެ މަޖިލީހުގެ އިދާރާ ގުޅިގެން ކުރިއަށް ގެންދާ ވެކްސިން ޖެހުމުގެ ޕްރޮގްރާމުގައި 24 ފެބްރުވަރީއިން ފެށިގެން އުމުރުން 30 އަހަރުން މަތީގެ މީހުންނަށް ވެކްސިން ޖެހުމަށް ވަނީ ފުރުސަތު ހުޅުވާލާފައެވެ.
ވެކްސިން ޖަހަންދާއިރު ސަމާލުކަންދޭން ޖެހޭ ވަކި ކަންތައްތަކެއް ބަޔާންކޮށް އެޗްޕީއޭ އިން ބުނީ އައިޑީކާޑު ނުވަތަ ކާކުކަން އެނގޭ ރަސްމީ ލިޔުމެއް ގެންދަންވާނެ ކަަމަށާއި ކޮވިޑް-19ގެ އެެއްވެސް އަލާމާތެއް ނެތުމާއި ކަރަންޓީންގައި ހުރި މީހަކަށް ނުވުމުގެ އިތުރުން ގަޔަށް ދޫ، ފަސޭހައިން ވެކްސިންޖަހާތަން (ކޮނޑު) ދެއްކޭނެ ހެދުމެއް ލުމަށް ވެސް ވަނީ އެދިފައެވެ. އަދި ވެކްސިން ޖަހަންދާއިރު ރަނގަޅަށް ކައިގެން ހުރުމާއި އަމިއްލަ ފެންފުޅިއެއް ގެންދިޔުމާއި ވެކްސިން ޖަހަންދާއިރު އެކުގައި އެކަަކަށްވުރެ ގިނަ މީހުން ނުގެންދިޔުމާއި ބޭނުންކުރަމުންދާ ބޭހެއްވާނަމަ އެ ބޭހުގެ މައުލޫމާތު ގެންދިޔުން ވެސް މުހިންމު ކަމަށް އެޗްޕީއޭ އިން ވަނީ ބުނެފައެވެ.
"ދިފާޢު" ގެ ނަމުގައި ވެކްސިން ޖެހުމުގެ ޤައުމީ ކެމްޕޭން ރާއްޖޭގައި ފަށާފައިވަނީ ފެބްރުއަރީ 1 ވަނަ ދުވަހުއެވެ. އޭގެފަހުން ރާއްޖޭގައި ކޮންމެ ދުވަހަކުހެން ވެކްސިން ޖަހަމުން އައިސް ފެބްރުއަރީ މަހުގެ 18 ވަނަ ދުވަހު އެޗްޕީއޭއިން ބުނެފައިވަނީ މީގެ ފަހުން ހުކުރު ދުވަސްތަކުގައި ވެކްސިން ނުޖަހާނެކަމަށާއި، ދެން ވެކްސިން ޖަހާނީ ކޮންމެ ހަފްތާއެއްގެ ވެސް ހޮނިހިރުން ފެށިގެން ބުރާސްފަތި ދުވަހާ ހަމައަށްކަމަށެވެ.
