އާރްބީ ލައިޕްޒީގަށް ކުޅެމުން އަންނަ ފްރާންސްގެ ޒުވާން ޑިފެންޑަރު ޑަޔުޓް އުޕަމެކާނޯ ދުނިޔޭގެ ޗެމްޕިއަން ބަޔާން މިއުނިކަށް ބަދަލުވާން އެއްބަސްވެއްޖެއެވެ.
ބަޔާނުން ހާމަކުރި ގޮތުގައި އުމުރުން 22 އަހަރުގެ އުޕަމެކާނޯ ވަނީ އެ ކުލަބާއެކު ފަސް އަހަރުގެ އެއްބަސްވުމެއް ހަދާފައެވެ. އެހެންކަމުން އޭނާ ބަޔާނާ ގުޅޭނީ މި ސީޒަން ނިމި، ކުރިއަށް އޮތް ހޫނު މޫސުމުގެ ޓްރާންސްފާގައި ކަމަށްވެސް ބަޔާނުން ވަނީ ބުނެފައެވެ.
އަންނަ ސީޒަނަށް ބަޔާނަށް ބަދަލުވާން އުޕަމެކާނޯ އެއްބަސްވިއިރު، މީގެ ކުރިން މިދިޔަ އަހަރު އޭނާ ވަނީ ލައިޕްޒީގާއެކު ހަދާފައިވާ އެއްބަސްވުން 2023 ވަނަ އަހަރުގެ ނިޔަލަށް އާކޮށްފައެވެ. އެހެންކަމުން އެ އެއްބަސްވުން އުވާލަން 42.5 މިލިޔަން ޔޫރޯ ދައްކަން ޖެހޭއިރު، މި ސީޒަން ނިމުމުން ބަޔާނުން އެ އަދަދު ދެއްކުމަށް މިހާރު ވަނީ އެއްބަސްވެފައެވެ.
ބަޔާނަށް ބަދަލުވާން އުޕަމެކާނޯ ނިންމިއިރު، އޭނާއަކީ މި ވަގުތު ޔޫރަޕުގައި އެންމެ ޑިމާންޑް ބޮޑު އެއް ޑިފެންޑަރެވެ. އެގޮތުން އޭނާ ހޯދުމަށް ލިވަޕޫލާއި، ޗެލްސީގެ އިތުރުން މެންޗެސްޓާ ޔުނައިޓެޑުންވެސް ވަނީ މަސައްކަތްކޮށްފައެވެ.
އޮސްޓްރިއާގެ ލިއެފްރިނުން ފުޓްބޯޅަ ކެރިއަރު ފެށި އުޕަމެކާނޯ އެންމެ ފުރަތަމަ ބަދަލުވީ އާރްބީ ސާލްޒްބާގަށެވެ. އަދި ސާލްޒްބާގުގައި ދެ ސީޒަން ހޭދަކުރުމަށްފަހު 2017 ވަނަ އަހަރު އޭނާ ލައިޕްޒީގަށް ބަދަލުވީ 10 މިލިޔަން ޔޫރޯގެ ފީއަކަށެވެ. އަދި މިހާތަނަށް އޭނާ ލައިޕްޒީގުގައި ފަސް ސީޒަން ހޭދަކޮށްފައިވާއިރު، އެ ޓީމަށް ވަނީ ޖުމްލަ 139 މެޗު ކުޅެދީފައެވެ.
އަދި މިދިޔަ އަހަރު ފްރާންސްގެ ގައުމީ ފުޓްބޯޅަ ޓީމުން އުޕަމެކާނޯ ޖާގަ ހޯދިއިރު، އޭނާ ވަނީ އެ ގައުމަށް މިހާތަނަށް ތިން މެޗު ކުޅެދީފައެވެ. އަދި އޭނާ ވަނީ 2018 ވަނަ އަހަރު ޝޯޓްލިސްޓް ކުރި ގޯލްޑަން ބޯއި އެވޯޑަށްވެސް ނޮމިނޭޓުވެފައެވެ.
