މާޔަން އާއި އެފްއޭއެމާ ގުޅޭ މައްސަލައެއް މަޖިލީހުން ބަލަނީ

އޭޝިއަން ފުޓްބޯލް ކޮންފެޑެރޭޝަން (އޭއެފްސީ) ގެ އިންތިޚާބުގައި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ފަރާތުން ވާދަކުރެއްވި މަރިޔަމް މުޙައްމަދު (މާޔަން) ގެ ކަންބޮޑުވުންތަކާ ގުޅޭ މައްސަލައެއް ބަލަން ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު އެދިވަޑައިގެންފިއެވެ.

އޭއެފްސީގެ އިންތިޚާބުގައި އެ އިދާރާގެ ހިންގާ ކޮމިޓީގެ އަންހެން މެމްބަރުގެ ގޮނޑި އަދި ފީފާ ކައުންސިލަށް އޭއެފްސީން ކަނޑައަޅާ އަންހެން މެންބަރުގެ ގޮނޑިއަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ނޮމިނޭޓްކުރި މާޔަންއަށް ވަނީ ނާކާމިޔާބުވެފައެވެ. އެ އިންތިޚާބުގައި އެ ޖަމުޢިއްޔާގެ ހިންގާ ކޮމިޓީގެ އަންހެން މެމްބަރުންގެ ސައުތު ޒޯނުގެ ގޮނޑި ކާމިޔާބުކުރެއްވީ ބަންގްލަދޭޝްގެ މަހްފޫޒާ އަޚްތަރު ކިރަންއެވެ.

އެއާއެކު މާޔަން ވަނީ އޭއެފްސީގެ ހިންގާ ކޮމިޓީގެ ސައުތު ޒޯނުގެ ގޮނޑި އޭނާއާ ވާދަކުރެއްވި މަހްފޫޒާ އަޚްތަރު ކިރަންއަށް ކާމިޔާބުކޮށްދެއްވަން އޮލިމްޕިކް ކައުންސިލް އޮފް އޭޝިއާގެ ރައީސް ކުވައިތުގެ ޝެއިޚް އަޙްމަދު އަލް-ފަހަދު އަލް-ސަބާހު ނުފޫޒު ފޯރުވިކަމަށް ތުހުމަތުކޮށްފައެވެ. އަދި އެ މައްސަލަ ކޯޓް އޮފް އާބިޓްރޭޝަން ފޯ ސްޕޯޓްސް (ސީއޭއެސް) އިން ބެލިއިރު، އެ ކޯޓުން ވަނީ މާޔަންއަށް ތާއީދުކޮށްފައެވެ.

ރައްޔިތުންގެ މަޖިލީހުގެ ބުދަ ދުވަހުގެ ޖަލްސާ ފެއްޓެވުމުގެ ކުރިން ރައީސް ނަޝީދު ވިދާޅުވީ އޭއެފްސީގެ އިންތިޚާބުގައި ހިނގައިދިޔަ ކަންތައްތަކާ ގުޅިގެން އެ ފެޑެރޭޝަނާ ދެކޮޅަށް މާޔަން ހުށަހެޅި މައްސަލައިގައި ހިމެނޭ ކަންތައްތަކަށް ދުނިޔޭގެ ކުޅިވަރުގެ އެންމެ މަތީ ކޯޓު ކަމަށްވާ ސީއޭއެސްއިން ތާއީދުކޮށްފައިވާއިރު، ކަންބޮޑުވާ އެތައް ކަންތައްތަކެއް ވެސް ފާހަގަކޮށްފައިވާ ކަމަށެވެ. އެގޮތުން މިހާތަނަށްވެސް މި ކަމުގައި މާޔަންއަށް އެފްއޭއެމުގެ އެއްބާރުލުން ލިބިފައިނުވާ ކަމަށްވެސް ނަޝީދު ވިދާޅުވިއެވެ.

މާޔަން އާއި އެފްއޭއެމާ ގުޅޭ މައްސަލައެއް މަޖިލީހުން ބަލަން ރައީސް ނަޝީދު އެދިވަޑައިގެންނެވިއިރު، އަންގާރަ ދުވަހު މާޔަން ވަނީ މަޖިލީހުގައި ރައީސް ނަޝީދާ ބައްދަލުކުރައްވާފައެވެ. އެ ބައްދަލުވުމަށްފަހު ކުރި ޓްވީޓެއްގައި މާޔަން ބުނީ ކުޅިވަރު ތެރޭގައި ރާއްޖެ އާއި ރާއްޖޭން ބޭރުގައި ހިނގާ ކޮރަޕްޝަނާއި ނާއިންސާފުން ގެންގުޅޭ ތަފާތުކުރުންތަކުގެ ވާހަކައާ ބެހޭ ގޮތުން ރައީސް ނަޝީދާއެކު މަޝްވަރާކުރެވުނީތީ ވަރަށް ހިތްހަމަޖެހޭ ކަމަށެވެ. އަދި އެ ކަންބޮޑުވުންތަކާ ގުޅޭ ގޮތުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާ ބައްދަލުކުރަންވެސް ބޭނުންވާ ކަމަށާއި، ކުޅިވަރު އެންމެ ރަނގަޅު މިސްރާބަށް ގެންދިއުމުގެ މަސައްކަތްކުރަން އެންމެންގެ ބައިވެރިވުންވެސް މުހިންމު ކަމަށްވެސް މާޔަން ބުންޏެވެ.

ޝެއިޚް އަޙްމަދާ ދެކޮޅަށް ހުށަހެޅި މައްސަލައިގައި މާޔަންއަށް ކާމިޔާބު ހޯދާފައިވީ ނަމަވެސް، އެ އިންތިޚާބު އުވާލަން ނުވަތަ އަލުން ބޭއްވުމަށް އެދި މާޔަން ހުށަހަޅާފައިވާ އިސްތިއުނާފީ މައްސަލަ ސީއޭއެސްއިން ވަނީ ބޭރުކޮށްލާފައެވެ. މާޔަން ހުށަހަޅާފައިވާ މައްސަލައިގައި އޭނާ ފާހަގަކުރި ނުކުތާތައް ރަނގަޅުކަން ކޯޓުން ފާހަގަކުރި ނަމަވެސް، މާޔަން އެދިފައިވާ ގޮތަށް އިންތިޚާބުގެ ނަތީޖާތައް ބާތިލުކުރުމުގެ ބާރު އެ ކޯޓަށް ނެތް ކަމަށް ބަޔާނުގައިވެއެވެ. އެ ގޮތުން އިންތިޚާބާ ބެހޭ ވަކި ނިންމުމެއް ނިންމާނީ އޭއެފްސީން ކަމަށްވެސް ސީއޭއެސްއިން ބުނެފައިވެއެވެ.