ހިޔާ ފްލެޓްތަކުގެ ފެނާއި ނަރުދަމާގެ ނިޒާމު ގާއިމު ކުރުމުގެ އަމަލީ މަސައްކަތް ނިންމާފައިފައިވާ ކަމަށް މާލޭ ވޯޓަރ އެންޑް ސްވަރޭޖް ކޮމްޕެނީ (އެމްޑަބްލިއުއެސްސީ)ން ބުނެފިއެވެ.

އެމްޑަބްލިއުއެސްސީން ބުނީ މި މަސައްކަތް ނިންމާލައިފައިވަނީ ތާވަލު ކޮށްފައިވާ މުއްދަތުގެ ކުރިން ކަމަށެވެ. އެގޮތުން ހިޔާ މަޝްރޫއުގައި ހިމެނޭ 16 ޓަވަރުގެ 7000 ހައުސިން ޔުނިޓަށް ފެނާއި ނަރުދަމާ ފޯރުކޮށްދިނުމަށް ބޭނުންވާ 3.7 ކިލޯމީޓަރުގެ ދިގު ފެނުގެ މައި ނެޓުވޯކާއި 3.5 ކިލޯމީޓަރުގެ ނަރުދަމާގެ މައި ނެޓުވޯކްއާ 200 މީޓަރުގެ ދިގު ޕަމްޕިން ލައިނެއް އަޅާފައިވާ ކަމަށް އެމްޑަބްލިއުއެސްސީއިން ބުނެއެވެ.

އެމްޑަބްލިއުއެސްސީން ބުނީ ހައުސިން ޔުނިޓުތައް ހިމެނޭ ސަރަހައްދުގައި ނަރުދަމާގެ ޕަމްޕިން ސްޓޭޝަން ބަހައްޓައި، 16 ޓަވަރަށް ނަރުދަމާގެ ކަނެކްޝަން ގުޅައިދީފައިވާ ކަމަށާއި ހައުސިން ޔުނިޓުތަކުގައި ފެން މީޓަރުތައް ވެސް ބަހައްޓާފައިވާ ކަމަށެވެ. މި މަޝްރޫއުގެ ސަބަބުން ހުޅުމާލޭގައި އަލަށް ތަރައްގީކުރި ހިޔާ ފްލެޓްތަކުގައި ދިރިއުޅޭ ފަރާތްތަކަށް ސާފު ބޯފެނާއި ރައްކާތެރި ނަރުދަމާގެ ނިޒާމެއް ލިބިގެންދާނެއެވެ.

ހިޔާ މަޝްރޫއުގެ އެކި ގިންތިތަކަށް ފޯމު ހުށައެޅި މީހުންގެ ތެރެއިން ފްލެޓު ލިބޭ މީހުންގެ ދާއިމީ ލިސްޓުގެޒެޓުގައިއާންމު ކޮށްފައިވަނީ މި މަހުގެ 9 ވަނަ ދުވަހުއެވެ.

ހިޔާ މަޝްރޫއިން ފްލެޓު ލިބޭ މީހުންގެ ދާއިމީ ލިސްޓު އާންމުކޮށްފައި މިވަނީ ވަގުތީ ލިސްޓުތަކަށް ޝަކުވާ ހުށައެޅުމަށްވެސް ފުރުސަތު ދިނުމަށްފަހުއެވެ. އެގޮތުން "ހިޔާ" މަޝްރޫޢުގެ ފްލެޓުތަކުގެ ވަގުތީ ލިސްޓު އިޢުލާނުކޮށްފައިވާ ކެޓަގަރީތަކުގައި ދިރިއުޅުމުގެ ޙާލަތު ވަޒަންކުރުމުގައި ޕޮއިންޓްދީފައިވާ ގޮތާއި ގުޅޭގޮތުން ޝަކުވާ ހުށަހެޅުމަށް އިތުރު ފުރުޞަތެއް ފްލެޓުތަކުގެ މައްސަލަ ބަލާ ކޮމިޓީން ދީފައިވަނީ މިދިޔަ އަހަރުގެ ޑިސެމްބަރު މަހުގެ 30 ވަނަ ދުވަހުއެވެ. އޭރު ވަގުތީ ލިސްޓުތަކަށް ޝަކުވާ ހުށަހެޅުމަށް އިތުރު ފުރުޞަތެއް ހުޅުވާފައި ވަނީ 2020 ޑިސެންބަރު 30 ވަނަ ދުވަހުން ފެށިގެން 2021 ޖަނަވަރީ 5 ވަނަ ދުވަހުގެ 15:00 ގެ ނިޔަލަށެވެ.