ރިސޯޓުތަކުގައި ވެކްސިން ޖަހަން ފަށައިފި، ފުރަތަމަ ދުވަހު 99 މީހުން ވެކްސިން ޖެހި
ރާއްޖޭގައި މިހާރު ޖަހަމުން އަންނަނީ އިންޑިއާގެ ސިރަމް އިންސްޓިޓިއުޓްގެ ކޮވެޝީލްޑް ވެކްސިން
ކޮވިޑް-19ން ރައްކާތެރިވުމަށް ކުރިއަށް ގެންދާ ކެމްޕެއިންގެ ތެރެއިން ވެކްސިން ޖަހަނީ
ކޮވިޑް-19 "ދިފާއު ކެމްޕެއިން" ގެ ދަށުން ރިސޯޓުތަކުގައި ވެކްސިން ޖަހަން ފަށައިފިއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) ގެ ތަފާސް ހިސާބުތަކުން ދައްކާ ގޮތުން އާދީއްތަ ދުވަހު ރިސޯޓުތަކުން 99 މީހަކު ވަނީ ވެކްސިން ޖަހައިފައެވެ. އަދި މާލެ ސަރަހައްދުން 4،257 މީހުން ވެކްސިން ޖަހާފައިވާއިރު، އަތޮޅު ތެރެއިން 1،129 މީހުން ވަނީ ވެކްސިން ޖަހައިފައެވެ.
އެޗްޕީއޭގެ ތަފާސް ހިސާބުތަކުން ދައްކާ ގޮތުން މިހާތަނަށް ރާއްޖެއިން 38،591 މީހުން ވަނީ ވެކްސިން ޖަހައިފައެވެ. އެއީ މާލެ ސަރަހައްދުން 31،322 މީހުންނާއި، އަތޮޅުތެރެއިން 7،170 މީހުން އަދި ރިސޯޓުތަކުން 99 މީހުންނެވެ.
ރާއްޖޭގައި ކޮވިޑްގެ ވެކްސިންދޭން ފެށީ ފެބްރުއަރީ މަހުގެ 1 ވަނަ ދުވަހުއެވެ. އެއާއިއެކު ކޮވިޑްގެ ވެކްސިނަށް ބޮޑު ތަރުހީބެއް ލިބެމުން އަންނަ ކަމަށް ހެލްތު އެމަރޖެންސީ ސެންޓަރ (އެޗްއީއޯސީ) ގެ ތަރުޖަމާނު ޑރ. ނަޒްލާ ރަފީގް ވަނީ ވިދާޅުވެފައެވެ.
ކޮވިޑްގެ ވެކްސިން އެންމެ ފުރަތަމަ ޖަހަން ފެށީ ސިއްހީ ހިދުމަތްތެރިންނާއި، ފްރޮންޓްލައިން މަސައްކަތްތެރީންނަށެވެ. އެއަށްފަހު މިހާރު ވެކްސިން އުމުރުން 18 އަހަރާއި 50 އަހަރާއި ދެމެދު އުމުރުފުރައިގެ މީހުންގެ ތެރެއިން ދިގު މުއްދަތަށް ބޭސް ބޭނުންކުރާ ފަރާތްތަކާއި 50 އަހަރުން މަތީގެ މީހުނަށް ވެސް ވެކްސިންދޭން ވަނީ ފަށައިފައެވެ.
އެގޮތުން މާލޭގައި މި ފަރާތްތަކަށް ވެކްސިން ދިނުމަށް ހަމަޖެހިފައިވަނީ ސޯޝަލް ސެންޓަރ، އިސްލާމީ މަރުކަޒު، ވިލިމާލެ ޒުވާނުންގެ މަރުކަޒު އަދި ހުޅުމާލެ ވެކްސިން ސެންޓަރުގެ އިތުރުން 2 ތަނެއްގައި އަންނަނީ ވެކްސިން ދެމުންނެވެ. މިއިން ކޮންމެ ވެކްސިން މަރުކަޒެއްގައިވެސް ދުވާލު 09:00ން ފެށިގެން 17:00ށް ވެކްސިން ދެމުން ގެންދާނެއެވެ. މީގެ އިތުރުން އަތޮޅު ތެރޭގައި ވެސް 40ށް ވުރެ ގިނަ ވެކްސިން ސެންޓަރުން އަންނަނީ ވެކްސިން ދެމުންނެވެ.
ރާއްޖޭގައި މިހާރު ޖަހަމުން އަންނަނީ އެސްޓްރަޒެނިކާ/އޮކްސްފޯޑް ޔުނިވަރސިޓީ އުފައްދާ އިންޑިއާގެ ސެރަމް އިންސްޓިޓިއުޓުން މާސް ޕްރޮޑަކްޝަނގެ ދަށުން އުފައްދަމުން އަންނަ ކޮވެޝީލްޑް ވެކްސިނެވެ.
