ފަހު ވަގުތާ ޖެހެންދެންވެސް ޗެމްޕިއަނުންގެ ގޮތުގައި މަސައްކަތްކުރާނަން: ސަލާހު

ފަހު ވަގުތާ ޖެހެންދެންވެސް ޗެމްޕިއަނުންގެ ގޮތުގައި މަސައްކަތްކުރަން ލިވަޕޫލަށް ކުޅެމުން އަންނަ މިސްރުގެ ފޯވާޑް މުޙައްމަދު ސަލާހު ވަޢުދުވެއްޖެއެވެ.

ލިވަޕޫލުން 30 އަހަރަށްފަހު އިނގިރޭސި ޕްރިމިއާ ލީގު ކާމިޔާބުކުރީ މިދިޔަ ސީޒަނުގައެވެ. އެކަމަކު މި ފަހަކަށް އައިސް ލިވަޕޫލުގެ ކުޅުން ވަނީ ވަރަށް ބޮޑަށް ދަށްވެފައެވެ. އެގޮތުން މިދިޔަ ހޮނިހިރު ދުވަހުގެ ހަވީރު ލެސްޓާ ސިޓީ އަތުން 3-1 ގެ ނަތީޖާއަކުން ލިވަޕޫލް ބަލިވިއިރު، މިއީ ފާއިތުވި އަށް އަހަރުތެރޭ ލީގުގައި ޖެހިޖެހިގެން ތިން މެޗުން ލިވަޕޫލް ބަލިވި ފުރަތަމަ ފަހަރެވެ.

މީގެ އިތުރުން 2017 ވަނަ އަހަރުގެ އޭޕްރީލް މަހުގެ 23 ވަނަ ދުވަހުގެ ފަހުން މި ސީޒަނުގައި މުޅިން އަލަށް ލިވަޕޫލް ވަނީ ލީގުގައި އަމިއްލަ ދަނޑުގައި މެޗަކުން ބަލިވެފައެވެ. އެއާއެކު ލީގުގައި އެންމެ ފަހުން ލެސްޓާ އަތުން ބަލިވި މެޗަށްފަހު ލިވަޕޫލުގެ ކޯޗު ޔާގެން ކްލޮޕް ވަނީ މި ސީޒަނުގައި ލިވަޕޫލަށް ދެން ތަށި ދިފާޢު ނުކުރެވޭނެ ކަމަށް ބުނެފައެވެ.

އެކަމަކު އާދީއްތަ ދުވަހު ކުރި ޓްވީޓެއްގައި ސަލާހު ބުނީ ވަރަށް ގިނަ ސަބަބުތަކާއެކު މިއީ ލިވަޕޫލަށް ދަތި އުދަނގޫ ދުވަސްތަކެއް ކަމަށެވެ. އެކަމަކު ލިވަޕޫލަކީ އެންމެ ފަހުގެ ޗެމްޕިއަނުން ކަމަށާއި، އެހެންކަމުން އެންމެ ފަހު ވަގުތާ ޖެހެންދެންވެސް ޗެމްޕިއަނުންގެ ގޮތުގައި މަސައްކަތްކުރާނެ ކަމަށްވެސް ބުންޏެވެ. އަދި އެއީ ހުރިހާ ސަޕޯޓަރުންނަށްވާ ވަޢުދެއް ކަމަށްވެސް ސަލާހު ވަނީ ބުނެފައެވެ.

މީގެ ކުރިން ކްލޮޕުގެ އިރުޝާދުގެ ދަށުން ލިވަޕޫލުން ތަފާތު މޮޅު ކުޅުމެއް ދެއްކި ނަމަވެސް، މި ފަހަކަށް އައިސް އެ ޓީމުގެ ކުޅުން ވަރަށް ބޮޑަށް ދަށްވީ އަނިޔާގެ ގިނަ މައްސަލަތަކެއް ކުރިމަތިވުމުންނެވެ. އެގޮތުން ކަކުލަށް ލިބުނު އަނިޔާގެ ސަބަބުން ލިވަޕޫލުގެ ތަޖުރިބާކާރު ޑިފެންޑަރު ވާޖިލް ވެން ޑައިކާއި ޖޯ ގޯމޭޒަށް މި ސީޒަނުގައި އެނބުރި ކުޅުމަށް އާދެވޭނެ ކަމުގެ ޔަގީންކަމެއް ނެތްއިރު، އެ ޓީމުގެ ޖޮއެލް މަޓިޕުގެ ތަނބިކައްޓަށް ލިބުނު އަނިޔާގެ ސަބަބުން އޭނާއަށް މި ސީޒަނުގައި ދެން ނުކުޅެވޭނެ ކަމަށް ލިވަޕޫލުން ވަނީ ބުނެފައެވެ. އެއާއެކު މި ފަހަކަށް އައިސް ލިވަޕޫލުގެ ފަހަތް ބަލަހައްޓާފައިވަނީ އެ ޓީމުގެ މިޑްފީލްޑަރުންނެވެ.

ޕްރިމިއާ ލީގުގެ ތަށި ދިފާޢުކުރުމުގެ ފުރުސަތު ލިވަޕޫލަށް ހަނުވެފައިވާއިރު، އެ ޓީމު އޮތީ ލީގު ތާވަލުގެ ހަތަރުވަނައިގައި ކުޅުނު 24 މެޗުން ލިބުނު 40 ޕޮއިންޓާއެކުއެވެ. އަދި އެއްވަނައިގައި އޮތް މެންޗެސްޓާ ސިޓީއަށް 23 މެޗުން ވަނީ 53 ޕޮއިންޓް ލިބިފައެވެ.