ގައުމު މިހާރު އޮތް ހާލަތުން ރަނގަޅު ހާލަތަކަށް ވަރަށް އަވަހަށް ދާން ދިވެހި ރައްޔިތުން އެދޭ ކަމަށާއި ހާލަތު ރަނގަޅު ކުރުމުގެ ވިސްނުން ހުރީ އަދި އެކަން ކުރެވޭނީ ވެސް ހަމައެކަނި ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ)އަށް ކަމަށް އެ ޕާޓީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމްޑީޕީގެ ގައުމީ މަޖިލިސް ބައްދަލުވުމުގައި ވާހަކަދައްކަވަމުން ރައީސް ނަޝީދު ވިދާޅުވީ ޖީބަށް ވަންނަ ފައިސާއާއި، ދަރިންނަށް ލިބޭ ތަރުބިއްޔަތާއި ތައުލީމުގެ އިތުރަށް ބޯހިޔާވަހިކަމާއި އުމްރާނީ ހިދުމަތްތައް ވަރަށް އަވަސްކޮށް ދެގުނަކުރަން ރައްޔިތުން ބޭނުންވާ ކަމަށެވެ. އަދި އެކަން އެގޮތަށް ކޮށް، ދިވެހިން އެހެން ހާލަތަށް ބަދަލުކުރުމުގެ ފުޅާ ވިސްނުން އަބަދު ވެސް ނެރޭ އަދި އެ ވިސްނުން ތަންފީޒުކުރެވޭނެ ޕާޓީއަކީވެސް އެމްޑީޕީ ކަމަށާއި، އެމްޑީޕީއަށް އާންމުންގެ އިތުބާރު އޮންނަނީ ވެސް އެ ސަބަބައްޓަކައި ކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ އެމްޑީޕީގެ ފުރަތަމަ ވެރިކަން ނިމި މިހިސާބަށް އައި އިރު ގައުމު ކުރިއަރުވައި އެ ބޭނުންވާ "ޖަމްޕު" ޖެހުމަށް ބޭނުންވާ ތަރަހަ ފުރިހަމަވެފައިވާ ކަމަށެވެ. އަދި ރައީސް ސޯލިހަށް އެކަން ވަރަށް ރަނގަޅަށް އެނގިވަޑައިގަންނަވާނެ ކަމަށް ވިދާޅުވިއެވެ.
މީގެ ކުރިން ގައުމުގެ ތަރައްގީއަށް ކުރަމުން އައި މަސައްކަތްތަކަށް އިޝާރާތްކުރައްވާ ރައީސް ނަޝީދު ވިދާޅުވީ އޭރު ހެދުނީ އަހަރަކު ބަނދަރެއް ކަމަށެވެ. ނަމަވެސް މިހާރު ރައީސް ސޯލިހުގެ ވެރިކަމުގައި ރާއްވަވައި ބަޖެޓު ހޯއްދަވާފައިވަނީ ހުރިހާ ރަށެއްގެ ފެނާއި ނަރުދަމާ އަދި ބަނދަރުތައް އެއްފަހަރާ ހެދުމަށް ކަމަށެވެ.
ރައީސް ނަޝީދު ވިދާޅުވީ ދިވެހިން ބޭނުންވާ ތަރައްގީ އެ އަވަސްކަމުގައި ގެނައުމަށް ކުރަން ޖެހޭ ގިނަ މަސައްކަތްތަކެއް އެބަހުރި ކަމަށެވެ. އެގޮތުން ބޭރު ދުނިޔެއާއި އޮންނަ ބައިނަލް އަގުވާމީ ގުޅުން ރަނގަޅުކުރުން އެއީ ކުރުން އެންމެ މުހިންމު ކަންތައް ކަމުގައި ވެސް ވިދާޅުވިއެވެ.
ރައީސް ނަޝީދު ވިދާޅުވީ އަތުގައި ހުރި އެއްޗަކުން ފުދިއްޖެކަމަށް ދެކޭނަމަ ވާނެ ތަރައްގީއެއް ނޯންނާނެ ކަމަށެވެ. އެމްޑީޕީގެ ވިސްނުމަކީ ވަރަށް ފުޅާ ވިސްނުމެއް ކަމަށާއި ހަމައެކަނި ރާއްޖެއާ ހަމައިން އެ ވިސްނުން ނުނިމޭނެ ކަމަށްވެސް ވިދާޅުވިއެވެ. އަދި ތަކުރާރުކޮށް ރައްޔިތުން އެމްޑީޕީ ވެރިކަމަށް ގެންނަނީ ވެސް އެހެންވެ ކަމަށް ރައީސް ނަޝީދު ވިދާޅުވިއެވެ.
