ރާއްޖެއިން ވެކްސިން ޖެހި މީހުންގެ އަދަދު ބައިލައްކައަށް އަރައިފި
ރާއްޖެއިން އިތުރު 6230 މީހުން ވެކްސިން ޖަހާފައިވޭ
ރާއްޖެއިން ބޭނުން ކުރަމުންދާ ކޮވިޝީލްޑް ވެކްސިން- މި ވެކްސިނަކީ 70 އިންސައްތަ ކާމިޔާބު ވެކްސިނެއް
ރާއްޖެއިން ކޮވިޑް-19 ވެކްސިން ޖެހި މީހުންގެ ޖުމްލަ އަދަދު ބައިލައްކަ ފަހަނައަޅައިފިއެވެ.
ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން އާންމު ކޮށްފައިވާ ފަހުގެ ތަފާސްހިސާބުތައް ދައްކާ ގޮތުން އަންގާރަ ދުވަހު ރާއްޖެއިން އިތުރު 6230 މީހުން ވެކްސިން ޖަހާފައިވެއެވެ. އޭގެ ތެރޭގައި ހިމެނެނީ މާލޭ ސަރަޙައްދުން ވެކްސިން ޖަހާފައިވާ 4020 މީހަކާއި، އަތޮޅު ތެރެއިން ވެކްސިން ޖަހާފައިވާ 2090 މީހެއްގެ އިތުރުން، ރިސޯޓުތަކުން ކޮވިޑް ވެކްސިން ޖަހާފައިވާ 120 މީހެކެވެ. އެއާއެކު، ރާއްޖެއިން މިހާތަނަށް ކޮވިޑް ވެކްސިން ޖެހި މީހުންގެ ޖުމުލަ އަދަދު މިވަނީ 50،047ށް އަރާފައެވެ.
ރާއްޖެއިން ބައިލައްކައަށްވުރެ ގިނަ މީހުން ވެކްސިން ޖަހާފައިވާއިރު، ހަމައެކަނި މާލެ ސަރަޙައްދުންވެސް 39،309 މީހަކު ވެކްސިން ޖަހާފައިވެއެވެ. އަދި އަތޮޅު ތެރެއިން ވެކްސިން ޖެހި މީހުންގެ ޖުމުލަ އަދަދު 10،519ށް އަރާފައިވާއިރު، ރިސޯޓުތަކުން 219 މީހަކު ވަނީ ކޮވިޑް ވެކްސިން ޖަހާފައެވެ.
އެޗްޕީއޭއިން މައުލޫމާތު ދޭ ގޮތުގައި ފާއިތުވި 24 ގަޑިއިރު ރާއްޖެއިން 4020 މީހުން ކޮވިޑް ވެކްސިން ޖަހާފައިވެއެވެ.
ފެބްރުއަރީ 1 ވަނަ ދުވަހު މާލެ، ކުޅުދުއްފުށި އަދި އައްޑޫ ސިޓީގައި ވެކްސިން ޖެހުމުގެ ޤައުމީ ޕްރޮގްރާމް ފެށުމަށްފަހު، މިހާރު ރާއްޖޭގެ ހުރިހާ ރަށެއްގައި ވެކްސިން ޖެހުމުގެ މަސައްކަތް ކުރަމުންދާކަމަށް އެޗްއީއޯސީއިން ބުނެއެވެ. އެގޮތުން ވެކްސިން ޕްރޮގްރާމް ފުޅާކޮށް، އާބާދީގެ ވީހާވެސް ގިނަ ބަޔަކަށް ވެކްސިން ދިނުމަށް މަސައްކަތް ކުރަމުންދާކަން އެޗްއީއޯސީން ފާހަގަ ކޮށްފައިވެއެވެ.
ސިރަމް އިންސްޓިޓިއުޓުން ރާއްޖެއަށް ހަދިޔާކުރި ކޮވިޝީލްޑްގެ އެއްލައްކަ ޑޯޒް މިވަގުތު ބޭނުންކުރަމުންދާއިރު، މި ޑޯޒްތައް ހުސްވުމަށްފަހު ވެކްސިން ދިނުމުގެ ޕްރޮގްރާމް ނުހުއްޓޭނެފަދަ ނިޒާމެއްގެ ދަށުން ވެކްސިން ލިބިފައިވާކަންވެސް އެޗްއީއޯސީން ފާހަގަ ކޮށްފައިވެއެވެ.
