ނޫސްވެރިން އަތުގައި މިހާރު އޮތް ފާސް މި މަހުގެ 23 ގެ ނިޔަލަށް ކާފިއު ވަގުތުތަކުގައި ބޭނުންކުރެވޭނެ: އެމްއެމްސީ
ފާހުގެ ބޭނުން ނަހަމުގޮތުގައި ނުކުރުމަށް އެމްއެމްސީން އިލްތިމާސްކުރި
ކާފިއު ގަޑީގައި މާލޭ މަގުމަތި
ކޮވިޑް-19ގެ ހާލަތާއި ގުޅިގެން ހަރުކަށި ފިޔަވަޅުތަކެއް އަޅައި، ކާފިއު ގަޑިތައް ކަނޑައަޅާފައިވާއިރު އެ ވަގުތުތަކުގައި ނޫސްވެރިންނަށް ޒަރޫރީ ހާލަތުގައި ބޭރުގައި އުޅުމަށް މިހާރު އޮތް ނޫސްވެރިންގެ ފާސް މި މަހުގެ 23 ވަނަ ދުވަހުގެ ނިޔަލަށް ބޭނުން ކުރެވޭނެ ކަމަށާއި އޭގެ ފަހުން ބޭނުން ކުރަން ނޫސްވެރިންނަށް ވަކި ފާހެއް ދޫކުރާނެ ކަމަށް މޯލްޑިވްސް މީޑިއާ ކައުންސިލް އިން ބުނެފިއެވެ.
މޯލްޑިވްސް މީޑިއާ ކައުންސިލް އިން ނެރުނު ބަޔާނެއްގައި ބުނީ ކޮވިޑް-19އާ ގުޅިގެން އަޅާފައިވާ ފިޔަވަޅުތަކުގެ ސަބަބުން ނޫސްވެރިންނަށް ދިމާވެފައިވާ މައްސަލަތައް ހައްލުކުރުމާ ގުޅޭގޮތުން މޯލްޑިވްސް ޕޮލިސް ސާވިސްއާ މަޝްވަރާކޮށްފައިވާ ކަމަށެވެ. އަދި ނޫސްވެރިންނަށް ލުއިތައް ލިބޭނެ އެކި ގޮތްތަކެއް މަޝްވަރާކޮށް ނިންމާފައިވާ ކަމަށް ވެސް ކައުންސިލުން ބުންޏެވެ.
އެ ބައްދަލުވުމުގައި ނިންމި ނިންމުންތަކާ ގުޅިގެން ބަޔާނުގައި ބުނީ މާލެ ސަރަހައްދުގައި މަގުމައްޗަށް ނުކުތުމާއި ބޭރުގައި އުޅުން މަނާ ގަޑިތަކުގައާއި، އެއްގަމު އުޅަނދުފަހަރު ދުއްވުން މަނާ ގަޑިތަކުގައި، ނޫސްވެރިން މިހާރުވެސް ބޭނުން ކުރަމުން ގެންދާ މީޑިއާ ފާސް 23 ފެބްރުއަރީ 2021 ވާ އަންގާރަ ދުވަހުގެ ނިޔަލަށް ބޭނުން ކުރެވޭނެ ކަމަށެވެ. އަދި އޭގެ ފަހުން ނޫސްވެރިން ބޭނުންކުރަން އެ ކައުންސިލުން އިތުރު ފާހެއް ދޫކުރަން ހަމަޖައްސާފައިވާ ކަމަށާއި ފާހަށް ހުށަހެޅުމަށް ހުރިހާ މީޑިއާތަކަށް 17 ފެބްރުއަރީގެ ނިޔަލަށް ހުޅުވާލާފައިވާ ކަމަށް ވެސް ބުންޏެވެ.
ނޫސްވެރިންނަށް ދޫކުރާ ފާހަކީ އެބޭފުޅުން ނޫސްވެރިކަމުގެ މަސައްކަތް ކުރުމަށް ދޫކުރެވޭ ފާހަކަށް ވީހިނދު އެފާސްނަހަމަގޮތުގައި ބޭނުން ނުކުރުމަށް ވެސް ކައުންސިލްގެ ބަޔާނުގައި ގޮވާލާފައިވެއެވެ.
މާލެ ސަރަހައްދުގައި ކޮވިޑް-19 ހަލުވިކަމާއެކު ފެތުރެމުންދާއިރު، މިހާރު އަޅާފައިވާ ފިޔަވަޅުތައް ވަނީ ވަރުގަދަކޮށްފައެވެ. އެގޮތުން އިރު އޮއްސި ހަޔަކުން ހެނދުނު ހަޔަކަށް އެއްގަމު އުޅަނދު ނުދުއްވޭގޮތަށް ކަނޑައަޅާފައިވާއިރު، ރޭގަނޑު 11 ގެ ފަހުން ފަތިހު 4އާ ދެމެދު ކާފިއު ވަނީ އިއުލާންކޮށްފައެވެ.
އެ ގަޑިތަކުގައި ފުލުހުން ޓެކްސީތަކާއި ކޮންމެހެން ދޭން ޖެހޭ ހިދުމަތްތަަކަށް ވަކި އުޅަނދުތަކަކަށް ފާސް ދޫކޮށްފައިވާއިރު، ޑިއުޓީއަށް އަދި މަސައްކަތްތަކަށް ނިކުންނަން ޖެހޭ ފަރާތްތަކަށް ދޫކުރަނީ ފުލުހުންގެ ޕާމިޓް ޕޯޓަލް މެދުވެރިކޮށް، ވަގުތީ ފާހެކެވެ. އެ ފާހަކީ 10 މިނެޓާއި 30 މިނެޓުގެ ވަގުތުކޮޅަކަށް ދޫކުރާ ހުއްދައެކެވެ.
