ޖޯންސަންގެ ވެކްސިނަށް ޑަބްލިއުއެޗްއޯގެ ހުއްދަ ހޯދުމަށް ހުށައަޅައިފި

ޖޯންސަން އެންޑް ޖޯންސަން އިން ކޮވިޑް-19 އަށް އުފެއްދި ވެކްސިން ބޭނުންކުރުމުގެ އެމެޖެންސީ ހުއްދަ ހޯދުމަށް ދުނިޔޭގެ ސިއްހަތު ޖައްމިއްޔާ، ޑަބްލިއުއެޗްއޯއަށް ހުށައަޅައިފިއެވެ.

ޖޯންސަންއިން ވަނީ ކޮވެކްސް ފެސިލިޓީގެ ދަށުން ވެކްސިން ފޯރުކޮށްދޭން ބޭނުންނަމަ ޑަބްލިއުއެޗްއޯގެ ހުއްދަ ހޯދުން މުހިންމު ކަމަށް ފާހަގަކޮށްފައެވެ. އަދި ޑަބްލިއުއެޗްއޯ އަށް ހުށައަޅާފައިވަނީ އެންމެ ފަހުގެ ޓްރަޔަލްތަކުގެ ނަތީޖާކަމަށް ޖޯންސަންއިން ބުނެއެވެ.

ޖޯންސަންގެ ކޮވިޑް-19 ވެކްސިނަށް އެމެރިކާގެ ފުޑް އެންޑް ޑްރަގް އޮތޯރިޓީގެ ހުއްދަ ހޯދަންވެސް މިހާރު ވަނީ ހުށައަޅާފައެވެ.

މިވެކްސިންގެ އެންމެ ފަހުގެ ނަތީޖާތައް ދައްކާގޮތުން ވެކްސިނަކީ 66 އިންސައްތަ ރައްކާތެރިކަން ކަށަވަރުކޮށްދޭ ވެކްސިނަކަށްވާއިރު، ޖޯންސަން އިން ވަނީ އަލަށް ފެނިގެން އުޅޭ ވޭރިއަންޓްތަކަށް ވެސް މިވެކްސިން ޓެސްޓުކޮށްފައެވެ. އެގޮތުން އެމެރިކާގައި އުޅޭ ވޭރިއަންޓަށް މިވެކްސިން މަސައްކަތްކުރާވަރު 79 އިންސައްތަ ކާމިޔާބުއިރު، ލެޓިން އެމެރިކާގައި އުޅޭ ވޭރިއަންޓްތަކަށް ވެކްސިން އަސަރުކުރާވަރު ދައްކަނީ 66 އިންސައްތައެވެ. އަދި ސައުތު އެފްރިކާގެ ވޭރިއަންޓަށް ވެކްސިން އަސަރުކޮށްފައި ވަނީ 57 އިންސައްތައެވެ.