އިންތިޚާބާ ގުޅިގެން އީސީގެ ރަސްމީ މަސައްކަތު ގަޑި އިތުރުކޮށްފި
22 ފެބުރުއަރީ 2021 | ހޯމަ 03:59ރަސްމީ މަސައްކަތު ގަޑިއަކީ ހެނދުނު 08:00ން ހަވީރު 16:00ށް
އިލެކްޝަންސް ކޮމިޝަންގެ މެންބަރުން، ކައުންސިލް އިންތިޚާބު ބޭއްވުމަށް ހަމަޖެހިފައި ވަނީ އޭޕްރީލް މަހުގެ 10 ވަނަ ދުވަހު
ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތް ކުރާ ކޮމެޓީގެ އިންތިޚާބާ ގުޅިގެން އިލެކްޝަންސް ކޮމިޝަން (އީސީ)ގެ ރަސްމީ މަސައްކަތު ގަޑި އިތުރުކޮށްފިއެވެ.
އީސީ އިން ބުނީ އެ ކޮމިޝަނުން ވަކިގޮތެއް އަންގަންދެން ރަސްމީ މަސައްކަތު ގަޑިއަކީ ހެނދުނު 08:00ން ހަވީރު 16:00ށް ކަމަށެވެ. އެގޮތަށް އޮފީސް ހުޅުވި ނަމަވެސް އާންމު ފަރާތްތަކުން ކޮމިޝަނަށް ހާޒިރުވެގެން ޚިދުމަތް ހޯދުމުގެ އިންތިޒާމް ހަމަޖެހިފައި ނުވާ ކަމަށާއި، ކޮމިޝަނުން އާންމުންނަށް ޚިދުމަތްތައް ފޯރުކޮށްދެމުންދާނީ އެ ގަޑިތަކުގައި، ކުރިން ވެސް ޚިދުމަތް ފޯރުކޮށްދިން ގޮތަށް ކޮމިޝަންގެ އީމެއިލް އަދި އީ-ގަވަރމެންޓް (ޖެމްސް) މެދުވެރިކޮށް ކަމަށް ވެސް ވަނީ ބުނެފައެވެ.
އީސީ އިން އިންތިޚާބާއި އަންހެނުންގެ ތަރައްޤީއަށް މަސައްކަތް ކުރާ ކޮމެޓީގެ އިންތިޚާބު ބޭއްވުމަށްޓަކައި ވާންޖެހޭ ތައްޔާރީތައްވަމުން އަންނައިރު އާދިއްތަ ދުވަހު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް މިވަނީ، އިލެކްޝަންސް ކޮމިޝަނުގެ މެންބަރުކަމުގެ މަޤާމަށް ޑޮކްޓަރ މުޙައްމަދު ޒާހިރު ޢައްޔަން ކުރައްވާފައެވެ.
ޑޮކްޓަރ މުޙައްމަދު ޒާހިރު މި މަޤާމަށް ޢައްޔަންކުރެއްވުމަށް އާދިއްތަ ދުވަހުގެ މެންދުރު ރައީސުލްޖުމްހޫރިއްޔާގެ އޮފީހުގައި ރަސްމިއްޔާތެއް ބާއްވާފައިވާއިރު އެ މަނިކުފާނަށް އިލެކްޝަންސް ކޮމިޝަނުގެ މެންބަރުކަމުގެ ހުވާ ލައިދެއްވާ ހައިކޯޓުގެ އިސް ފަނޑިޔާރު އަލްއުސްތާޛު ހާތިފް ޙިލްމީއެވެ.
އީ.ސީ.އަށް މެމްބަރަކު މި ޢައްޔަނުކުރީ އީ.ސީ.ގެ ނައިބު ރައީސް ކަމުގެ މަގާމުގައި ހުންނެވި އަހުމަދު އަކްރަމް އެމަގާމުން މިިދިޔަ އަހަރުގެ ނޮވެމްބަރ މަހުގެ 19 ވަނަ ދުވަހު އިސްތިޢުފާ ދެއްވުމާ ގުޅިގެންނެވެ. އަކްރަމް އިސްތިޢުފާދެއްވީ މަގާމުން ވަކިކުރުމަށް މިނިވަން މުއައްސަސާތަކުގެ ކޮމިޓީން ފާސްކޮށް އެމައްސަލަ ތަޅުމަށް ފޮނުވާފައިވަނިކޮށެވެ.
ކައުންސިލް އިންތިޚާބު ބޭއްވުމަށް ހަމަޖެހިފައި ވަނީ އޭޕްރީލް މަހުގެ 10 ވަނަ ދުވަހުއެވެ.
