ކޮވިޑްގެ ކޭސްތައް ދަށެއް ނުވޭ، އަދި ދެތިން ހަފުތާ ނަގާނެ: ޑރ. ނަޒްލާ
22 ފެބުރުއަރީ 2021 | ހޯމަ 03:37ކޮވިޑްގެ ކޭސްތަކުގެ އަދަދުތައް ހުރީ ސްޓޭބަލް ވަރެއްގައި
ނޫސްވެރިންގެ ބައްދަލުވުމުގައި އެޗްއީއޯސީގެ ތަރުޖަމާނު ޑރ. ނަޒްލާ ރަފީގު ވާހަކަދައްކަވަނީ
ކޮވިޑް-19ގެ ކޭސްތައް މިހާރު ހުރީ ވަކިވަރަކަށް ހިފެހެއްޓިފައި ކަމަށް ހެލްތް އެމަރޖެންސީ އޮޕަރޭޝަން ސެންޓަރ (އެޗްއީއޯސީ)ން ބުނެފިއެވެ.
އާދިއްތަ ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި އެޗްއީއޯސީގެ ތަރުޖަމާނު ޑރ. ނަޒްލާ ރަފީގު ވިދާޅުވީ ކޮވިޑްގެ ކޭސްތަކުގެ އަދަދުތައް ހުރީ ސްޓޭބަލް ވަރެއްގައި ކަމަށާއި، ދަށްވަމުން ނުދާ ކަމަށެވެ. އަދި ވިދާޅުވީ ބައްޔަށް ޕޮޒިޓިވްވާ މީހުންގެ ރޭޓް ދަށްވުމަށް ވަގުތުކޮޅެއް ނަގާނެ ކަމަށެވެ.
ޑރ. ނަޒްލާ ވިދާޅުވީ ބަލީގެ ތިން ވަނަ ރާޅާއެކު އަޅާފައިވާ ފިޔަވަޅުތައް އިތުރަށް ހަރުކަށިކުރުމުން ނަތީޖާ ފެންނާނީ ގާތްގަނޑަކަށް ދެތިން ހަފްތާ ފަހުން ކަމަށެވެ. އަދި ވިދާޅުވީ އާދިއްތަ ދުވަހުގެ ވަގުތެއްގައި ކޭސްތައް ފެންނަ މިންވަރާއި، އަޅާފައިވާ ފިޔަވަޅުތަކާ ބެހޭ ގޮތުން އިތުރަށް ބަލައި މަޝްވަރާކުރާނެ ކަމަށެވެ. އަދި އެއަށްފަހު އިތުރަށް ފިޔަވަޅުތައް އަޅަންޖެހޭ ކަމަށްވާނަމަ އެފިޔަވަޅެއް އަޅާނެ ކަމަށް ޑރ. ނަޒްލާ ވިދާޅުވިއެވެ.
މީގެ އިތުރުން ޑރ. ނަޒްލާ ވިދާޅުވީ މާލޭގައި ވެކްސިނޭޝަން ޕްރޮގްރާމް ކުރިއަށް ގެންދާހާ އަވަހަށް އަތޮޅުތެރޭގެ ރަށްތަކުގައި ކުރިއަށް ނުގެންދެވުނު ނަމަވެސް މިހާރު ހުރިހާ އަތޮޅަކަށް ވެކްސިން ފޮނުވާފައިވާ ކަމަށެވެ. އަދި ރަށްރަށުގައި ވެކްސިން ދެމުންދަނީ ފުރަތަމަ ސިއްހީ ޚިދުމަތްތެރިންނަށްށާއި، 80 އަހަރުން މަތީގެ މީހުންނަށް ކަމަށެވެ. ޑރ. ނަޒްލާ ވިދާޅުވީ ކުރިއަށް އޮތްތަނުގެ އަތޮޅުތެރޭގެ ރަށްތަކުގައި ވެކްސިން ދިނުމުގެ ކަންކަން އިތުރަށް ފުރިހަމަ ކުރެވި، އާބާދީގެ ބޮޑު ބަޔަކަށް ވީހާ ވެސް އަވަހަށް ވެކްސިންދިނުމަށް މަސައްކަތް ކުރާނެ ކަމަށެވެ.
މިމަހުގެ އެއްވަނަ ދުވަހު ވެކްސިނޭޝަން ޕްރޮގްރާމް ފަށާފައިފައިވާއިރު، މިހާތަނަށް 75,000 ވުރެ ގިނަ މީހުންނަށް ވަނީ ވެކްސިންގެ ފުރަތަމަ ޑޯޒް ދީފައެވެ.
